Tattoo Safety Tips: టాటూ వేయించుకుంటున్నారా?.. ముందు ఈ విషయాలు తెలియకపోతే రిస్కే..!

Tattoo Safety Tips: టాటూ వేయించుకోవడం చాలామందికి జీవితంలో ఒక ప్రత్యేక అనుభవం.. ఇప్పుడు టాటూ కూడా ఓ ఫ్యాషన్‌ అయిపోయింది.. చిన్న టాటూ వేయించుకునేవారు కొందరైతే.. తమ చేతులు, మెడ, శరీరంపై పెద్ద పెద్ద టాటూలు వేయించుకునేవారు ఎంతో మంది ఉన్నారు.. ఇక, తమకు నచ్చిన డిజైన్‌ను ఎంచుకోవడానికి గంటల తరబడి సమయం కేటాయిస్తారు. అయితే టాటూ అందంగా ఉండటంతో పాటు, దానిని వేయించే స్టూడియోలో పరిశుభ్రత, భద్రతా ప్రమాణాలు పాటిస్తున్నారా లేదా అనేది కూడా అంతే ముఖ్యమని నిపుణులు చెబుతున్నారు.

టాటూ వేయించే ముందు తెలుసుకోవాల్సిన అంశాలు ఇవే..

* టాటూ వేయించే ముందు ఉపయోగించే సూది (నీడిల్) పూర్తిగా కొత్తదేనా, సీల్ చేసిన ప్యాక్‌ను మీ ముందే తెరిచారా అనే విషయాన్ని తప్పకుండా పరిశీలించాలి. అలాగే సూది గడువు తేదీ (ఎక్స్‌పైరీ డేట్) కూడా చూసుకోవడం మంచిది. వాడిన సూదులను మళ్లీ ఉపయోగించడం తీవ్రమైన ఇన్ఫెక్షన్లకు దారితీయొచ్చు.

* టాటూ వేస్తున్న ఆర్టిస్ట్ కొత్త డిస్పోజబుల్ గ్లౌజ్‌లు ధరించి ఉండాలి. ఒకవేళ స్టెరైల్ కాని వస్తువులను తాకితే వెంటనే గ్లౌజ్‌లను మార్చి తిరిగి పని ప్రారంభించాలి. ఈ చిన్న జాగ్రత్తలు కూడా బ్యాక్టీరియా, వైరస్‌ల ద్వారా వచ్చే ఇన్ఫెక్షన్ల ప్రమాదాన్ని గణనీయంగా తగ్గిస్తాయి.

* టాటూ మెషీన్లు, ఇంక్ బాటిళ్లు, పని చేసే టేబుల్ వంటి పరికరాలు ప్రతి కస్టమర్‌కు ముందు శుభ్రపరిచి, అవసరమైన రక్షణ కవర్లతో సిద్ధం చేసి ఉండాలి. ఇంక్‌ను ఎప్పుడూ సింగిల్-యూజ్ ఇంక్ క్యాప్‌లలో మాత్రమే పోయాలి. మిగిలిపోయిన ఇంక్‌ను తిరిగి ఉపయోగించకుండా పారేయడం అత్యంత అవసరం.

* టాటూ వేయించే ముందు చర్మాన్ని కూడా సరిగ్గా సిద్ధం చేయాలి. ఆ భాగంలో వెంట్రుకలు ఉంటే కొత్త డిస్పోజబుల్ రేజర్‌తో తొలగించి, చర్మాన్ని పూర్తిగా శుభ్రం చేయాలి. ఇలా చేయడం వల్ల చర్మం చికాకు, ఇన్ఫెక్షన్, గాయం నెమ్మదిగా మానడం వంటి సమస్యలను నివారించవచ్చు.

టాటూ వేసిన తర్వాత జాగ్రత్తలు

టాటూ వేయించిన తర్వాత కూడా జాగ్రత్తలు కొనసాగించాలి. మంచి టాటూ ఆర్టిస్ట్ తప్పనిసరిగా ఆఫ్టర్‌కేర్ సూచనలు ఇవ్వాలి. గాయాన్ని ఎలా శుభ్రంగా ఉంచాలి, ఎలాంటి క్రీమ్ వాడాలి, ఎంతకాలం నీటికి దూరంగా ఉంచాలి వంటి విషయాలను వివరంగా తెలుసుకోవాలి. ఇవి టాటూ త్వరగా మానడానికి, రంగు ఎక్కువకాలం అందంగా ఉండేందుకు సహాయపడతాయి. ఏదైనా విషయంలో అనుమానం కలిగితే ప్రశ్నలు అడగడానికి వెనుకాడకూడదని నిపుణులు సూచిస్తున్నారు. పరిశుభ్రత, భద్రత విషయంలో రాజీ పడకుండా వ్యవహరించే స్టూడియోనే ఎంచుకోవడం ఉత్తమం. ఎందుకంటే టాటూ జీవితాంతం శరీరంపై ఉంటుంది. కాబట్టి డిజైన్ ఎంత ముఖ్యమో, భద్రత కూడా అంతే ముఖ్యమని నిపుణులు స్పష్టం చేస్తున్నారు.