Ariyana Glory : హిజ్రాలపై అరియానా గ్లోరి సంచలన వ్యాఖ్యలు

బిగ్‌బాస్ ఫేమ్, నటి అరియానా గ్లోరీ సోషల్ మీడియా వేదికగా పంచుకున్న ఓ వీడియో ప్రస్తుతం నెట్టింట తీవ్ర చర్చనీయాంశంగా మారింది. యాంకర్ రవి కొత్తగా ప్రారంభించిన పాడ్‌కాస్ట్ స్టూడియో ఓపెనింగ్‌కు అతిథిగా హాజరైన ఆమె, ఆ సందర్భంలో తాను చూసిన, గతంలో అనుభవించిన కొన్ని సంఘటనలను ప్రస్తావిస్తూ హిజ్రాల తీరుపై తీవ్ర భావోద్వేగంతో మాట్లాడారు. సాధారణంగా ఎవరైనా సరే ఎంతో కాలం కష్టపడి, రూపాయి రూపాయి కూడబెట్టుకుని ఒక కలల ఇల్లు నిర్మించుకుంటారు లేదా కొత్త వ్యాపారాన్ని ప్రారంభిస్తారు. అలాంటి పవిత్రమైన రోజైన గృహప్రవేశం లేదా ప్రారంభోత్సవ పూజల సమయంలో కొందరు హిజ్రాలు వచ్చి చేసే హంగామా మనశ్శాంతిని దూరం చేస్తోందని ఆమె ఆవేదన వ్యక్తం చేశారు. తన సొంత ఇంటి గృహప్రవేశం సమయంలో కూడా ఇలాంటి చేదు అనుభవమే ఎదురైందని ఆమె గుర్తు చేసుకున్నారు.

పూజ జరుగుతున్న సమయంలో వచ్చి ఆటంకం కలిగించడమే కాకుండా, వేలల్లో, లక్షల్లో డబ్బులు డిమాండ్ చేయడం ఎంతవరకు సమంజసమని అరియానా ప్రశ్నించారు. ఇంటి గుమ్మంపై నంబర్లు వేసి వెళ్లడం, “ఇప్పుడు ఇవ్వకపోతే మా వాళ్లు వస్తారు, మాకు కమిషన్ దక్కదు” అంటూ అప్పుల వాళ్లలాగా ఒత్తిడి తీసుకురావడం తీవ్ర మానసిక క్షోభకు గురిచేస్తోందని పేర్కొన్నారు. ఎంతో పవిత్రంగా, బంధుమిత్రుల మధ్య దైవపూజ జరుపుకుంటున్న వేళ ఇలాంటి బలవంతపు వసూళ్లు మంచి వాతావరణాన్ని చెడగొడతాయని, అది ఒక రకమైన నెగెటివ్ వైబ్స్ మిగులుస్తుందని తెలిపారు. తమ ఆశీర్వాదం ఇవ్వాలనుకుంటే సంతోషంగా ఇవ్వాలి కానీ, ఇలా డిమాండ్లు చేసి లాక్కోవడం సరైంది కాదన్నారు. ఎవరినీ కించపరచడం లేదా నొప్పించడం తన ఉద్దేశం కాదని స్పష్టం చేసిన అరియానా, సమాజంలో కష్టపడి గౌరవంగా జీవించే మార్గాలు ఎన్నో ఉన్నాయని, ఇతరుల బలహీనతను లేదా శుభకార్యాల సందర్భాన్ని ఆసరాగా చేసుకుని ఇలా ఇబ్బంది పెట్టడం ఆపాలని తన అభిప్రాయాన్ని కుండబద్దలు కొట్టారు. ఆమె వ్యక్తపరిచిన ఈ అభిప్రాయానికి ఎంతో మంది నెటిజన్లు కూడా మద్దతు తెలుపుతూ తమ అనుభవాలను పంచుకుంటున్నారు.