సూపర్ స్టార్ కృష్ణ కుటుంబం నుంచి వచ్చి, మహేష్ బాబు వారసత్వాన్ని అందిపుచ్చుకోవాలని కలలుకన్న దివంగత నటుడు ఘట్టమనేని రమేష్ బాబు తనయుడు ‘జయకృష్ణ’ ప్రయాణం మొదట్లో కాస్త తడబడింది. ఆయన హీరోగా ఎంట్రీ ఇచ్చిన ‘శ్రీనివాస మంగాపురం’ సినిమా బాక్సాఫీస్ వద్ద ఆశించిన స్థాయిలో వర్కౌట్ కాలేదు. కమర్షియల్ బ్రేక్ రాకపోవడంతో ఆ డెబ్యూ పెద్దగా ఇంపాక్ట్ చూపించలేదు. అయితే, ఇప్పుడు ఈ ఘట్టమనేని మూడో తరం వారసుడికి అదిరిపోయే రేంజ్‌లో కమ్‌బ్యాక్ ఇవ్వడానికి టాలీవుడ్ సెన్సేషనల్ బ్లాక్‌బస్టర్ కాంబో రంగంలోకి దిగడం ఇండస్ట్రీలో హాట్ టాపిక్‌గా మారింది.
‘బేబీ’ లాంటి కల్ట్ ఎమోషనల్ సినిమాతో బాక్సాఫీస్ వద్ద వంద కోట్ల కలెక్షన్లు రాబట్టి ఇండస్ట్రీని షేక్ చేసిన హిట్ ద్వయం.. నిర్మాత ఎస్.కె.ఎన్, డైరెక్టర్ సాయి రాజేష్. యూత్‌కు కనెక్ట్ అయ్యే పల్స్ పట్టుకోవడంలో ఈ టీమ్ మాస్టర్స్ అని ఇప్పటికే ప్రూవ్ అయ్యింది. ప్రస్తుతం వీరి కలయికలోనే ‘చెన్నై లవ్ స్టోరీ’ రూపుదిద్దుకుంటోంది. ఈ సక్సెస్ ఫుల్ కాంపౌండ్ లోనే ఇప్పుడు జయకృష్ణ తన తదుపరి సినిమా చేయబోతున్నాడు. మొదటి సినిమా నిరాశపరిచినా, ఈ క్రేజీ టీమ్ చేతిలో పడటంతో జయకృష్ణకు ఇది ఒక పర్ఫెక్ట్ ‘రీ-లాంచ్’ అవుతుందని సినీ వర్గాలు బలంగా నమ్ముతున్నాయి.
అయితే, ఈ ప్రతిష్టాత్మక ప్రాజెక్టుకు సంబంధించి ఒక ఆసక్తికరమైన సస్పెన్స్ కొనసాగుతోంది. ఈ చిత్రానికి సాయి రాజేష్ స్వయంగా దర్శకత్వం వహిస్తారా? లేక కేవలం తన కథను అందించి డైరెక్షన్ బాధ్యతలను వేరొకరికి అప్పగిస్తారా? అనేది ఇంకా తెలియాల్సి ఉంది. ఏది ఏమైనా, సరైన హిట్ కోసం ఎదురుచూసిన ఆనంద్ దేవరకొండకు ‘బేబీ’తో లైఫ్ ఇచ్చిన ఈ సక్సెస్ ఫుల్ ద్వయం.. ఘట్టమనేని జయకృష్ణకు ఈ ప్రయోగాత్మక రీ-లాంచ్‌తో ఎలాంటి కమర్షియల్ బ్రేక్ ఇస్తుందో చూడాలి!