Drumstick Pickle Recipe: మునగ ప్రయోజనాలు తెలుసు కదా.. ఇలా సులువుగా మునగ పచ్చడి తయారు చేయండి..

Drumstick Pickle Recipe: భారతీయ వంటకాలలో పచ్చళ్లకు ప్రత్యేక స్థానం ఉంది. సాధారణ వంటకానికే రుచిని పెంచే శక్తి పచ్చళ్లకు ఉంటుంది. మీరు కొత్తగా, రుచికరంగా ఉండే పచ్చడి కోసం చూస్తున్నట్లయితే, మునగ పచ్చడి ఒక అద్భుతమైన ఎంపికగా చెప్పుకోవాలి.. మునగకాయలతో చేసే ఈ కారంపచ్చడి రుచికరంగా ఉండటమే కాకుండా, ఆరోగ్యానికి కూడా ఎంతో మేలు చేస్తుంది.

మునగ ప్రయోజనాలు
మునగను (Drumstick) ఆయుర్వేదంలో ఎంతో ముఖ్యమైన ఆహారంగా భావిస్తారు. ఇందులో విటమిన్లు, ఖనిజాలు, యాంటీ ఆక్సిడెంట్లు సమృద్ధిగా ఉంటాయి. ఇవి రోగనిరోధక శక్తిని పెంచడంలో, జీర్ణక్రియను మెరుగుపరచడంలో, శరీరాన్ని దృఢంగా ఉంచడంలో సహాయపడతాయి. సాధారణంగా మునగను పప్పు, సాంబార్, కూరలలో వాడుతుంటారు. అయితే మునగతో పచ్చడి కూడా ఎంతో రుచిగా తయారవుతుంది.

కావలసిన పదార్థాలు
– మునగకాయలు – 2 గిన్నెలు (తరిగినవి)
– ఆవాల పొడి – 3 టీస్పూన్లు
– కారం పొడి – 2 టీస్పూన్లు
– పసుపు – ½ టీస్పూన్
– మెంతులు – 1 టీస్పూన్
– సోంపు గింజలు – ½ టీస్పూన్
– ఇంగువ – 2 చిటికెలు
– వెనిగర్ – 1 టీస్పూన్
– నూనె – అవసరమైనంత
– ఉప్పు – రుచికి తగినంత

తయారీ విధానం
* ముందుగా మునగకాయలను శుభ్రంగా కడిగి చిన్న ముక్కలుగా కోయాలి. తరువాత ఒక గిన్నెలో నీళ్లు మరిగించి, తరిగిన మునగ ముక్కలను అందులో వేసి సుమారు 5 నిమిషాలు ఉడికించాలి. ఆ తరువాత వాటిని వడకట్టి పక్కన పెట్టాలి. ఇప్పుడు ఒక గాజు సీసా తీసుకుని అందులో ఆవాలు, ఉప్పు వేసి గోరువెచ్చని నీళ్లు పోయాలి. అందులో ఉడికించిన మునగ ముక్కలను వేసి మూతపెట్టి మూడు రోజుల పాటు ఉంచాలి. ఈ సమయంలో అవి కొద్దిగా పుల్లగా మారుతాయి. మూడు రోజుల తర్వాత మునగ ముక్కలను తీసి శుభ్రంగా కడిగి 3–4 గంటల పాటు ఎండలో ఆరబెట్టాలి. తరువాత ఒక బాణలిలో నూనె వేడి చేసి, ఇంగువ వేసి మంట ఆర్పేయాలి. ఆ నూనెలో ఎండిన మునగ ముక్కలను వేసి కొంతసేపు ఉంచాలి. నూనె చల్లారిన తరువాత ఆవాల పొడి, మెంతులు, పసుపు, కారం వంటి మసాలాలు వేసి బాగా కలపాలి. చివరగా ఉప్పు, వెనిగర్ వేసి పచ్చడిని మిక్స్ చేయాలి. తయారైన పచ్చడిని మళ్లీ గాజు సీసాలో వేసి 2–3 రోజుల పాటు ఉంచితే, రుచికరమైన మునగ పచ్చడి సిద్ధమవుతుంది.

మొత్తంగా మునగ పచ్చడి రుచికరమైనదిగా మాత్రమే కాకుండా ఆరోగ్యకరమైనది కూడా. ఇంట్లో సులభంగా తయారు చేసుకునే ఈ పచ్చడి, మీ భోజనానికి కొత్త రుచిని తీసుకొస్తుంది. మధ్యాహ్నం లేదా రాత్రి భోజనంతో వడ్డిస్తే మరింత రుచిగా ఉంటుంది.