US-Iran Tensions: అమెరికా మరోసారి ఇరాన్‌పై దాడి చేస్తే తీవ్ర పరిణామాలు ఎదుర్కోవాల్సి వస్తుందని ఇరాన్ పార్లమెంట్ స్పీకర్, శాంతిచర్చల్లో కీలక ప్రతినిధి మొహమ్మద్ బాఘర్ గాలిబాఫ్ హెచ్చరించారు. అమెరికా చర్చల మార్గాన్ని ఎంచుకున్నా, యుద్ధాన్ని ఎంచుకున్నా తమకు అభ్యంతరం లేదని అన్నారు. ఇరాన్ ప్రతిపాదించిన ఏడు షరతులను అంగీకరిస్తేనే ఒప్పందానికి అవకాశం ఉంటుందని స్పష్టం చేశారు. అమెరికా మరో తప్పు చేస్తే యుద్ధ స్వరూపమే మారిపోతుందని వార్నింగ్ ఇచ్చారు. మధ్యప్రాచ్యంలో ఉద్రిక్తతల వేళ ఇరాన్ నుంచి ఈ వ్యాఖ్యలు వచ్చాయి.
అమెరికా, ఇజ్రాయిల్‌లు ఫిబ్రవరి 28న ఇరాన్‌పై సంయుక్తంగా దాడులు ప్రారంభించాయి. తొలిరోజు దాడిలోనే ఇరాన్ సుప్రీంలీడర్ అయతుల్లా అలీ ఖమేనీ మరణించారు. దీని తర్వాత ఇరాన్ మధ్యప్రాచ్యంలోని అమెరికా సైనిక స్థావరాలను టార్గెట్ చేస్తూ దాడులు చేసింది. యూఏఈ, సౌదీ అరేబియా, ఖతార్, కువైట్, బహ్రైయిన్ దేశాలపై డ్రోన్లు, మిస్సైళ్లతో దాడులు చేసింది.
ఇదిలా ఉంటే, ఇరాన్‌పై మళ్లీ దాడులు చేసే విషయంలో డొనాల్డ్ ట్రంప్ వైఖరి మారినట్లు తెలుస్తోంది. ఇరాన్ లేదా యెమెన్‌లోని హౌతీలు కవ్వింపు చర్యలకు పాల్పడకపోతే ఇరాన్‌పై మరోసారి దాడి చేయకుండా ఉండేందుకు అవకాశం ఉందని ట్రంప్ తన సీనియర్ సలహాదారుల వద్ద ప్రస్తావించినట్లు నివేదికలు వెల్లడించాయి. గత రెండు వారాలుగా ట్రంప్ సౌదీ యువరాజు మొహమ్మద్ బిన్ సల్మాన్, టర్కీ అధ్యక్షుడు తయ్యిప్ ఎర్డోగాన్ అభిప్రాయాలను కోరినట్లు తెలుస్తోంది. ఇరాన్‌పై మళ్లీ దాడులు చేయవద్దని వారిద్దరూ సూచించినట్లు తెలుస్తోంది.