Monsoon Diet: ఆరోగ్యానికి మంచివే అయినా.. వర్షాకాలంలో ఈ కూరగాయలు ప్రమాదకరం..!

Monsoon Diet: వర్షాకాలంలో వాతావరణం చల్లగా మారినప్పటికీ తేమ శాతం పెరగడం వల్ల బ్యాక్టీరియా, ఫంగస్, ఇతర సూక్ష్మజీవులు వేగంగా వ్యాప్తి చెందే అవకాశం ఉంటుంది. అందుకే ఈ కాలంలో ఆహార పరిశుభ్రతపై ప్రత్యేక శ్రద్ధ అవసరమని ఆరోగ్య నిపుణులు సూచిస్తున్నారు. ముఖ్యంగా కొన్ని కూరగాయలను తీసుకునే విషయంలో జాగ్రత్తలు పాటించాలని పోషకాహార నిపుణులు చెబుతున్నారు.. వర్షాకాలంలో కొన్ని కూరగాయలు తేమ కారణంగా సులభంగా కలుషితమయ్యే అవకాశం ఉండటంతో వాటిని తీసుకునేటప్పుడు ప్రత్యేక జాగ్రత్త అవసరమని పేర్కొన్నారు. అలాగే ఈ కాలంలో సురక్షితంగా తీసుకోవచ్చని కొన్ని ప్రత్యామ్నాయ కూరగాయలను కూడా సూచించారు.

ఆకుకూరలు

పాలకూర వంటి ఆకుకూరలు విటమిన్లు, ఖనిజాలు సమృద్ధిగా కలిగి ఉన్నప్పటికీ, వర్షాకాలంలో వీటిపై బ్యాక్టీరియా, మట్టి, ఇతర సూక్ష్మజీవులు చేరే అవకాశం ఎక్కువగా ఉంటుందని నిపుణులు చెబుతున్నారు.. సాధారణంగా కడిగినా కొన్ని సూక్ష్మజీవులు పూర్తిగా తొలగకపోవచ్చని, దీంతో కడుపు ఇన్‌ఫెక్షన్లు లేదా ఫుడ్ పాయిజనింగ్ వచ్చే ప్రమాదం ఉంటుందని హెచ్చరించారు.

క్యాబేజీ, కాలీఫ్లవర్

క్యాబేజీ, కాలీఫ్లవర్ వంటి క్రూసిఫెరస్ కూరగాయల పొరలు, పుష్పాల మధ్య తేమ, మురికి, బ్యాక్టీరియా చిక్కుకుపోయే అవకాశం ఉంటుంది. వీటిని పూర్తిగా శుభ్రం చేయడం కొంత కష్టమైనందున వర్షాకాలంలో మరింత జాగ్రత్తగా కడిగి వండాలని సూచించారు.

మష్రూమ్స్

మష్రూమ్స్ సహజంగానే తేమ ఎక్కువగా ఉండే ప్రాంతాల్లో పెరుగుతాయి. అందువల్ల వర్షాకాలంలో ఇవి సులభంగా కలుషితమయ్యే ప్రమాదం ఉందని చెబుతున్నారు.. విశ్వసనీయమైన విక్రేతల వద్ద నుంచి మాత్రమే తాజా మష్రూమ్స్ కొనుగోలు చేయాలని, బాగా శుభ్రం చేసి పూర్తిగా ఉడికించిన తర్వాతే తీసుకోవాలని సూచించారు.

మొలకెత్తిన బంగాళాదుంపలు

మొలకలు వచ్చిన బంగాళాదుంపల్లో ‘సోలనైన్’ అనే సహజ విషపదార్థం స్థాయి పెరుగుతుంది. అలాంటి బంగాళాదుంపలను తినడం వల్ల వికారం, తలనొప్పి, జీర్ణ సమస్యలు వచ్చే ప్రమాదం ఉంటుందని నిపుణులు హెచ్చరిస్తున్నారు.. అందువల్ల మొలకలు వచ్చిన బంగాళాదుంపలను ఉపయోగించకుండా తాజావి మాత్రమే ఎంచుకోవాలని సూచించారు.

వర్షాకాలంలో ఏ కూరగాయలు తినాలి..?

కొన్ని కూరగాయలను తగ్గించాల్సి వచ్చినా, ఆరోగ్యకరమైన ప్రత్యామ్నాయాలు ఎన్నో ఉన్నాయని నిపుణులు చెబుతున్నారు.. సొరకాయ, బీరకాయ, దొండకాయ, మొక్కజొన్న, గోరుచిక్కుడు వంటి తక్కువ తేమ కలిగిన కూరగాయలు వర్షాకాలంలో తీసుకోవడానికి అనుకూలంగా ఉంటాయని చెప్పారు. ఇవి సులభంగా జీర్ణమవడంతో పాటు సమతుల్య ఆహారంలో భాగంగా తీసుకోవచ్చని వివరించారు.