Cockroach Control : వంటగది అనగానే మిక్సీ, గ్రైండర్, రిఫ్రిజిరేటర్ (ఫ్రిజ్) వంటి సాధనాలు ఎంత సహజంగా కనిపిస్తాయో, వాటితో పాటు బొద్దింకలు కూడా అంతే సర్వసాధారణంగా దర్శనమిస్తుంటాయి. ఇంట్లో ఎన్ని జాగ్రత్తలు తీసుకున్నప్పటికీ, వీటిని వదిలించుకోవడం చాలా మందికి ఒక పెద్ద సవాలుగా మారుతుంది. ఇవి ముఖ్యంగా వంటగదిలోని మూలల్లో, ఫ్రిజ్ కింద లేదా వెనుక భాగంలో ఎక్కువగా చేరుతుంటాయి.
బొద్దింకలు వంటగదిని అపరిశుభ్రం చేయడమే కాకుండా, మనం వండుకునే ఆహార పదార్థాలను కూడా పాడు చేస్తాయి. వీటి నివారణకు చాలా మంది మార్కెట్లో దొరికే కెమికల్ స్ప్రేలను ఉపయోగిస్తుంటారు. అయితే, వంటగదిలో ఇలాంటి రసాయనాలు వాడటం వల్ల అవి ఆహారంలో కలిసి ఆరోగ్యానికి హాని కలిగించే ప్రమాదం ఉంది. అందుకే, ఎటువంటి రసాయనాలు లేకుండా సహజ పద్ధతులలో బొద్దింకలను ఎలా తరిమి కొట్టవచ్చో ఇప్పుడు చూద్దాం.
1. ఫ్రిజ్ను ఎల్లప్పుడూ శుభ్రంగా ఉంచండి
ఆహార పదార్థాలు , ముఖ్యంగా తీపి వస్తువుల వాసనకు బొద్దింకలు ఎక్కువగా ఆకర్షించబడతాయి. కాబట్టి ఫ్రిజ్లో ఏదైనా ఆహారం లేదా పాలు, జ్యూస్ వంటి పానీయాలు ఒలికినప్పుడు వాటిని వెంటనే తుడిచేయాలి. కనీసం వారానికి ఒకసారైనా రిఫ్రిజిరేటర్ను పూర్తిగా లోపల, బయట శుభ్రం చేసుకోవడాన్ని అలవాటుగా మార్చుకోవాలి.
2. బిర్యానీ ఆకుల వాసనతో చెక్
మనం వంటల్లో వాడే బిర్యానీ ఆకులు బొద్దింకలను నివారించడంలో అద్భుతంగా పనిచేస్తాయి. కొన్ని బిర్యానీ ఆకులను తీసుకుని చేతులతో బాగా నలిపి, ఆ పొడిని లేదా ముక్కలను ఫ్రిజ్ వెనుక, కింద , వంటగది అరల్లో ఉంచాలి. బిర్యానీ ఆకుల నుండి వచ్చే ఘాటైన వాసనకు బొద్దింకలు ఆ ప్రాంతం నుండి పారిపోతాయి.
3. బేకింగ్ సోడా , చక్కెర మిశ్రమం
ఒక చిన్న గిన్నె లేదా పాత్రను తీసుకుని అందులో సమాన పరిమాణంలో బేకింగ్ సోడా , చక్కెరను బాగా కలపాలి. ఈ మిశ్రమాన్ని ఫ్రిజ్ వెనుక భాగంలో లేదా బొద్దింకలు ఎక్కువగా తిరిగే ప్రదేశాలలో ఉంచాలి. చక్కెర తీపిదనానికి ఆకర్షించబడి బొద్దింకలు దీనిని తింటాయి, అయితే అందులో ఉండే బేకింగ్ సోడా వాటికి హానికరంగా మారి వాటిని నిర్మూలిస్తుంది. అయితే, ఈ మిశ్రమాన్ని ఇంట్లోని చిన్న పిల్లలకు, పెంపుడు జంతువులకు దూరంగా ఉంచడం మంచిది.
4. వేప , లవంగాల ప్రయోగం
సహజ క్రిమిసంహారక గుణాలు కలిగిన వేప ఆకులు , ఘాటైన సువాసన గల లవంగాలు బొద్దింకలను తరిమికొట్టడానికి బాగా ఉపయోగపడతాయి. కొన్ని వేప ఆకులను లేదా లవంగాలను ఫ్రిజ్ చుట్టుపక్కల, వంటగది మూలల్లో ఉంచడం వల్ల ఆ వాసన భరించలేక బొద్దింకలు ఇళ్లను వదిలి వెళ్ళిపోతాయి.
5. ఇళ్లలోని చిన్న చిన్న రంధ్రాలను మూసివేయండి
బొద్దింకలు సాధారణంగా గోడల పగుళ్లు, కిచెన్ సింక్ పైపులు, డ్రైనేజీ రంధ్రాలు , రిఫ్రిజిరేటర్ వెనుక ఉండే చిన్న చిన్న సందుల ద్వారానే ఇళ్లలోకి ప్రవేశిస్తాయి. కాబట్టి వంటగదిలో అలాంటి పగుళ్లు లేదా రంధ్రాలు ఎక్కడైనా ఉంటే, వాటిని వెంటనే గుర్తించి సిమెంట్ లేదా క్లే సహాయంతో పూర్తిగా మూసివేయడం ఉత్తమం.
(గమనిక: ఇక్కడ అందించబడిన సమాచారం సాధారణ అవగాహన , నిపుణుల సూచనల ఆధారంగా ఇవ్వబడింది. ఈ చిట్కాలను పాటించే ముందు అవసరమైతే నిపుణుల సలహా తీసుకోవడం మంచిది.)