Coconut Rice: సమయం తక్కువ, రుచి ఎక్కువ.. పిల్లలు ఇష్టంగా తినే బెస్ట్ లంచ్ బాక్స్ రెసిపీ మీ కోసం..

Coconut Rice: ఉదయాన్ని పిల్లలకు, ఆఫీస్ వెళ్లే వాళ్లకు లంచ్ బాక్స్ రెడీ చేయడం ఆడవాళ్లకు పెద్ద సవాల్. సమయా భావం, హెల్త్ రెండూ సమానంగా ఉండేలా రెసిపీలు చేయాల్సి ఉంటుంది. అలాంటి టప్పుడు ఏం చేయాలో తోచదు. అయితే.. తక్కువ సమయంలో మంచి హెల్త్ బెనిఫిట్స్ ఉండేలా ఓ లంచ్ రెసిపీ మీ కోసం.. దక్షిణ భారత దేశంలో పండుగలు, శుభకార్యాల సమయంలో అత్యంత ప్రీతిపాత్రంగా చేసుకునే వంటకాల్లో కొబ్బరి అన్నం (Coconut Rice) ఒకటి. పచ్చి కొబ్బరి తురుము, కరివేపాకు, అల్లం మరియు ఇంగువ సువాసనలతో ఈ అన్నం ఎంతో అద్భుతంగా ఉంటుంది. దీని తయారీ విధానాన్ని ఇప్పుడు చూద్దాం..

READ MORE: Rajat Patidar: “చూస్తుంటే కొట్టేలా ఉన్నాడే”.. వైభవ్ మెడ పట్టుకుని ఆర్సీబీ కెప్టెన్ ఏం చేశాడో చూడండి..

కావలసిన పదార్థాలు:
బియ్యం: 1 కప్పు (వండనివి) లేదా 3-4 కప్పుల వండిన అన్నం
పచ్చి కొబ్బరి తురుము: 1 నుంచి 1½ కప్పు (తాజాదైతే రుచి ఇంకా బాగుంటుంది)
నెయ్యి లేదా నూనె: 2 టేబుల్ స్పూన్లు
తాలింపు దినుసులు: ½ టీస్పూన్ ఆవాలు, ½ టీస్పూన్ జీలకర్ర, 1 టేబుల్ స్పూన్ శనగపప్పు, ½ టేబుల్ స్పూన్ మినప్పప్పు
నట్స్: 12-15 జీడిపప్పులు లేదా వేరుశనగ గుళ్లు
పచ్చిమిర్చి: 1-2 (చీలికలు)
ఎండుమిర్చి: 1
అల్లం: 1 టీస్పూన్ (సన్నని తరుగు)
కరివేపాకు: 1 రెమ్మ
ఇంగువ: చిటికెడు
ఉప్పు: రుచికి సరిపడా

తయారీ విధానం:
ముందుగా బియ్యాన్ని కడిగి పొడిపొడిగా వండుకోవాలి. అన్నం మెత్తగా అవ్వకుండా గింజ గింజలా ఉండేలా చూసుకోవాలి. వండిన అన్నాన్ని ఒక వెడల్పాటి పళ్ళెంలో వేసి పూర్తిగా చల్లారనివ్వాలి. అనంతరం.. బాణలిలో నెయ్యి లేదా నూనె వేడి చేసి, మొదట జీడిపప్పు లేదా వేరుశనగ గుళ్లను బంగారు రంగు వచ్చేవరకు వేయించి ఒక ప్లేట్‌లోకి తీసుకుని పక్కన పెట్టుకోవాలి. అదే నూనెలో ఆవాలు, జీలకర్ర, ఎండుమిర్చి, శనగపప్పు, మినప్పప్పు వేయాలి. పప్పులు దోరగా వేగి మంచి సువాసన వస్తున్నప్పుడు.. అల్లం తరుగు, పచ్చిమిర్చి చీలికలు, కరివేపాకు వేసి వేయించాలి. చివరగా చిటికెడు ఇంగువ వేయాలి. ఇప్పుడు పచ్చి కొబ్బరి తురుము, రుచికి సరిపడా ఉప్పు వేయాలి. వెంటనే వండిన అన్నాన్ని కూడా వేసి బాగా కలపాలి. (మీరు ఫ్రోజన్ కొబ్బరి వాడుతుంటే, కొబ్బరి వేడి అయ్యాక అన్నం కలపండి). అన్నీ బాగా కలిసిన తర్వాత స్టవ్ ఆపేయాలి. పైన ముందుగా వేయించి పెట్టుకున్న జీడిపప్పులను చల్లుకోవాలి. ఈ కమ్మని కొబ్బరి అన్నాన్ని ఏదైనా కుర్మాతో గానీ, లేదా కేవలం పెరుగుతో గానీ వడ్డిస్తే చాలా రుచిగా ఉంటుంది.