కరోనా కారణంగా మనుషుల మధ్య దూరం పెరిగినా, మనసులు దగ్గరై ముమ్మరంగా మనువులు జరుగుతున్నాయి. అందుకు ఉదాహరణగా టాలీవుడ్, బాలీవుడ్ లో జరిగిన పలు వెడ్డింగ్స్ గురించి చెప్పుకోవచ్చు. ఇందులో సెకండ్‌ మ్యారేజెస్ కూడా ఉన్నాయి సుమా! అంతేకాదు… గతంలో పెళ్ళిళ్ళు చేసుకున్న జంటలు పేరెంట్స్ గానూ ఈ యేడాది ప్రమోషన్ కొట్టేశారు.
కొత్త సంవత్సరం ప్రారంభంలోనే బాలీవుడ్ రచయిత్రి కనికా థిల్లాన్‌, ఫిల్మ్ రైటర్‌ హిమాన్షు శర్మను జనవరి 5న వివాహం చేసుకుంది. విశేషం ఏమంటే… గతంలో ఆమె దర్శకులు కె. రాఘవేంద్రరావు తనయుడు కోవెలమూడి సూర్య ప్రకాశ్‌ ను వివాహమాడి, ఆ పైన విడాకులు ఇచ్చేసింది.
జనవరి 7వ తేదీ నటి ఆనంది కోలీవుడ్ కు చెందిన సహాయ దర్శకుడు సోక్రటీస్‌ ను వరంగల్ లో పెళ్ళాడింది. తెలుగు అమ్మాయి అయిన ఆనంది ‘బస్టాప్‌, ప్రియతమా నీవచట కుశలమా, గ్రీన్ సిగ్నల్’ వంటి చిత్రాలలో నటించింది. ఆపైన కోలీవుడ్ లో నటిగా బిజీ అయ్యింది. ఈ యేడాది తెలుగులో ఆనంది ‘జాంబిరెడ్డి, శ్రీదేవి సోడా సెంటర్‌’ చిత్రాలలో నాయికగా నటించింది.
ప్రముఖ గాయని, డబ్బింగ్ ఆర్టిస్ట్ సునీత, మ్యాంగో మీడియా అధినేత రామ్‌ వివాహం హైదరాబాద్‌లో జనవరి 9వ తేదీన జరిగింది. వీరిద్దరికీ ఇది రెండో పెళ్ళి!
బాలీవుడ్ యంగ్ హీరో వరుణ్ ధావన్‌ వివాహం అతని స్నేహితురాలు నటాషా దలాల్ తో జనవరి 14న ముంబైలోని ఓ రిసార్ట్ లో జరిగింది.
ప్రముఖ నిర్మాత ఎమ్మెస్ రాజు కుమారుడు, యంగ్ హీరో సుమంత్ అశ్విన్‌ వివాహం దీపికతో హైదరాబాద్ శివార్లలోని ఫామ్‌ హౌస్ లో ఫిబ్రవరి 13న జరిగింది.
హైదరాబాదీ మహిళ, బాలీవుడ్ బ్యూటీ దియామీర్జా వివాహం ఫిబ్రవరి 15న వ్యాపారవేత్త వైభవ్ రేఖీతో జరిగింది. ‘చెలి’ హిందీ రీమేక్‌ ‘రెహనా హై తేరే దిల్ మే’తో హీరోయిన్ గా ఎంట్రీ ఇచ్చిన దియా మీర్జా గతంలో సహిల్‌ సంఘా ను వివాహం చేసుకుంది. 11 సంవత్సరాల తర్వాత వారు 2019లో విడాకులు తీసుకున్నారు.
