Kashmir Issue: పాకిస్థాన్‌పై భారత్ ఆగ్రహం.. ఉగ్రవాదాన్ని పెంచే దేశం మానవ హక్కుల గురించి మాట్లాడటం హాస్యాస్పదం..

ఐక్యరాజ్యసమితిలో భారత శాశ్వత ప్రతినిధి, రాయబారి హరీష్ పర్వతనేని, భద్రతా మండలిలో పాకిస్థాన్‌పై తీవ్ర విమర్శలు చేశారు. సాయుధ ఘర్షణలలో పౌరుల రక్షణపై యూఎన్‌ఎస్‌సీ నిర్వహించే వార్షిక బహిరంగ చర్చలో ఆయన మాట్లాడుతూ, ప్రపంచ వేదికపై పాకిస్థాన్ క్రూరత్వాన్ని బట్టబయలు చేశారు. ఐక్యరాజ్యసమితి వేదికగా భారత్ మరోసారి పాకిస్థాన్ కు ఘాటుగా సమాధానం ఇచ్చింది.

కశ్మీర్ అంశంపై పాకిస్థాన్ చేసిన వ్యాఖ్యలకు స్పందించిన భారత్, “జాతి నిర్మూలన చరిత్ర కలిగిన దేశం కశ్మీర్ గురించి ఉపన్యాసాలు ఇవ్వడం వ్యంగ్యంగా ఉంది” అంటూ తీవ్ర స్థాయిలో విమర్శించింది. ఐక్యరాజ్యసమితి సమావేశంలో పాకిస్థాన్ ప్రతినిధి కశ్మీర్ అంశాన్ని ప్రస్తావించగా, భారత ప్రతినిధి దానికి కఠినంగా స్పందించారు. పాకిస్థాన్ దశాబ్దాలుగా సరిహద్దు ఉగ్రవాదాన్ని ప్రోత్సహిస్తోందని, మానవ హక్కుల గురించి మాట్లాడే నైతిక హక్కు ఆ దేశానికి లేదని భారత్ పేర్కొంది.

భారత్ ప్రతినిధి మాట్లాడుతూ, “ఉగ్రవాదాన్ని ఆశ్రయిస్తూ, మైనారిటీలపై దాడులు జరిగే దేశం ప్రపంచానికి మానవ హక్కుల పాఠాలు చెప్పడం విచిత్రం” అని అన్నారు. అలాగే కశ్మీర్ భారత్‌లో అంతర్భాగమని, ఆ విషయంలో ఇతర దేశాల జోక్యం అనవసరమని స్పష్టం చేశారు.

ఇటీవల అంతర్జాతీయ వేదికలపై పాకిస్థాన్ తరచూ కశ్మీర్ అంశాన్ని ప్రస్తావిస్తుండగా, భారత్ ప్రతి సారి అదే స్థాయిలో బలమైన ప్రతిస్పందన ఇస్తోంది. ఉగ్రవాదం, మత వివక్ష, మైనారిటీల భద్రత వంటి అంశాల్లో పాకిస్థాన్ రికార్డు ప్రపంచానికి తెలిసిందేనని భారత్ వ్యాఖ్యానించింది. భారత్ ఈ వ్యాఖ్యలతో మరోసారి కశ్మీర్ విషయంలో తన వైఖరి స్పష్టంగా వెల్లడించింది. “ఉగ్రవాదం, చర్చలు ఒకేసారి సాగవు” అనే తమ విధానాన్ని కూడా పునరుద్ఘాటించింది.