CDSCO Warning : పెయిన్ కిల్లర్లు, యాంటీబయోటిక్స్‌తో జాగ్రత్త.. కిడ్నీలకు ముప్పు!

CDSCO Warning : చిన్నపాటి తలనొప్పి, జ్వరం లేదా జలుబు రాగానే వైద్యుడిని సంప్రదించకుండా నేరుగా మెడికల్ షాపునకు వెళ్లి నొప్పి నివారణ మందులు (పెయిన్ కిల్లర్లు), యాంటీబయోటిక్స్ కొనుగోలు చేసి వాడటం మన దేశంలో పరిపాటిగా మారింది. అయితే, ఈ సొంత వైద్యం అలవాటు మన ప్రాణాల మీదికి తెచ్చే పెద్ద సమస్యగా మారుతోందని వైద్య నిపుణులు తీవ్రంగా హెచ్చరిస్తున్నారు. ఈ పరిణామాన్ని తీవ్రంగా పరిగణించిన భారతీయ ఔషధ నియంత్రణ సంస్థ (CDSCO) తాజాగా ప్రజలకు, వైద్యులకు , మెడికల్ షాపుల యాజమాన్యాలకు అత్యంత కీలకమైన హెచ్చరికలు, మార్గదర్శకాలను జారీ చేసింది.

కిడ్నీలు దెబ్బతినే ప్రమాదం.. పనిచేయకుండా పోతున్న యాంటీబయోటిక్స్

వైద్యుల పర్యవేక్షణ లేకుండా నాన్-స్టెరాయిడల్ యాంటీ-ఇన్‌ఫ్లమేటరీ డ్రగ్స్ (NSAIDs) అని పిలిచే పెయిన్ కిల్లర్లు, యాంటీబయోటిక్స్‌ను మితిమీరి వాడటం వల్ల మూత్రపిండాలు తీవ్రంగా దెబ్బతింటాయని సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్ (CDSCO) స్పష్టం చేసింది. పరిశోధనల ప్రకారం, ఏళ్ల తరబడి సొంతంగా పెయిన్ కిల్లర్లు వాడే వారికి దీర్ఘకాలిక మూత్రపిండ వ్యాధి (క్రానిక్ కిడ్నీ డిసీజ్) వచ్చే ప్రమాదం 1.26 రెట్లు ఎక్కువగా ఉంటుందని తేలింది. దీనికితోడు అనవసరంగా యాంటీబయోటిక్స్ వాడటం వల్ల శరీరంలో ‘యాంటీమైక్రోబయల్ రెసిస్టెన్స్’ పెరిగిపోతుందని, కాలక్రమేణా ఆ మందులు శరీరంలో అసలు పనిచేయని స్థితి ఏర్పడుతుందని హెచ్చరించింది. ‘ఔషధాలు , సౌందర్య సాధనాల చట్టం’ ప్రకారం ఈ రకమైన మందులను డాక్టర్ అధీకృత ప్రిస్క్రిప్షన్ ఆధారంగా మాత్రమే విక్రయించాలని స్పష్టం చేసింది.

ప్రజలకు సీడీఎస్‌సీఓ సలహాలు.. ఈ జాగ్రత్తలు తప్పనిసరి

స్వయంగా మందులు వాడే అలవాటును ప్రజలు తక్షణమే మానాలని సిడీఎస్‌సీఓ విజ్ఞప్తి చేసింది. ముఖ్యంగా సాధారణ వైరల్ ఇన్ఫెక్షన్లకు యాంటీబయోటిక్స్ ఏమాత్రం అవసరం లేదని, నొప్పి లేదా జ్వరం పదేపదే వస్తుంటే సొంత వైద్యం చేసుకోకుండా వైద్యుడిని కలిసి అసలు సమస్యను గుర్తించాలని సూచించింది. వైద్యులు సూచించిన వ్యవధి వరకే మందులు వాడాలని, గతంలో మిగిలిపోయిన పాత మాత్రలను వాడటం కానీ, ఇతరులకు ఇవ్వడం కానీ చేయకూడదని తెలిపింది. ఇప్పటికే మధుమేహం, అధిక రక్తపోటు, డీహైడ్రేషన్ లేదా మూత్రపిండాల సమస్యలతో బాధపడుతున్న వారు, వయోవృద్ధులు పెయిన్ కిల్లర్లు తీసుకునే ముందు ఖచ్చితంగా డాక్టర్‌కు తమ పాత ఆరోగ్య వివరాలను తెలియజేయాలని పేర్కొంది.

వైద్యులు, మెడికల్ షాపులకు కఠిన ఆదేశాలు

రోగులకు మందులు రాసేటప్పుడు వైద్యులు వారి వయస్సు, ఆరోగ్య స్థితిని పరిగణనలోకి తీసుకోవాలని డ్రగ్స్ కంట్రోల్ అథారిటీ ఆదేశించింది. సాధ్యమైనంత తక్కువ మోతాదులో, తక్కువ కాలపరిమితికి మాత్రమే పెయిన్ కిల్లర్లను సూచించాలని, గుండె , కిడ్నీ బాధితుల విషయంలో అత్యంత జాగ్రత్తగా వ్యవహరించాలని కోరింది. అదే సమయంలో, మెడికల్ షాపులు , పంపిణీదారులు డాక్టర్ ప్రిస్క్రిప్షన్ లేకుండా ‘షెడ్యూల్ హెచ్’ , ‘షెడ్యూల్ హెచ్1’ కేటగిరీకి చెందిన మందులను విక్రయించడాన్ని కఠినంగా నిషేధించింది. ఆసుపత్రులు, ఆరోగ్య సంస్థలు మందుల వాడకంపై నిరంతర పర్యవేక్షణ ఉంచాలని, రోగులకు సరైన కౌన్సెలింగ్ వ్యవస్థలను అందుబాటులోకి తేవాలని స్పష్టం చేసింది.