Kitchen Hacks : మహారాష్ట్ర లాంటి రాష్ట్రాల్లో ప్రతిరోజూ భోజనంలో చపాతీ లేదా భాక్రీ ఉండాల్సిందే. మన వద్ద కూడా మధ్యాహ్నం లేదా రాత్రి వేళల్లో వేడివేడిగా, దూది లాంటి మెత్తటి చపాతీలను తినడానికి చాలామంది ఇష్టపడతారు. అయితే, ఇంట్లో ఉదయం చేసిన చపాతీలు మధ్యాహ్నానికి లేదా సాయంత్రానికి ఎండిపోయినట్లుగా గట్టిపడిపోవడం, రుచి మారిపోవడం చాలామంది ఎదుర్కొనే సాధారణ సమస్య. హోటళ్లలో లభించేలా మెత్తగా, ఉబ్బిన చపాతీలను ఇంట్లోనే సులభంగా తయారు చేయడానికి కొన్ని చిన్నపాటి చిట్కాలు, సైంటిఫిక్ పద్ధతులు పాటిస్తే సరిపోతుంది.
సరైన పిండి ఎంపిక, కలుపుకునే విధానం : మెత్తటి చపాతీల తయారీలో పిండి ఎంపికే మొదటి మెట్టు. మార్కెట్లో దొరికే ప్యాక్ చేసిన పిండి కంటే, మిల్లులో అప్పుడే పట్టించిన తాజా గోధుమ పిండిని వాడటం మంచిది. ప్యాక్ చేసిన పిండిలో గ్లూటెన్ స్థాయిలు తగ్గడం వల్ల చపాతీలు సరిగ్గా పొంగవు.
గోరువెచ్చని నీరు: పిండిని కలపడానికి చల్లటి నీటికి బదులు గోరువెచ్చని నీటిని ఉపయోగించాలి. నీటిని ఒకేసారి పోయకుండా కొద్దికొద్దిగా కలుపుతూ ఉంటే పిండి అనువుగా, మెత్తగా మారుతుంది.
నానబెట్టడం: పిండి కలిపిన వెంటనే చపాతీలు రుద్దకూడదు. పిండి ముద్దపై తడి గుడ్డను కప్పి 5 నుండి 10 నిమిషాల పాటు పక్కన పెట్టాలి. దీనివల్ల పిండిలో ఈస్ట్ క్రియాశీలకమై, చపాతీలు తేలికగా, మెత్తగా వస్తాయి.
పాలు లేదా పెరుగు: పిండి కలిపేటప్పుడు కొద్దిగా పాలు లేదా ఒక చెంచా పెరుగు చేర్చడం వల్ల చపాతీలు ఎక్కువ సమయం పాటు తమ మృదుత్వాన్ని కోల్పోవు.
శాస్త్రీయ రహస్యం.. ఉప్పు, పంచదార కలపడం
ఆహార శాస్త్రం (Food Science) ప్రకారం, పిండిని కలిపేటప్పుడు చిటికెడు ఉప్పు, కొద్దిగా పంచదార లేదా నూనె కలపడం వల్ల అద్భుతమైన ఫలితం ఉంటుంది. ఉప్పు గోధుమ పిండిలోని ‘గ్లూటెన్ ప్రోటీన్ నెట్వర్క్’ను బలపరిచి పిండికి మంచి సాగే గుణాన్ని ఇస్తుంది. అదే సమయంలో కొద్దిగా పంచదార, కొవ్వు పదార్థాలు (నూనె/నెయ్యి) కలపడం వల్ల చపాతీ ఆకృతి మరింత మృదువుగా మారి, కాల్చిన తర్వాత కూడా గట్టిపడకుండా ఉంటుంది.
చపాతీ రుద్దేటప్పుడు, కాల్చేటప్పుడు వహించాల్సిన జాగ్రత్తలు
చపాతీలు చేసేటప్పుడు పిండి ఉండను మరీ పెద్దదిగా కాకుండా, చిన్నదిగా కాకుండా మధ్యస్థంగా తీసుకోవాలి. చపాతీ రుద్దే సమయంలో పొడి పిండిని ఎక్కువగా వాడకూడదు. పొడి పిండి ఎక్కువైతే కాల్చేటప్పుడు చపాతీ గట్టిపడిపోయి, త్వరగా మాడిపోతుంది.
చపాతీని ఒత్తేటప్పుడు మధ్య భాగం మందంగా ఉండకుండా, అన్ని వైపులా సమానంగా, అంచులు పలుచగా ఉండేలా చూడాలి. పెనంపై చపాతీని కాల్చి తీసిన వెంటనే కొద్దిగా నెయ్యి లేదా నూనె రాస్తే అది ఎక్కువ సమయం వరకు మెత్తగా ఉంటుంది.
మిగిలిన పిండిని భద్రపరచడం ఎలా?
ఒకవేళ కలిపిన చపాతీ పిండి మిగిలిపోయి ఫ్రిజ్లో ఉంచాల్సి వస్తే, దానిని గాలి చొరబడని (Airtight) డబ్బాలో భద్రపరచడం ఉత్తమం. దీనివల్ల పిండికి గాలి తగలకుండా నల్లబడకుండా ఉంటుంది. ఈ పిండితో తర్వాత చేసినా చపాతీలు ఎంతో మృదువుగా వస్తాయి.