Summer Skincare: వేసవి వచ్చిందంటే చాలు.. ఇంటి గోడలే కాదు మన ముఖం కూడా మాడుతుంది. బయటికి అడుగు పెట్టగానే చర్మం మండిపోవడం, టాన్ రావడం, స్కిన్ డార్క్ అవ్వడం చాలా మందిని ఇబ్బంది పెడుతుంది. ముఖ్యంగా మధ్యాహ్నం సమయంలో సూర్యకిరణాలు నేరుగా చర్మంపై పడటం వల్ల స్కిన్ డ్యామేజ్ అయ్యే ప్రమాదం ఉంటుంది. అందుకే వేసవిలో చర్మాన్ని కాపాడుకోవడానికి సన్స్క్రీన్ (Sunscreen) వాడటం చాలా అవసరం. కానీ చాలా మందికి సన్స్క్రీన్ ఎలా వాడాలి? ఏది బెస్ట్? అనే విషయాలు పూర్తిగా తెలియవు. ఇప్పుడు వాటి గురించి తెలుసుకుందాం.
SPF అంటే ఏమిటి?
సన్స్క్రీన్ తీసుకునేటప్పుడు ఎక్కువగా కనిపించే పదం SPF (Sun Protection Factor). ఇది సూర్యకిరణాల నుంచి చర్మానికి ఎంత రక్షణ ఇస్తుందో చెప్పే సంఖ్య. సాధారణంగా రోజువారీ వినియోగానికి SPF 30 ఉంటే సరిపోతుంది. అయితే ఎక్కువసేపు ఎండలో ఉండాల్సి వస్తే SPF 50 ఉన్న సన్స్క్రీన్ వాడటం మంచిదని నిపుణులు చెబుతున్నారు. అలాగే UVA, UVB రెండింటి నుంచి రక్షణ ఇచ్చే బ్రాడ్ స్పెక్ట్రమ్ సన్స్క్రీన్ తీసుకోవడం మంచిది.
చర్మ రకం బట్టి ఎంపిక:
సన్స్క్రీన్ ఎంపికలో స్కిన్ టైప్ కూడా కీలకం. ఆయిలీ స్కిన్ ఉన్నవారు జెల్ లేదా మ్యాట్ ఫినిష్ సన్స్క్రీన్ వాడితే చర్మం ఎక్కువగా ఆయిల్ అవ్వదు. డ్రై స్కిన్ ఉన్నవారు మాయిశ్చరైజింగ్ సన్స్క్రీన్ వాడితే చర్మం పొడిబారకుండా ఉంటుంది. ఇక సెన్సిటివ్ స్కిన్ ఉన్నవారు మినరల్ బేస్డ్ సన్స్క్రీన్ వాడితే స్కిన్ ఇరిటేషన్ తగ్గుతుంది.
సన్స్క్రీన్ ఎలా వాడాలి?
సన్స్క్రీన్ను బయటకు వెళ్లే 15-20 నిమిషాల ముందు అప్లై చేయాలి. చాలా మంది ఉదయం ఒకసారి రాసుకుని రోజంతా అలాగే ఉంచేస్తారు. కానీ అది సరైన పద్ధతి కాదు. చెమట ఎక్కువగా పడితే లేదా ముఖం కడిగితే సన్స్క్రీన్ ప్రభావం తగ్గుతుంది. అందుకే ప్రతి 2-3 గంటలకు ఒకసారి మళ్లీ అప్లై చేయడం మంచిది. ముఖం మాత్రమే కాదు, మెడ, చేతులు, చెవుల వెనుక భాగం లాంటి బయటికి కనిపించే చోట్ల కూడా రాయాలి.
అదనపు జాగ్రత్తలు అవసరం:
సన్స్క్రీన్ ఒక్కటే సరిపోదు. ఉదయం 11 గంటల నుంచి మధ్యాహ్నం 3 గంటల మధ్య ఎండలో ఎక్కువసేపు ఉండకపోవడం మంచిది. బయటికి వెళ్లేటప్పుడు టోపీ, సన్గ్లాసెస్, స్కార్ఫ్ వాడితే చర్మానికి అదనపు రక్షణ లభిస్తుంది. నీరు ఎక్కువగా తాగడం వల్ల కూడా శరీరం డీహైడ్రేషన్కు గురికాదు.
చర్మ సంరక్షణ అలవాటు చేసుకోవాలి:
వేసవిలో చర్మాన్ని కాపాడుకోవడం అంటే కేవలం అందం కోసం మాత్రమే కాదు, ఆరోగ్యానికి కూడా అవసరం. ప్రతిరోజూ సన్స్క్రీన్ వాడటం అలవాటు చేసుకుంటే టాన్, పిగ్మెంటేషన్, స్కిన్ డ్యామేజ్ వంటి సమస్యలను చాలా వరకు తగ్గించుకోవచ్చు. చిన్న అలవాటు అయినా దీని ప్రభావం పెద్దదే.
