Fridge Cleaning Tips: వేసవి కాలంలో ఫ్రిడ్జ్ వినియోగం ఎక్కువగా ఉంటుంది. ఆహారం త్వరగా పాడవకుండా ఉండేందుకు పాలు, కూరగాయలు, వండిన పదార్థాలు, పండ్లు ఇలా దాదాపు అన్నింటినీ ఫ్రిజ్లో నిల్వ చేస్తుంటారు. అయితే తరచుగా ఉపయోగించడం వల్ల ఫ్రిజ్లో ఆహార మరకలు, జిగురు, దుర్వాసనలు పేరుకుపోవడం సహజం. సరైన శుభ్రత లేకపోతే ఈ వాసనలు మరింత తీవ్రంగా మారి ఇబ్బంది కలిగిస్తాయి. అయితే, చాలామంది ఫ్రిజ్ ను శుభ్రం చేయడానికి ఖరీదైన క్లీనర్లు కొనుగోలు చేస్తుంటారు. కానీ ఇంట్లో సులభంగా లభించే కొన్ని పదార్థాలతోనే తక్కువ ఖర్చులో అద్భుతమైన నేచురల్ క్లీనింగ్ స్ప్రే తయారు చేసుకోవచ్చు. ఈ స్ప్రే కేవలం 5 నిమిషాల్లో ఫ్రిజ్లోని మురికిని తొలగించి, దుర్వాసనను కూడా దూరం చేస్తుంది.
ఇంట్లోనే ఫ్రిజ్ క్లీనింగ్ స్ప్రే ఎలా తయారు చేయాలి?
ఈ నేచురల్ ఫ్రిజ్ క్లీనర్ తయారు చేయడానికి ఎక్కువ పదార్థాలు అవసరం లేదు. ఇంట్లో ఉండే సాధారణ వస్తువులతోనే దీన్ని సులభంగా తయారు చేసుకోవచ్చు.
అవసరమైన పదార్థాలు:
* 1 కప్పు నీరు
* 1 కప్పు తెల్ల వెనిగర్
* 1 టేబుల్ స్పూన్ నిమ్మరసం
* ఒక స్ప్రే బాటిల్
ఈ పదార్థాలన్నింటినీ స్ప్రే బాటిల్లో వేసి బాగా కలిపితే మీ సహజ ఫ్రిజ్ క్లీనర్ సిద్ధమైనట్టే.
ఫ్రిజ్ను శుభ్రం చేసే సరైన విధానం
ముందుగా ఫ్రిజ్ ప్లగ్ను తీసివేసి, అందులో ఉన్న అన్ని వస్తువులను బయటకు తీయాలి. తర్వాత తయారు చేసుకున్న స్ప్రేను ఫ్రిజ్ అరలు, డ్రాయర్లు, గోడలపై సమంగా చల్లాలి. రెండు నిమిషాల పాటు అలాగే ఉంచితే మురికి మెత్తబడుతుంది. ఆ తర్వాత మైక్రోఫైబర్ గుడ్డ లేదా శుభ్రమైన కాటన్ గుడ్డతో ఫ్రిజ్ను పూర్తిగా తుడవాలి. ఇలా చేయడం వల్ల మరకలు తొలగిపోవడంతో పాటు ఫ్రిజ్ తాజాగా మెరిసిపోతుంది.
ఫ్రిజ్ దుర్వాసన పోవాలంటే ఈ చిట్కాలు పాటించండి
ఫ్రిజ్లో నుంచి ఘాటైన వాసన వస్తుంటే, ఒక చిన్న గిన్నెలో బేకింగ్ సోడా పెట్టి ఫ్రిజ్లో ఉంచండి. ఇది దుర్వాసనను పీల్చుకుని ఫ్రిజ్ను తాజాగా ఉంచుతుంది. అలాగే నిమ్మ తొక్కలను కూడా ఫ్రిజ్లో ఉంచితే సహజమైన సువాసన వస్తుంది. ఈ చిన్న చిట్కాలు వేసవిలో ఫ్రిజ్ను శుభ్రంగా, తాజాగా ఉంచడంలో చాలా ఉపయోగపడతాయి.