Macron vs Trump: ‘అవి తెలివి తక్కువ వ్యాఖ్యలు’.. ఫ్రాన్స్ అల్లర్లపై ట్రంప్ వ్యాఖ్యలను ఖండించిన మాక్రాన్

ఫ్రాన్స్‌లో జీవన వ్యయం పెరుగుదలకు వ్యతిరేకంగా జరుగుతున్న నిరసనలు, హింసాత్మక ఘటనలపై అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలకు ఫ్రాన్స్ అధ్యక్షుడు ఇమ్మాన్యుయేల్ మాక్రాన్ గట్టిగా బదులిచ్చారు. ఫ్రాన్స్‌లో జరుగుతున్న ఆందోళనలకు ముస్లిం వలసదారులే కారణమంటూ ట్రంప్ చేసిన వ్యాఖ్యలను తీవ్రంగా ఖండించారు. ఫ్రాన్స్‌లోని సామాజిక ఉద్రిక్తతలను కొందరు విదేశీ నేతలు తమ రాజకీయ ప్రయోజనాల కోసం ఉపయోగించుకుంటున్నారని మాక్రాన్ ఆరోపించారు.

పారిస్‌తో పాటు ఫ్రాన్స్‌లోని పలు నగరాల్లో గత వారాంతంలో జరిగిన దోపిడీలు, హింసాత్మక ఘటనల నేపథ్యంలో తప్పుడు సమాచారాన్ని వ్యాప్తి చేసే ప్రయత్నాలు జరిగాయని మాక్రాన్ బుధవారం పేర్కొన్నారు. అట్లాంటిక్‌ అవతలి వైపు ఉన్న నాయకులతో సహా కొందరు విదేశీ నేతలు ఫ్రాన్స్ పరిస్థితులను తమ రాజకీయ ప్రయోజనాలకు అనుగుణంగా ఉపయోగించుకుంటున్నారని విమర్శించారు. “చాలామంది చేస్తున్న వ్యాఖ్యలు ఆమోదయోగ్యం కానివి.. అంతేకాదు, అవి పూర్తిగా మూర్ఖమైనవి కూడా” అని మాక్రాన్ వ్యాఖ్యానించారు. ఈ వ్యాఖ్యలు అమెరికా అధ్యక్షుడు ట్రంప్‌ను ఉద్దేశించినవేనా అని ఓ విలేకరి ప్రశ్నించగా.. “ఇతరులతో పాటు ఆయన కూడా” అని సమాధానమిచ్చారు.

ఫ్రాన్స్‌లో వలసదారులు, ఇస్లామిస్టులు పెద్ద సంఖ్యలో ప్రవేశించి దేశాన్ని ఆక్రమించుకున్నారన్న ట్రంప్ వాదనను మాక్రాన్ తోసిపుచ్చారు. ఫ్రాన్స్‌లో ఎప్పుడూ జరగని ఘటనలు జరిగినట్లు చూపించే ఏఐ రూపొందించిన చిత్రాలను కూడా కొందరు ప్రచారం చేస్తున్నారని అన్నారు. “వలసదారులు, ఇస్లామిస్టుల గుంపులు ఫ్రాన్స్‌పై దండెత్తాయని కొందరు చెబుతున్నారు. అది పూర్తిగా అబద్ధం” అని మాక్రాన్ స్పష్టం చేశారు. ఏఐ ద్వారా రూపొందించిన తప్పుడు దృశ్యాలు, సోషల్ మీడియాలో వ్యాప్తి చెందుతున్న అసత్య కథనాలు దేశ పరిస్థితులపై అపోహలు కలిగిస్తున్నాయని అభిప్రాయపడ్డారు.

ఫ్రాన్స్ విదేశాంగ మంత్రి జీన్-నోయెల్ బారోట్ కూడా ఈ అంశంపై స్పందించారు. తప్పుడు సమాచారం వ్యాప్తి చేస్తున్న దేశాలకు అవసరమైన వివరాలు అందించేందుకు తమ కార్యాలయం సిద్ధంగా ఉందని చెప్పారు. ఆధారాలు లేని ఆరోపణలను సోషల్ మీడియాలో ప్రచారం చేయకుండా వాటిని మరింత వ్యాప్తి చేయకుండా ఉండేందుకు ఈ సమాచారం ఉపయోగపడుతుందని పేర్కొన్నారు.

ఫ్రాన్స్‌పై ప్రస్తుతం విమర్శలు చేస్తున్నవారు ఆ దేశాన్ని ప్రేమించేవారు కాదని మాక్రాన్ వ్యాఖ్యానించారు. ఎన్నికల ప్రచారాల్లో ఉన్న కొందరు నాయకులు ఏఐ రూపొందించిన కంటెంట్‌ను పరిశీలించకుండా నమ్ముతున్నారని, మరికొందరు ఉద్దేశపూర్వకంగా వ్యాప్తి చేస్తున్న కథనాలను తమ రాజకీయ ప్రచారానికి ఉపయోగించుకుంటున్నారని ఆరోపించారు. ఫ్రాన్స్‌లో జరిగిన ఘటనలపై వాస్తవాలను పక్కనపెట్టి రాజకీయ ప్రయోజనాల కోసం వ్యాఖ్యలు చేయడం సరికాదని అభిప్రాయపడ్డారు.

ఫ్రాన్స్‌లో ఆందోళనలు తొలుత పాఠశాలల్లో ఉపాధ్యాయుల కొరత, మెరుగైన విద్యా సదుపాయాల కోసం విద్యార్థులు చేపట్టిన నిరసనలతో ప్రారంభమయ్యాయి. ఆ తర్వాత అధిక ద్రవ్యోల్బణం, పెరుగుతున్న జీవన వ్యయం, ప్రజా సేవలపై ఆందోళనలతో కార్మిక సంఘాలు, ఇతర వర్గాలు కూడా ఉద్యమంలో చేరాయి.

ట్రంప్ ఏమన్నారు?

ఫ్రాన్స్‌లో జరుగుతున్న నిరసనలు, హింసకు వలసలే కారణమని ట్రంప్ సోమవారం వ్యాఖ్యానించారు. ఫ్రాన్స్‌తో పాటు యూరప్ దేశాలు తమ సరిహద్దులను కట్టుదిట్టం చేసుకోవాలని సూచించారు.