Cinnamon Plant: మార్కెట్ దాల్చిన చెక్కకు గుడ్ బై.. ఇంట్లోని కుండీలోనే సులువుగా పెంచేయండిలా..

Cinnamon Plant: మార్కెట్లో దొరికే లావుపాటి దాల్చిన చెక్కను కొనడం మానేయండి. ఇంట్లోని కుండీలోనే సన్నగా, మంచి సువాసనలు వెదజల్లే దాల్చిన చెక్కను సులువుగా పెంచుకోవచ్చు. మన వంటింట్లో రకరకాల మసాలా దినుసులు తప్పనిసరిగా వాడుతుంటాం. బిర్యానీ ఆకు నుంచి జీలకర్ర, వాము వరకు ప్రతిదీ వంట రుచిని పెంచడంలో కీలక పాత్ర పోషిస్తాయి. అందుకే చాలామంది వీటిని నేరుగా మార్కెట్ నుంచే తెచ్చుకుంటూ ఉంటారు. అందులో దాల్చిన చెక్క కూడా ఒకటి. టీ రుచిని మార్చాలన్నా, కూరలు లేదా పులావ్‌కు మంచి సువాసన రావాలన్నా దాల్చిన చెక్కను వాడుతుంటాం. అయితే, మనం మార్కెట్ నుంచి తెచ్చుకునే ఈ దాల్చిన చెక్కను మన ఇంటి గెలాటరీలో లేదా బాల్కనీలోనే పెంచుకోవచ్చని ఎప్పుడైనా అనుకున్నారా? దాల్చిన చెక్క కేవలం మసాలా డబ్బాలకే పరిమితం కాదు. దీని మొక్క ఇంటికి పచ్చదనాన్ని ఇవ్వడంతో పాటు మీ గార్డెన్‌ను ఎంతో అందంగా మారుస్తుంది. మీకు గార్డెనింగ్ మీద ఆసక్తి ఉండి, ఇంట్లోనే మసాలా మొక్కలను పెంచాలనుకుంటే దాల్చిన చెక్క మొక్క మంచి ఛాయిస్ అవుతుంది. కాకపోతే దీనిని ఎలా పెంచాలనే సరైన విధానం తెలిసి ఉండాలి. ఈ మొక్క ప్రత్యేకత ఏంటంటే.. దాల్చిన చెక్క అనేది చెట్టు బెరడు నుంచి వస్తుంది. ఇంట్లోనే దాల్చిన చెక్క మొక్కను ఎలా పెంచాలి, దానిని ఎలాంటి జాగ్రత్తలతో సంరక్షించాలనే విషయాలు తెలుసుకుందాం.

దాల్చిన చెక్క మొక్కను కుండీలో లేదా గార్డెన్‌లో ఎక్కడ పెట్టాలి?
ఈ మొక్కకు వేడిగా, తేమగా ఉండే వాతావరణం చాలా ఇష్టం. రోజులో కనీసం ఆరు నుంచి ఎనిమిది గంటలపాటు మంచి ఎండ తగిలే చోట దీనిని ఉంచాలి. అయితే ఎండ తీవ్రత ఎక్కువగా ఉన్నప్పుడు చిన్న మొక్కను మధ్యాహ్నపు ఎండ నుంచి కొద్దిగా కాపాడుకోవడం మంచిది. మీ ఇంట్లో పెద్ద స్థలం లేదా తోట లేకపోయినా ఎలాంటి ఇబ్బంది లేదు. బాల్కనీలో లేదా మేడపై ఉండే పెద్ద కుండీలలో కూడా దీనిని సులభంగా పెంచుకోవచ్చు. మొక్క సరిగ్గా ఎదిగేందుకు తగిన స్థలం ఉండేలా చూసుకుంటే సరిపోతుంది. అలాగే చలికాలంలో అత్యధికంగా చలి ఉంటే మొక్కను కాస్త సురక్షితమైన ప్రదేశానికి మార్చాల్సి ఉంటుంది.

మొక్కకు ఎలాంటి మట్టి అవసరం?
ఏ మొక్క అయినా ఆరోగ్యంగా ఎదగాలంటే మట్టి చాలా ముఖ్యం. దాల్చిన చెక్క మొక్క కోసం ఎంచుకునే మట్టిలో నీరు అస్సలు నిలవకూడదు, అలాగే వేర్లకు గాలి ధారాళంగా అందాలి. దీనికోసం మట్టిలో తగినంత కంపోస్ట్ లేదా పశువుల ఎరువును కలపాలి. కుండీ కింద నీరు బయటకు పోయేలా రంధ్రాలు ఉండేలా చూసుకోవాలి. మట్టిలో ఎక్కువ కాలం నీరు నిలిచిపోతే వేర్లు కుళ్లిపోయే ప్రమాదం ఉంటుంది. అందుకే తేమను నిలుపుకుంటూ, అదనపు నీటిని వెంటనే బయటికి పంపే గుణం ఉన్న మట్టిని సిద్ధం చేసుకోవాలి.

