MAA: తెలుగు చిత్ర పరిశ్రమలో నటీనటుల సంక్షేమం కోసం పనిచేసే ఏకైక అధికారిక సంస్థ ‘మా’ (Movie Artistes Association) అని తాజాగా ఒక సంచలన ప్రకటన విడుదల చేసింది. గత కొంతకాలంగా ‘మా’ పేరును వాడుకుంటూ కొందరు అక్రమ వసూళ్లకు పాల్పడుతున్నట్లు అసోసియేషన్ దృష్టికి రావడంతో, ఈ మోసగాళ్ల పట్ల నటీనటులు, ప్రజలు అప్రమత్తంగా ఉండాలని హెచ్చరించింది. తెలంగాణ, ఆంధ్రప్రదేశ్ రెండు రాష్ట్రాల్లోని తెలుగు నటీనటులకు ‘మా’ మాత్రమే ఏకైక గుర్తింపు పొందిన సంఘం, కానీ ఇటీవల కొందరు వ్యక్తులు “AP MAA”, “MAA AP” వంటి పేర్లతో నకిలీ గ్రూపులు సృష్టించి, తామే అసలైన అసోసియేషన్ అని నమ్మిస్తున్నారట. అమాయక కళాకారుల నుంచి సభ్యత్వాల పేరుతో అక్రమంగా డబ్బులు వసూలు చేస్తున్నట్లు ఫిర్యాదులు అందడంతో ‘మా’ కార్యవర్గం తీవ్రంగా స్పందించింది.
తెలుగు ఫిలిం ఛాంబర్ ఆఫ్ కామర్స్ మరియు తెలుగు ఫిలిం ప్రొడ్యూసర్స్ కౌన్సిల్ గుర్తింపు పొందిన ఏకైక సంస్థ మూవీ ఆర్టిస్ట్ అసోసియేషన్ మాత్రమే. “AP MAA” లేదా “MAA AP” పేరుతో ఉన్న సంస్థలతో తమకు ఎలాంటి సంబంధం లేదని, అవి కేవలం ప్రజలను అయోమయానికి గురిచేయడానికి సృష్టించినవేనని తేల్చి చెప్పింది.* ‘మా’ కార్యాలయం ద్వారా తప్ప, బయట వ్యక్తులు ఎవరైనా సభ్యత్వం కోసం గానీ, విరాళాల కోసం గానీ డబ్బు అడిగితే అది ముమ్మాటికీ మోసమే. అసోసియేషన్ గౌరవానికి భంగం కలిగిస్తూ, కళాకారులను మోసగిస్తున్న వారిపై కఠినమైన చట్టపరమైన చర్యలు తీసుకోనున్నట్లు ‘మా’ హెచ్చరించింది. ఎవరైనా ఇటువంటి నకిలీ సంఘాల ఉచ్చులో పడొద్దని, ఒకవేళ ఎవరైనా డబ్బు డిమాండ్ చేస్తే వెంటనే హైదరాబాద్లోని ఫిల్మ్ నగర్లో ఉన్న ‘మా’ కార్యాలయానికి సమాచారం అందించాలని కోరింది. టాలీవుడ్ ఐక్యతను కాపాడేందుకు ప్రతి ఒక్కరూ అప్రమత్తంగా ఉండాలని, నకిలీ వ్యక్తుల మాటలు నమ్మి మోసపోవద్దని మూవీ ఆర్టిస్ట్ అసోసియేషన్ ఈ సందర్భంగా విజ్ఞప్తి చేసింది.