Russia-Ukraine Peace Talks: నాలుగేళ్లుగా కొనసాగుతున్న రష్యా, ఉక్రెయిన్ మధ్య యుద్ధానికి ముగింపు పలికేందుకు దౌత్య ప్రయత్నాలు మరోసారి ఊపందుకున్నాయి. రష్యా, ఉక్రెయిన్, అమెరికా మధ్య త్రైపాక్షిక శాంతి చర్చలు మళ్లీ ప్రారంభించే అవకాశాన్ని తోసిపుచ్చడం లేదని రష్యా అధ్యక్ష కార్యాలయం క్రెమ్లిన్ సోమవారం వెల్లడించింది. అయితే చర్చలు ఎప్పుడు, ఎక్కడ జరుగాయనే దానిపై క్లారిటీ ఇవ్వలేదు. క్రెమ్లిన్ అధికార ప్రతినిధి డిమిత్రి పెస్కోవ్ ప్రకారం.. అమెరికా అధ్యక్షుడు డొనాల్డ్ ట్రంప్ ప్రత్యేక రాయబారులు స్టీవ్ విట్కాఫ్, జారెడ్ కుష్నర్ ఇటీవల మాస్కోలో రష్యా అధ్యక్షుడు వ్లాదిమిర్ పుతిన్తో, అనంతరం కీవ్లో ఉక్రెయిన్ అధ్యక్షుడు వొలోడిమిర్ జెలెన్స్కీతో చర్చలు జరిపారు.
పుతిన్తో విట్కాఫ్, కుష్నర్ మూడు గంటలపాటు సమావేశమయ్యారు. దీని తర్వాత జెలెన్స్కీతో చర్చించారు. ఉక్రెయిన్తో చర్చలు సానుకూల వాతావరణంలో జరిగాయని అమెరికా ప్రతినిధులు చెప్పారు. అమెరికా చేస్తున్న శాంతి ప్రయత్నాలను రష్యా ప్రశంసించింది. ట్రంప్కు శాంతి విషయంలో ఉన్న నిబద్ధతను తాము అభినందిస్తున్నామని క్రెమ్లిన్ పేర్కొంది. అమెరికా రాయబారుల ప్రయత్నాలను రష్యా గౌరవంగా చూస్తోందని తెలిపింది. పుతిన్, ట్రంప్ మధ్య ఫోన్ సంభాషణలు జరిగే అవకాశం ఉందని క్రెమ్లిన్ పేర్కొంది. ఇదిలా ఉంటే, రెండు దేశాల మధ్య శాంతి అంత సులభంగా నెలకొనే పరిస్థితి కనిపించడం లేదు. ముఖ్యంగా ఉక్రెయిన్ తూర్పు భాగాలైన డొనెట్స్క్, లుహాన్స్క్ విషయంలో రష్యా డిమాండ్లు, ఉక్రెయిన్ వైఖరి మధ్య తీవ్ర విభేదాలు ఉన్నాయి.