విత్తనాల ద్వారా పెంచాలా లేక నర్సరీ నుంచి తేవాలా?
దాల్చిన చెక్క మొక్కను నాటడానికి మన ముందు రెండు మార్గాలున్నాయి. నేరుగా నర్సరీ నుంచి ఆరోగ్యకరమైన మొక్కను తెచ్చి కుండీలో పెట్టుకోవచ్చు లేదా విత్తనాల ద్వారా మొక్కను మొతికించుకోవచ్చు. మీరు ఇలాంటి మసాలా మొక్కలను పెంచడం ఇదే మొదటిసారైతే నర్సరీ నుంచి ఆరోగ్యంగా ఉన్న మొక్కను తెచ్చుకోవడం చాలా మంచిది. కుండీలో నాటడానికి సుమారు 18 నుంచి 24 అంగుళాలు వెడల్పు ఉన్న పెద్ద కుండీని ఎంచుకోవాలి. అప్పుడే మొక్క వేర్లు చక్కగా విస్తరించడానికి వీలవుతుంది. మొక్కను నాటేటప్పుడు వేర్లకు ఎలాంటి గాయాలు కాకుండా జాగ్రత్తపడాలి. ఆ తర్వాత మట్టిలో కొద్దిగా నీరు పోసి, మంచి వెలుతురు వచ్చే చోట కుండీని ఉంచాలి.

నీరు పోసేటప్పుడు ఎలాంటి పొరపాట్లు చేయకూడదు?
దాల్చిన చెక్క మొక్క సరిగ్గా పెరగడానికి మట్టిలో తేమ ఉండాలి కానీ, ప్రతిరోజూ మోతాదుకు మించి నీరు పోయకూడదని గుర్తుంచుకోవాలి. నీరు పోసే ముందు మట్టి పైపొరను ఒకసారి పరిశీలించాలి. మట్టి పొడిగా అనిపిస్తేనే నీరు పోయాలి. ఒకవేళ అది ఇప్పటికే తడిగా ఉంటే కొద్దిసేపు ఆగడం మంచిది. వేసవి కాలంలో అయితే మొక్కకు క్రమం తప్పకుండా నీరు అవసరం అవుతుంది, కానీ చలికాలంలో నీటి మోతాదును తగ్గించాలి. అన్నింటికంటే ముఖ్యంగా కుండీలో నీరు నిలవకుండా చూసుకోవాలి. లేదంటే వేర్లు కుళ్లిపోయే ప్రమాదం ఉంది.

చలికాలంలో మొక్కను ఎలా కాపాడుకోవాలి?
ఈ మొక్క వేడి, తేమతో కూడిన వాతావరణంలో అద్భుతంగా పెరుగుతుంది. దీనికి ఎక్కువ చలి అస్సలు నచ్చదు. కాబట్టి మీ ప్రాంతంలో విపరీతమైన చలి పడే సమయంలో కుండీని కాస్త వెచ్చగా, సురక్షితంగా ఉండే చోటికి మార్చుకోవాలి. ఎండ బాగా తగులుతూ, నేరుగా చల్లటి గాలి తగలకుండా ఉండే ప్రదేశంలో మొక్కను ఉంచాలి. దీనితో పాటు మొక్క ఆకులు, కొమ్మలను ఎప్పటికప్పుడు గమనిస్తూ ఉండాలి. ఏదైనా కొమ్మ ఎండిపోయినా లేదా బలహీనంగా కనిపిచినా శుభ్రమైన కత్తెరతో కట్ చేసి పారేయాలి. ఇలా చేయడం వల్ల మొక్క సంరక్షణ సులభమవుతుంది.

ఇంట్లో పెంచిన దాల్చిన చెక్క ఎప్పుడు చేతికి వస్తుంది?
ఇంట్లో దాల్చిన చెక్క మొక్కను నాటిన తర్వాత అత్యంత ముఖ్యమైనది ఓపిక. ఇది చాలా వేగంగా పెరిగే మొక్క కాదు. దీని నుంచి మనం ఉపయోగించుకునే ప్రధాన భాగం దాని బెరడే. దీని ద్వారానే దాల్చిన చెక్క స్టిక్స్ తయారవుతాయి. సాధారణంగా మొక్క బాగా పెరిగి కాపుకు రావడానికి లేదా బెరడు తీసుకోవడానికి కొన్ని సంవత్సరాల సమయం పడుతుంది. మీరు ఇంట్లో పెంచిన మొక్క నుంచి బెరడును పొందడానికి సుమారు రెండు నుంచి మూడేళ్లు లేదా అంతకంటే ఎక్కువ సమయమే పట్టవచ్చు. ఇది మొక్క రకం, వాతావరణం, మనం చేసే సంరక్షణ మీద ఆధారపడి ఉంటుంది. కాబట్టి చిన్న మొక్కగానే ఉన్నప్పుడే దాని నుంచి బెరడు తీయడానికి తొందరపడకూడదు. మొక్క పూర్తిగా అభివృద్ధి చెందిన తర్వాతే ఈ ఆలోచన చేయాలి.