Suriya: ‘జై భీమ్’ కేసులో సంచలన తీర్పు ఇచ్చిన మద్రాస్ హైకోర్టు

Suriya: కోలీవుడ్ స్టార్ హీరో సూర్యకు మద్రాస్ హైకోర్టులో ఊరట లభించింది. సూర్య నటించిన జై భీమ్ చిత్రంలోని కొన్ని సన్నివేశాలు తమ కులాన్ని అవమానించేలా ఉన్నాయని వన్నియార్ సామాజిక వర్గానికి చెందిన కొందరు 2021 లో న్యాయస్థానాన్ని ఆశ్రయించిన విషయం విదితమే. తమ కులాన్ని అవమానించిన సూర్య, జ్యోతిక, డైరెక్టర్ జ్ఞానవేల్ రాజాపై వారు కేసు నమోదు చేసి కోర్టు వరకు వెళ్లారు. ఈ కేసులో వారిపై కఠిన చర్యలు తీసుకోవాలని వన్నియార్ సామాజిక వర్గానికి చెందిన వారు కోర్టును కోరారు. ఇక ఈ కేసుపై విచారణ జరిపిన చెన్నై కోర్టు సూర్య, జ్యోతిక, డైరెక్టర్ జ్ఞానవేల్ రాజాను విచారణకు హాజరు కావాలని, లేని యెడల వారిపై అరెస్ట్ వారెంట్ జారీ చేయబడుతుందని ఆదేశాలు జారీ చేశారు. అయితే చెన్నైలోని వేలచేరి పోలీస్ స్టేషన్‌లో తమపై నమోదైన ఫస్ట్ ఇన్ఫర్మేషన్ రిపోర్ట్ (ఎఫ్‌ఐఆర్)ని కొట్టివేయాలని జ్ఞానవేల్ మద్రాస్ హైకోర్టులో ఉమ్మడి పిటిషన్ దాఖలు చేశారు.

ఇక తాజాగా నేడు ఈ కేసుపై విచారణ జరిపిన మద్రాస్ హైకోర్టు సూర్యకు అనుకూలంగా తీర్పునిచ్చింది. ఈ కేసులో బాధితులు తెలిపినట్లు చిత్ర బృందంపై కఠిన చర్యలు తీసుకోవాల్సిన అవసరం లేదని చెప్పుకొచ్చింది. చిత్రంలో వన్నియార్ సంఘానికి సంబందించిన పేర్లను వాడలేదని, ఆ పేర్లు సాధారణమైనవే అని తేల్చి చెప్పింది. పిటిషనర్లు ప్రార్థించిన విధంగా కేసు నమోదుకు అనుగుణంగా తదుపరి అన్ని చర్యలను నిలిపివేయాలని తెలుపుతూ తీర్పు నిచ్చింది. దీంతో సూర్యకు ఈ కేసులో ఊరట లభించిందని తెలుస్తోంది. మరి ఈ విషయమై ఇప్పటికైనా సూర్య నోరు విప్పుతాడా..? లేదా అనేది తెలియాల్సి ఉంది. ఇకపోతే ప్రస్తుతం సూర్య- బాల కాంబోలో వస్తున్న అచలుడు అనే చిత్రంలో నటిస్తున్నాడు. ఈ చిత్రంలో కూడా కొంత దళిత సమస్యలు ఉంటాయని టాక్ నడుస్తోంది. మరి ఈ సినిమా కూడా మరో వివాదానికి దారి తీస్తుందేమో చూడాలి.