Neal Katyal: టారిఫ్లతో ప్రపంచ దేశాలను భయపెడుతున్న అమెరికా అధ్యక్షుడు డొనాల్డ్ ట్రంప్కు యూఎస్ సుప్రీంకోర్టులో భారీ ఎదురుదెబ్బ తగిలింది. అమెరికా వాణిజ్య భాగస్వాములపై టారిఫ్లు విధించడం ‘‘అన్యాయం, రాజ్యాంగ విరుద్ధమైన పన్నులు’’ అని అభివర్ణించింది. 6-3 తేడాతో సుప్రీంకోర్టు ఈ తీర్పును వెలువరించింది. 9 మంది న్యాయమూర్తుల్లో ఆరుగురు ట్రంప్కు వ్యతిరేకంగా ఓటు వేశారు. అంతర్జాతీయ ఆర్థిక అధికారాల చట్టం ద్వారా పెద్ద ఎత్తున దిగుమతులపై సుంకాలు విధించడం సరైంది కాదని స్పష్టం చేశారు.
అయితే, ఈ కేసులో ట్రంపునకు వ్యతిరేకంగా వాధించిన వ్యక్తి గురించి ఇప్పుడు చర్చ నడుస్తోంది. భారత సంతతికి చెందిన ప్రముఖ న్యాయవాది నీల్ కత్యాల్ పేరు ఇప్పుడు ప్రపంచవ్యాప్తంగా మారుమోగుతోంది.1977 అంతర్జాతీయ అత్యవసర ఆర్థిక అధికారాల చట్టం (IEEPA)ను ఉపయోగించడాన్ని వ్యతిరేకిస్తూ కత్యాల్ కోర్టులో తన వాదనల్ని వినిపించారు. కోర్టు కూడా దీనికి మద్దతు తెలిపింది. కాంగ్రెస్ అనుమతితోనే పన్నులు విధించాలని, సొంతగా పన్నులు విధించే అధికారం అధ్యక్షుడికి ఉండదని స్పష్టం చేసింది. వాణిజ్యాన్ని నియంత్రించే అధికారం కేవలం కాంగ్రెస్కు (అమెరికా పార్లమెంట్)కు మాత్రమే ఉందని కత్యాల్ తన వాదనల్ని వినిపించారు. ట్రంప్ తన అధికారాన్ని ఇష్టారీతిలో వాడకూడదని వాదించారు.
నీల్ కత్యాల్ ఎవరు..?
నీల్ కత్యాల్ అమెరికాలో చాలా ఫేమస్ లాయర్. ఈయన కుటుంబం భారత్ నుంచి యూఎస్కు వలస వెళ్లింది. చికాగోలో నీల్ జన్మించారు. ఈయన తండ్రి ఇంజనీర్, తల్లి డాక్టర్ వీరిద్దరు కూడా భారత్ నుంచి వలస వెళ్లారు. నీల్ డార్ట్మౌత్ కాలేజ్ అండ్ యేల్ లా స్కూల్ నుంచి పట్టా పొందారు. ప్రస్తుతం. మిల్ బ్యాంక్ ఎల్ఎల్పీలో పార్ట్నర్గా, జార్జ్ టౌన్ యూనివర్సిటీలో ప్రొఫెసర్గా పనిచేస్తున్నారు. బరాక్ ఒబామా హయాంలో అమెరికా యాక్టింగ్ సొలిసిటర్ జనరల్గా పనిచేశారు.
నీల్ కత్యాల్ కీలక కేసులు:
అమెరికా సుప్రీంకోర్టులో 50 కన్నా ఎక్కువ కేసులు వాదించిన అనుభం నీల్కు ఉంది. 2017లో ట్రంప్ విధించిన ‘‘ట్రావెల్ బ్యాన్’’ను కూడా ఈయనే కోర్టులో సవాల్ చేశారు. అమెరికా న్యాయశాఖ ఇచ్చే అత్యున్నత పౌర పురస్కారం అయిన ‘‘ఎడ్మండ్ రాండాల్ఫ్ అవార్డ్’’ను అందుకున్నారు. 2024, 2025 సంవత్సరాల్లో ఫోర్బ్స్ ప్రకటించిన అమెరికా టాప్-200 న్యాయవాదుల జాబితాలో ఈయన ఉన్నారు.
అమెరికాను కుదిపేసిన నల్లజాతీయులు జార్జ్ ఫ్లాయిడ్ హత్య కేసులో ప్రత్యేక ప్రాసిక్యూటర్గా పనిచేశారు. ఓటింగ్ రైట్స్ యాక్ట్ 1965 ఓటింగ్ హక్కుల చట్టం రాజ్యాంగ బద్ధతను కాపాడటంలో కీలక పాత్ర పోషించారు.