Katte Pongali Recipe: గుడిలో పెట్టే ప్రసాదం లాంటి కట్టె పొంగలి.. ఈ చిన్న చిట్కాతో ఇంట్లోనే అమృతంలా!

Katte Pongali Recipe: ఏ పండుగ వచ్చినా, ఏ శుభకార్యం జరిగినా ముందుగా గుర్తొచ్చే నైవేద్యం ‘కట్టె పొంగలి’. దేవాలయాల్లో ఇచ్చే ఆ ప్రసాదం తింటుంటే వచ్చే కమ్మని అనుభూతిని మాటల్లో వర్ణించలేం. అయితే అదే రుచిని మనం ఇంట్లో చేసినప్పుడు ఎందుకు రాదు అని చాలామంది అనుకుంటారు. కానీ గుడిలో ఇచ్చే ప్రసాదం లాంటి రుచి రావాలన్నా, నోట్లో వేస్తే వెన్నలా కరిగిపోవాలన్నా కొన్ని చిన్న చిన్న చిట్కాలు పాటిస్తే చాలు. ఈ స్టోరీలో ఆ చిన్న చిన్న చిట్కాలను తెలుసుకుందాం.

సీక్రెట్ చిట్కా ..
సాధారణంగా పొంగలి అంటే బియ్యం, పప్పు కలిపి ఉడికిస్తారు. కానీ ఈ రెసిపీలో ఒక చిన్న మార్పు ఉంది. కడిగిన బియ్యం, పప్పును నేరుగా ఉడికించకుండా.. వెన్నలో ఒక ఐదు నిమిషాల పాటు వేయించాలి. ఇలా చేయడం వల్ల పొంగలికి కమ్మని వాసనతో పాటు అద్భుతమైన టేస్ట్ కూడా వస్తుంది. ముందుగా పెసరపప్పును పచ్చి వాసన పోయేలా దోరగా వేయించాలి. ఇది పొంగలికి మంచి ఫ్లేవర్‌ను ఇస్తుంది. ఒక కప్పు బియ్యం, ఒక కప్పు పప్పుకు ఆరు కప్పుల నీళ్లు పోయడం వల్ల పొంగలి ముద్దగా కాకుండా, సాఫ్ట్‌గా నోట్లో కరిగిపోయేలా వస్తుంది. కట్టె పొంగలికి నెయ్యి ఎంత ఎక్కువగా ఉంటే అంత రుచి. నెయ్యిలో మిరియాలు, అల్లం ముక్కలు, జీలకర్ర, పచ్చిమిర్చి, ఎండుమిర్చి, జీడిపప్పు, కరివేపాకు వేసి వేయించాలి. చివరగా కొంచెం ఇంగువ చేర్చడం వల్ల గుడి ప్రసాదం లాంటి వాసన వస్తుంది. ఈ వేడి వేడి కట్టె పొంగలిని పల్లి చట్నీ లేదా సాంబార్‌తో సర్వ్ చేసుకుంటే ఆ రుచి అమృతంలా ఉంటుంది. పండుగలకు నైవేద్యంగా పెట్టడానికైనా లేదా క్విక్ బ్రేక్‌ఫాస్ట్‌కైనా మీ ఇంట్లో ఈ పద్ధతిలో కట్టె పొంగలిని ఒకసారి ట్రై చేయండి.