Water Tank Cleaning: ఇంట్లో వాటర్ ట్యాంక్ శుభ్రం చేయడం చాలా మందికి పెద్ద సమస్యగా మారుతుంది. ట్యాంకులోకి దిగి మురికి తొలగించడం కష్టమైన పని మాత్రమే కాకుండా, సమయం కూడా ఎక్కువగా పడుతుంది. అయితే ట్యాంకులోకి దిగకుండానే, నీటిని పూర్తిగా వృథా చేయకుండా వాటర్ ట్యాంక్ను శుభ్రం చేసే ఓ సులభమైన చిట్కా మీకు తెలుసా. ఈ చిట్కాను మీ ఇంట్లో వాడటానికి పెద్దగా ఖర్చు కూడా అవసరం లేదు. అసలు ఆ చిట్కా ఏంటి, దానిని ఎలా ఉపయోగించాలో ఈ స్టోరీలో తెలుసుకుందాం.
ముందుగా ఒక ప్లాస్టిక్ వాటర్ బాటిల్, ప్లాస్టిక్ పైపు, పొడవైన కర్ర లేదా పైపు, కత్తెర, బ్లేడ్, అడ్హెసివ్ టేప్ను తీసుకోండి. తర్వాత ప్లాస్టిక్ బాటిల్ అడుగు భాగాన్ని కట్ చేసి, అక్కడక్కడ చిన్న రంధ్రాలు లేదా గాట్లు పెట్టాలి. అనంతరం బాటిల్ మూత భాగానికి ప్లాస్టిక్ పైపును అమర్చి టేప్తో గట్టిగా ఫిక్స్ చేయాలి. బాటిల్ను ట్యాంక్ అడుగుభాగం వరకు తీసుకెళ్లేందుకు పొడవైన కర్రను దానికి అమర్చాలి. ఆ తర్వాత పైపులో నీరు నింపి, దాని మరో చివరను ట్యాంక్ కంటే దిగువ భాగంలో ఉంచితే సైఫన్ పద్ధతిలో నీరు బయటకు రావడం ప్రారంభమవుతుంది. బాటిల్ను ట్యాంక్ అడుగున ఉన్న మట్టి, ఇసుక, చెత్తపై ఉంచితే అవి నీటితో పాటు పైపు ద్వారా బయటకు వస్తాయి. ఈ పద్ధతిలో ట్యాంకులోకి దిగాల్సిన అవసరం ఉండదు. అలాగే మొత్తం నీటిని ఖాళీ చేయకుండా అడుగున పేరుకుపోయిన మురికిని మాత్రమే తొలగించవచ్చు. ఇంట్లోనే అందుబాటులో ఉండే వస్తువులతో తక్కువ ఖర్చుతో వాటర్ ట్యాంక్ను శుభ్రం చేసుకునే ఈ ట్రిక్ కుదిరితే మీ ఇంట్లో కూడా ప్రయత్నించండి.