Monkeypox: మంకీపాక్స్ కేసులపై డబ్ల్యూహెచ్ఓ అత్యవసర సమావేశం..!

ప్రపంచం ఓ వైపు కరోనా వైరస్ తో ఇబ్బందులు పడుతోంది. చైనా వూహాన్ లో మొదలైన కోవిడ్ వ్యాధి నెమ్మదిగా ప్రపంచంలోని అన్ని దేశాలకు పాకింది. దీంతో పలు దేశాల ఆర్థిక, ఆరోగ్య వ్యవస్థలు తీవ్రంగా దెబ్బతిన్నాయి. మరోవైపు కరోనా తన రూపాలను మార్చుకుంటూ… ఆల్ఫా, బీటా, డెల్టా, డెల్టా ప్లస్, ఓమిక్రాన్ ఇలా ప్రజలపై ప్రభావాన్ని చూపిస్తూనే ఉంది.

ఇదిలా ఉంటే ప్రస్తుతం మంకీపాక్స్ ప్రపంచాన్ని కలవరపెడుతోంది. పాశ్చాత్య దేశాల్లో ఈ కేసుల సంఖ్య క్రమంగా పెరుగుతోంది. దీంతో ప్రపంచ ఆరోగ్య సంస్థ( డబ్ల్యూహెచ్ఓ) అప్రమత్తం అయింది. మంకీపాక్స్ వ్యాధిపై అత్యవసర సమావేశాన్ని నిర్వహించబోతోంది. మంకీపాక్స్ ప్రధాన ఎజెండాగా ఈ సమావేశం జరగబోతున్నట్లు తెలుస్తోంది.

ఇటీవల మే 8న బ్రిటన్ లో మంకీపాక్స్ వైరస్ కేసు బయటపడింది. నైజీరియా నుంచి వచ్చిన ఓ వ్యక్తికి ఈ వ్యాధి సోకింది. ఆ తరువాత బ్రిటన్ వ్యాప్తంగా మరో 9 కొత్త కేసులు నమోదయ్యాయి. ఇదే విధంగా మే 18న కెనడా నుంచి అమెరికాకు వచ్చిన ఓ వ్యక్తికి మంకీపాక్స్ సోకినట్లు మసుచాసెట్స్ హెల్త్ డిపార్ట్ మెంట్ వెల్లడించింది. దీంతో పాటు స్పెయిన్, బెల్జియం, ఇటలీ, కెనడా, ఆస్ట్రేలియాల్లో మంకీపాక్స్ వైరస్ బయటపడుతోంది.

మంకీపాక్స్ చాలా అరుదైన, సీరియస్ వ్యాధి. అంత త్వరగా ఒకరి నుంచి ఒకరికి వ్యాపించదని నిపుణులు చెబుతున్నారు. ముఖ్యంగా స్వలింగ సంపర్కుల్లో ఎక్కువగా వ్యాధి వ్యాపించే అవకాశం ఉందని వైద్య నిపుణులు తెలుపుతున్నారు. దీంతో పాటు చర్మంపై గాయాలు ఉన్న సమయంలో వ్యాధిగ్రస్తుడి నుంచి బాడీఫ్లాయిడ్స్ తో కాంటాక్ట్ అయితే వ్యాధి వచ్చే అవకాశం ఉంది. సెంట్రల్ ఆఫ్రికన్ దేశాల్లో ఈవ్యాధి తీవ్రత ఎక్కువగా ఉంటుంది. ఫ్లూ లాంటి లక్షణాలతో మొదలై, లింప్ నోడ్స్ వాయడం, చర్మంపై, మొహంపై దద్దర్లు రావడం ఈ వ్యాధి ప్రధాన లక్షణాలు.