బాక్సాఫీస్ దగ్గర సూపర్ స్టార్ రజనీకాంత్ స్టామినా ఏంటో ‘జైలర్’ సినిమాతోనే మరోసారి ప్రూవ్ అయింది. ఇప్పుడు అదే నెల్సన్ దిలీప్‌కుమార్ – రజనీకాంత్ కాంబోలో వచ్చిన ‘జైలర్ 2’ తెలుగు రాష్ట్రాల్లో బాగా పర్ఫాం చేస్తోంది. అయితే, ఈ సినిమా హక్కుల కోసం వెచ్చించిన భారీ మొత్తాన్ని చూసి మొదట డిస్ట్రిబ్యూటర్లు తీవ్ర ఆందోళనకు గురయ్యారట! కానీ, రజనీ మేనియా ముందు ఆ భయాలన్నీ పటాపంచలయ్యాయని, పెట్టిన భారీ రిస్క్ వర్కౌట్ అయిందని ప్రముఖ నిర్మాత, ఈ సినిమాను తెలుగులో రిలీజ్ చేసిన సూర్యదేవర నాగవంశీ సంతోషం వ్యక్తం చేశారు. సన్‌ పిక్చర్స్ పతాకంపై కళానిధి మారన్ నిర్మించిన ‘జైలర్ 2’, అక్టోబర్ 15న విడుదలై తొలి షో నుంచే పాజిటివ్ టాక్‌తో దూసుకుపోతోంది. ఈ భారీ క్రేజీ ప్రాజెక్ట్ తెలుగు రాష్ట్రాల పంపిణీ హక్కులను సితార ఎంటర్‌టైన్‌మెంట్స్ బ్యానర్‌పై నాగవంశీ దక్కించుకున్న విషయం తెలిసిందే. ఈ సినిమా వసూళ్ల సునామీ సృష్టిస్తున్న నేపథ్యంలో ఏర్పాటు చేసిన ప్రెస్ మీట్‌లో ఆయన పలు ఆసక్తికర విషయాలను పంచుకున్నారు.
“ప్రస్తుత రోజుల్లో సినిమా కొన్న తర్వాత డిస్ట్రిబ్యూటర్లకు కమిషన్ మిగలడం అనేది చాలా అరుదైన విషయం అయిపోయింది. ‘జైలర్ 2’ కోసం మేము భారీ రేటు వెచ్చించడంతో, అంత రేటు పెట్టి తీసుకున్నందుకు మొదట్లో అందరూ చాలా భయపడ్డారు. కానీ రజనీకాంత్ గారి స్టార్‌డమ్, నెల్సన్ టేకింగ్, అనిరుధ్ మ్యూజిక్ పై ఉన్న నమ్మకంతోనే ఆ రిస్క్ చేశాం. రిలీజ్ రోజు సాయంత్రం షోల కలెక్షన్స్ చూశాక డిస్ట్రిబ్యూటర్లందరిలో ధీమా వచ్చింది. ఖచ్చితంగా కమిషన్లు తీసుకుంటామని వారు చెప్పడం చాలా ఆనందంగా ఉంది. ఈ రిస్క్ కు తగ్గ ప్రతిఫలం దక్కడం హ్యాపీగా ఉంది. మీడియా ఇచ్చిన అద్భుతమైన మద్దతు వల్లే ఇది సాధ్యమైంది” అని నాగవంశీ అసలు విషయాన్ని బయటపెట్టారు. ఇక ఈ చిత్రాన్ని నైజాం ఏరియాలో మైత్రి మూవీ డిస్ట్రిబ్యూటర్స్ ద్వారా మైత్రి శశి విడుదల చేశారు. ఈ ప్రెస్ మీట్ లో పాల్గొన్న ఆయన మాట్లాడుతూ.. రజనీ యాక్షన్, ఎంటర్టైన్మెంట్ తో పాటు అనిరుధ్ నేపథ్య సంగీతం ప్రేక్షకులను ఉర్రూతలూగిస్తోందని తెలిపారు. కలెక్షన్స్ వస్తున్న తీరు చూస్తుంటే, విజయదశమి నాటికే సినిమా బ్రేక్ ఈవెన్ సాధించి లాభాల బాట పడుతుందన్న పూర్తి నమ్మకం నాకుంది” అని శశి ధీమా వ్యక్తం చేశారు. మొత్తానికి భారీ రేట్లు చూసి రిస్క్ అని భయపడ్డ చోటే, పంపిణీదారులకు పండుగకు ముందే లాభాల పంట పండుతుండటంతో ‘జైలర్ 2’ తెలుగు బాక్సాఫీస్ వద్ద సరికొత్త ప్రభంజనం సృష్టిస్తోంది.