Eating Rice: సాధారణంగా మనం అన్నం తిన్న వెంటనే నిద్ర వస్తుందనే వ్యక్తుల్ని చూస్తుంటాం. ఇది మనకు కూడా ఒక్కో సందర్భంలో అనుభవంలోకి వచ్చే ఉంటుంది. అన్నం తిన్న వెంటనే కళ్లకు భారం అనిపించడం, పనిచేయాలనే ఉత్సాహం తగ్గడం, అలసటగా అనిపించడం వంటి లక్షణాలు కనిపిస్తాయి. సాధారణంగా తిన్న వెంటనే శక్తి అందాలి కానీ, అలసట ఎందుకు వస్తుందని సాధారణంగా అందర్ని వేధించే ప్రశ్న. దీని వెనకు చాలా పెద్ద సైన్స్ దాగి ఉంది.
సాధారణంగా తెల్లని బియ్యంతో వండిన అన్నం తిన్న వెంటనే మన శరీరంలో మెటబాలిజం ఒక్కసారిగా ఒత్తిడిని ఎదుర్కొంటుంది. తెల్ల బియ్యానికి ‘‘గ్లైసిమిక్ ఇండెక్స్’’ చాలా ఎక్కువ. దీంతో ఇది త్వరగా జీర్ణమై, రక్తంలో గ్లూకోజ్గా మారి షుగర్ లెవల్స్ను ఒక్కసారిగా పెంచుతాయి. దీనిని బ్యాలెన్స్ చేయడానికి ఇన్సులిన్ కూడా పెరుగుతుంది. ప్రారంభంలో ఇది శక్తిని అందిస్తుంది, కానీ కొంత సమయం తర్వాత, ఈ శక్తి అకస్మాత్తుగా తగ్గిపోతుంది. అందుకే చాలా మంది అలసటగా, నిద్రమత్తుగా భావిస్తారు. ఇది శరీరంలో త్వరగా జీర్ణమై, రక్తంలో చక్కెరను వేగంగా పెంచుతుంది. చక్కెర స్థాయిలు వేగంగా పెరిగిన తర్వాత పడిపోయినప్పుడు, శరీరం నీరసంగా అనిపించవచ్చు.
ఈ ప్రక్రియలో ట్రిప్టోఫాన్ అనే అమైనో యాసిడ్ మెదడుకు ఎక్కువగా చేరుతుంది. ఇది సెరోటినిన్, మెలటోనిన్ వంటి హార్మోన్లను ఉత్పత్తి చేస్తుంది. ఈ హార్మోన్లు మన మానసిక స్థితి, నిద్రను నియంత్రిస్తుంటాయి. అందుకే అన్నం తిన్న తర్వాత విశ్రాంతి తీసుకోవాలనిపించడం, నిద్ర పోవాలని అనిపించడం జరుగుతుంది.
ఒకేసారి ఎక్కువ పరిమాణంలో అన్నం తినడం, హెవీ మీల్స్ తీసుకోవడం మన జీర్ణ వ్యవస్థపై అదనపు భారం పెడుతుంది. దీంతో ఎక్కువ శక్తిని జీర్ణక్రియ కోసం వినియోగించి అలసట ఏర్పడుతుంది. ఈ సమస్యను తగ్గించుకోవాలంటే మితంగా అన్నం తీసుకోవాలి. ప్రొటీన్ ఫుడ్ అంటే ఎగ్స్, చికెన్, పనీర్, పప్పులు ఆహారంలో భాగంగా ఉండాలి. దీంతో పాటు ఫైబర్ రిచ్ ఫుడ్ ఉండేలా చూసుకోవాలి. అన్నం తిన్న 10-15 నిమిషాల తర్వాత 15-30 నిమిషాలు నడవడం మంచిదని వైద్యులు చెబుతుంటారు.