Ameer Log: హైదరాబాదీ బిర్యానీ ఘుమఘుమలతో ‘అమీర్ లోగ్’!

‘అవ్వల్ నంబర్ ప్రొడక్షన్స్’ బ్యానర్‌పై మాధవి రెడ్డి సోమ నిర్మించిన తాజా చిత్రం ‘అమీర్ లోగ్’. రమణా రెడ్డి సోమ దర్శకత్వం వహించిన ఈ చిత్రానికి మనోహర్ రెడ్డి మంచురి సహ నిర్మాతగా వ్యవహరించారు. MC హరి, మనోజ్, శశిధర్ ప్రధాన పాత్రల్లో నటించగా.. వేధా జలంధర్, రావణ్ నిట్టూరు, విశ్వేందర్ రెడ్డి, సాయోగి కీలక పాత్రలు పోషించారు. రానా దగ్గుబాటి సమర్పణలో ‘స్పిరిట్ మీడియా’ ద్వారా ఈ మూవీ ఆగస్ట్ 21న థియేటర్లలో గ్రాండ్‌గా విడుదలవుతోంది. ఈ సందర్భంగా చిత్ర విశేషాలు, మేకింగ్ అనుభవాలను లీడ్ యాక్టర్స్ MC హరి, మనోజ్, శశిధర్ మీడియాతో పంచుకున్నారు.

సినిమా సహజత్వానికి దగ్గరగా ఉండేందుకు సింక్ సౌండ్‌లో చిత్రీకరించారు. విమానం లేదా ఏసీ సౌండ్ లాంటి చిన్న శబ్దం వచ్చినా టేక్ ఆపేసేవారమని, కేవలం 5 శాతం రోడ్ సీన్లకు మాత్రమే డబ్బింగ్ చెప్పామని తెలిపారు.  సినిమా మొత్తం సహజమైన లొకేషన్లలో, దర్శకుడి అత్తగారి ఊరు/బస్తీలోనే షూటింగ్ జరిపారు. కథలోని పాత్రలు నిజ జీవితానికి చాలా దగ్గరగా ఉంటాయి. ఈ కథ బిర్యానీ అనే పాయింట్ చుట్టూనే తిరుగుతుంది. “ఫస్ట్ హాఫ్‌లో బిర్యానీ వాసన వస్తే.. సెకండాఫ్‌లో టేస్ట్ తెలుస్తుంది.. క్లైమాక్స్‌కి వెళ్లేసరికి కడుపు నిండిన ఫీలింగ్ వస్తుంది” అని సరదాగా వివరించారు. షూటింగ్ సమయంలో ఓ క్లౌడ్ కిచెన్ పెట్టి యూనిట్ అందరికీ అక్కడే భోజనాలు సిద్ధం చేశారట. స్క్రీన్‌పై ముగ్గురు హీరోలు ప్రధానంగా కనిపించినప్పటికీ, కథలో తల్లి, అక్క, వదిన, పక్కింటి పాత్రల వంటి మహిళా పాత్రలే అత్యంత కీలకంగా ఉంటాయని వెల్లడించారు.

సినిమా ఫుటేజ్ చూసిన రానా దగ్గుబాటి బృందం మొదట హైదరాబాద్ మార్కెట్‌పై ప్రత్యేక దృష్టి పెట్టి, ఆ తర్వాత అన్ని ప్రాంతాల్లో ప్రమోషన్లు విస్తరించాలని సూచించినట్లు పేర్కొన్నారు. స్మరణ్ అందించిన పాటలు, బ్యాక్‌గ్రౌండ్ స్కోర్ (RR) చిత్రానికి ప్రాణంగా నిలిచాయని కొనియాడారు. హైదరాబాదీ యాస, సంస్కృతి, సహజ సిద్ధమైన హిందీ-ఉర్దూ పదాల కలయికతో రూపొందినప్పటికీ.. కథలోని బలమైన ఎమోషన్స్ భాషతో సంబంధం లేకుండా ప్రతి ఒక్కరికీ కనెక్ట్ అవుతాయని నటీనటులు ధీమా వ్యక్తం చేశారు.