ప్రముఖ బ్యాడ్మింటన్‌ క్రీడాకారిణి గుత్తా జ్వాల, తమిళ నటుడు విష్ణు విశాల్‌ ను హైదరాబాద్‌లో ఏప్రిల్ 22న వివాహం చేసుకుంది. గుత్తా జ్వాల ‘గుండెజారి గల్లంతయ్యింది’ చిత్రంలో ఐటమ్‌ సాంగ్‌ చేయగా, విష్ణు విశాల్‌ ఈ యేడాది విడుదలైన రానా ‘అరణ్య’ చిత్రంలో కీలక పాత్ర పోషించాడు. వీరిద్దరికీ ఇది రెండో పెళ్ళి.
‘అదిరింది, విజిల్‌, క్రాక్‌’ తదితర చిత్రాలకు సినిమాటోగ్రఫీ అందించిన జి.కె. విష్ణు వివాహం చెన్నయ్ లోని ఇస్కాన్‌ టెంపుల్ లో ఏప్రిల్ 25న సి. మహాలక్ష్మితో జరిగింది.
బాలీవుడ్ దర్శకుడు ఆనంద్‌ తివారి, నటి అంగీరాధర్‌ వివాహం ఏప్రిల్ 30న నిరాడంబరంగా జరిగింది. ‘లవ్‌ ఫర్‌ స్క్వేర్‌ ఫూట్’ మూవీలో కలిసి పనిచేసినప్పుడు వీరి మధ్య ప్రేమ చిగురించింది. ఆనంద్‌ తివారి ‘కైట్స్, ఉడాన్‌, గో… గోవా… గాన్‌’లో నటించగా అంగీరాధర్‌ ‘కమాండో -3’, ‘బ్యాంగ్‌ బాజా బారాత్‌’లో నటించింది.
ప్రముఖ కథానాయిక ప్రణీత సుభాష్‌ వివాహం మే 30న బెంగళూరుకు చెందిన వ్యాపారవేత్త నితిన్‌ రాజుతో జరిగింది. ప్రణీత పలు తెలుగు చిత్రాలలో కథానాయికగా నటించింది. ‘అత్తారింటికి దారేదీ’ మూవీ ఆమెకు తెలుగులో మంచి గుర్తింపు తెచ్చిపెట్టింది.
తెలుగుతో పాటు పలు హిందీ చిత్రాలలో నాయికగా నటించిన యామి గౌతమ్ వివాహం, బాలీవుడ్ దర్శకుడు, ‘ఉరి: ది సర్జికల్ స్ట్రైక్’ ఫేమ్‌ ఆదిత్య ధర్‌ తో జూన్ 4న జరిగింది.
ప్రముఖ నటుడు అనిల్ కపూర్ కుమార్తె, నిర్మాత రియా కపూర్, తన చిరకాల మిత్రుడు కరణ్ బులానీని ఆగస్ట్ 14న వివాహం చేసుకుంది. దాదాపు పుష్కర కాలంగా వారు సహజీవనం చేస్తుండటం విశేషం.
నటుడు, జబర్దస్త్ కమెడియన్‌ ముక్కు అవినాశ్‌ వివాహం అతని స్నేహితురాలు అనూజా వాకిటితో అక్టోబర్ 20న జరిగింది. అదే రోజున హాస్య నటుడు, యూట్యూబర్‌ వైవా హర్ష వివాహం అక్షర రేసుతో జరిగింది.
దాదాపు 11 సంవత్సరాల డేటింగ్ కు ఫుల్ స్టాప్ పెట్టి ప్రముఖ బాలీవుడ్ హీరో రాజ్ కుమార్ రావ్ తన గర్ల్ ఫ్రెండ్‌ పత్రలేఖ ను చండీఘర్ లో నవంబర్ 15న పెళ్ళి చేసుకున్నాడు.
.jpg)
యంగ్ హీరో, ‘ఆర్.ఎక్స్.100’ ఫేమ్‌ కార్తికేయ వివాహం ప్రియురాలు లోహితతో హైదరాబాద్ లో నవంబర్ 21న జరిగింది. వీరిద్దరూ కలిసి 2010లో వరంగల్ నిట్‌ లో కలిసి చదువుకున్నారు.
