Canada: నడిరోడ్డుపై భారతీయులు డ్యాన్స్‌లు.. నెట్టింట తీవ్ర వివాదం

అనువుగాని చోట అధికులమనరాదు అని పెద్దలు అంటారు. ఈ మాట అక్షర సత్యమే. అన్ని చోట్ల హంగామా సృష్టిద్దాం అంటే కుదరదు. లేదంటే లేనిపోని ఇబ్బందులు తెచ్చుకోవాల్సి వస్తుంది. తాజాగా కెనడాలోని టొరంటో నగరంలో భారతీయులు నిర్వహించిన సాంస్కృతిక కార్యక్రమాలు ఇప్పుడు సోషల్ మీడియా వేదికగా తీవ్ర వివాదంగా మారింది. వలసలపై రచ్చ రచ్చ అవుతోంది. అసలేం జరిగింది. ఎందుకు వివాదం చెలరేగిందో తెలియాలంటే ఈ వార్త చదవాల్సిందే.

కెనడాలోని టొరంటో నగర వీధుల్లో భారతీయలు సాంస్కృతిక కార్యక్రమాలు నిర్వహించారు. ఇందుకు సంబంధించిన వీడియో సోషల్ మీడియాలో వైరల్‌గా మారింది. వందలాది మంది భారతీయులు సంప్రదాయ సంగీతం, నృత్యాలు చేశారు. ఆడామగా తేడా లేకుండా డ్యాన్స్‌లు చేశారు. ఇక ఆహార స్టాళ్ల దగ్గరైతే సందడి చేశారు. ఇందుకు సంబంధించిన వీడియోలు వైరల్‌గా మారడంతో ప్రపంచవ్యాప్తంగా తీవ్ర చర్చకు దారితీసింది. అయితే ఈ వేడుక కంటే.. దీనిపై రచ్చే పెద్ద చర్చనీయాంశంగా మారింది.

వివాదాస్పద వ్యాఖ్య

ఒక వినియోగదారుడు ‘‘కెనడా ఇప్పుడు భారతీయుల కాలనీగా మారిపోయింది. ఇది జరగనివ్వకూడదు.’’ అనే వివాదాస్పద వ్యాఖ్య చేశాడు. దీంతో పోస్టు క్షణాల్లోనే వైరల్ అయింది. వేలాది మంది అనుకూల, ప్రతికూల వ్యాఖ్యలు చేస్తూ పెద్ద ఎత్తున చర్చ మొదలుపెట్టారు. కొంతమంది నెటిజన్లు కెనడాలో పెరుగుతున్న భారతీయ వలసలపై ఆందోళన వ్యక్తం చేశారు. స్వదేశ సంస్కృతిని విదేశాల్లోనూ కొనసాగించడం కంటే స్థానిక సంస్కృతిలో కలిసిపోవాలని వలసదారులు ప్రయత్నించాలని అభిప్రాయపడ్డారు. కొందరైతే మరింత ముందుకు వెళ్లి ఇలాంటి భారీ సాంస్కృతిక వేడుకలను అధికారులు పరిమితం చేయాలని డిమాండ్ చేశారు. ఇలా సోషల్ మీడియా వేదికగా తీవ్ర వివాదంగా మారింది.

మరోవైపు మద్దతు

మరోవైపు భారీ సంఖ్యలో నెటిజన్లు భారతీయ వలసదారులకు మద్దతుగా నిలిచారు. కెనడా అభివృద్ధిలో వలసదారుల పాత్ర కీలకమని.. వారు అధిక పన్నులు చెల్లించడంతో పాటు కార్మిక లోటును భర్తీ చేస్తున్నారని పేర్కొన్నారు. ఒక సాంస్కృతిక వేడుకను లక్ష్యంగా చేసుకుని విమర్శలు చేయడం సరైంది కాదని.. ప్రజలు ఆనందంగా జరుపుకుంటున్న కార్యక్రమంలో తప్పేముందని ప్రశ్నించారు. భారతీయులకు మద్దతుగా మాట్లాడారు.

బహుళ సంస్కృతుల దేశంగా కెనడా

కెనడా బహుళ సంస్కృతుల సమాజంగా ప్రపంచవ్యాప్తంగా గుర్తింపు పొందింది. వివిధ దేశాల ప్రజలు తమ సంప్రదాయాలను, సంస్కృతులను పరిరక్షించుకునే స్వేచ్ఛ అక్కడ ఉంది. అయితే ఇటీవలి కాలంలో ఆర్థిక ఒత్తిళ్లు, జనాభా మార్పులు, వలసల పెరుగుదల వంటి అంశాలు కొన్ని వర్గాల్లో అసంతృప్తికి దారితీస్తున్నాయని విశ్లేషకులు చెబుతున్నారు. టొరంటోలో జరిగిన ఈ ఘటన కేవలం ఒక వైరల్ వీడియోకే పరిమితం కాకుండా.. ప్రపంచంలోని పలు అభివృద్ధి చెందిన దేశాల్లో వలసలు, సమీకరణ, బహుళ సంస్కృతుల విధానాలపై కొనసాగుతున్న చర్చలకు ప్రతిబింబంగా మారింది. భారతీయ వలసదారులపై పెరుగుతున్న విమర్శలు, మరోవైపు వారికి లభిస్తున్న మద్దతు ప్రస్తుతం సోషల్ మీడియాలో తీవ్ర చర్చకు కారణమవుతున్నాయి.

 

Canada has turned into an Indian colony!!!!

Canadians are now a minority in Toronto and the flood of immigrants is larger than ever before.

We cannot let this happen to us. Wake up!!!! pic.twitter.com/TIxnzuLeS7

— Știrile Rezistenței 🇷🇴 🇷🇺 (@RomaniaMare1918) June 2, 2026