ఎంతో కాలంగా ఎప్పుడెప్పుడా అని అభిమానులు ఎదురుచూస్తున్న బాలీవుడ్ స్టార్ హీరోయిన్ కత్రినా కైఫ్ వివాహం హీరో విక్కీ కౌశల్ తో డిసెంబర్ 9న రాజస్థాన్ లోని బర్వారా లోని సిక్స్ సెన్సెన్స్ ఫోర్ట్ లో జరిగింది.
మాతృత్వ మధురిమల ఆస్వాదనలో…
బాలీవుడ్ స్టార్ హీరోయిన్ అనుష్క శర్మ, స్టార్ క్రికెటర్ విరాట్ కొహ్లీకి జనవరి 11న కూతురు జన్మించింది. ఆ చిన్నారికి వామిక అనే పేరు పెట్టారు.
తెలుగులో పలు చిత్రాలలో నటించిన ‘నువ్వు-నేను’ ఫేమ్‌ అనిత హిందీలో పలు సీరియల్స్ లో నటించింది. ఆరేళ్ళ క్రితం ఆమెకు వ్యాపారవేత్త రోహిత్‌ రెడ్డితో వివాహం జరిగింది. ఆ దంపతులకు ఫిబ్రవరి 9న మగబిడ్డ జన్మించాడు.
బాలీవుడ్ స్టార్ హీరోయిన్ కరీనా కపూర్, నటుడు సైఫ్‌ అలీఖాన్‌ కు మరోసారి ఫిబ్రవరి 21న మగబిడ్డ పుట్టాడు. గతంలో పుట్టిన బాబుకు తైమూర్ అనే పేరు పెట్టిన వీరు, తాజా సంతానానికి జహంగీర్ అనే పేరు పెట్టారు.
ఈ యేడాది ఫిబ్రవరి 15న వైభవ్ రేఖీని వివాహమాడిన దియా మీర్జా మే 14న ఓ మగబిడ్డకు జన్మనిచ్చింది. అతనికి అవ్యాన్‌ ఆజాద్‌ రేఖీ అనే పేరు పెట్టారు.
మే 22న ప్రముఖ గాయని శ్రియా ఘోషల్‌ మగబిడ్డకు జన్మనిచ్చింది. 2015లో శైలాదిత్య ముఖోపాధ్యాయతో ఆమెకు వివాహం జరిగింది.
నటి రిచా గంగోపాధ్యాయ, జో లాంగెల్లా దంపతులకు మే 27న మగబిడ్డ జన్మించాడు. పలు తెలుగు చిత్రాలలో నటించిన రిచా వివాహం జో తో 2019లో జరిగింది.
కోలీవుడ్ తో పాటు పలు టాలీవుడ్ చిత్రాలలో నటించిన మహత్ రాఘవేంద్ర కు జూన్ 7న కొడుకు పుట్టాడు.
హీరో ఆర్య, హీరోయిన్ సాయేషా సైగల్‌ దంపతులకు జూలై 23న ఆడపిల్ల జన్మించింది. వీరిద్దరి ప్రేమ వివాహం 2019లో పెద్దల అంగీకారంతో హైదరాబాద్ లో జరిగింది.
అక్టోబర్ 3 వ తేదీ బాలీవుడ్ తో పాటు టాలీవుడ్ లోనూ పలు చిత్రాలలో నటించిన నేహా ధూపియా, అంగద్‌ బేడీ దంపతులకు కొడుకు పుట్టాడు.
నటి ప్రీతిజింతా సరొగసి ద్వారా కవలలకు జన్మనిచ్చింది. ఈ విషయాన్ని నవంబర్ 18న ఆమె భర్త్ జీన్‌ గుడెనఫ్ తెలిపారు. పిల్లలు జియా, జై అనే పేర్లు పెట్టినట్టు ప్రకటించాడు.
