Donald Trump: ట్రంప్ ఇంట్లోకి ఆగంతకుడు.. కాల్చి చంపిన సెక్యూరిటీ..

Donald Trump: అమెరికా అధ్యక్షుడు డొనాల్డ్ ట్రంప్‌కు చెందిన ఫ్లోరిడాలోని మార్-ఏ-లాగో రిసార్ట్ లోకి అనధికారికంగా ప్రవేశించిన చొరబాటుదారుడిని భద్రతా సిబ్బంది కాల్చి చంపారు. మార్ ఎ లాగో ఎస్టేట్ ఆవరణలోకి అక్రమంగా ప్రవేశించిన ఒక సాయుధ వ్యక్తిని సీక్రెట్ సర్వీస్ ఏజెంట్లు హతమార్చారు. ఈ సంఘటన జరిగిన సమయంలో ట్రంప్ అక్కడ లేరు.

ఈ విషయాన్ని యూఎస్ సీక్రెట్ సర్వీస్ అధికారి గుగ్లియెల్మీ ఎక్స్ పోస్టులో ధ్రువీకరించారు. ‘‘ఈ ఉదయం మార్ ఎ లాగో వద్ద సురక్షిత సరిహద్దుల్లోకి ప్రవేశించిన సాయుధ వ్యక్తిని కాల్చి చంపాము’’ అని పేర్కొన్నారు. దుండగుడి వద్ద ఒక తుపాకీ, ఫ్యూయల్ క్యాన్ ఉన్నట్లు సంబంధిత వర్గాలు వెల్లడించాయి. ఈ సంఘటన ఈరోజు తెల్లవారుజామున 1.30 గంటలకు జరిగిందని, మరణించిన వ్యక్తికి 20 ఏళ్లు ఉన్నట్లుగా వెల్లడించారు.

Read Also: Akhilesh Yadav: ‘‘100 మంది ఎమ్మెల్యేలను తీసుకొచ్చి మీరే సీఎం అవ్వండి’’.. అఖిలేష్ బంపర్ ఆఫర్..

ఈ ఘటన జరిగిన సమయంలో ట్రంప్ వాషింగ్టన్ లో ఉన్నారు. పామ్ బీచ్ కౌంటీ షెరీఫ్ ఆఫీస్ డిప్యూటీ, సీక్రెట్ సర్వీస్ ఏజెంట్లు దుండగుడిపై కాల్పులు జరపడంతో అక్కడికక్కడే మరణించినట్లు తెలిపారు. ఈ ఘటనలో భద్రతా సిబ్బందికి ఎలాంటి గాయాలు కాలేదు. ముందుగా దుండగుడిని అతడి వద్ద ఉన్న వస్తువుల్ని కింద పారేయాలని భద్రతా సిబ్బంది హెచ్చరించింది, అయితే అతను గన్ మీదకు ఎత్తడంతో కాల్చి చంపినట్లు తెలుస్తోంది.

మార్ ఎ లాగో అనేది ఫ్లోరిడాలోని పామ్ బీచ్‌లో డొనాల్డ్ ట్రంప్ ప్రైవేట్ ప్రాపర్టీ. దీనిని 1920లలో సముద్ర తీరంలో నిర్మించారు. 1985లో ఈ ప్రాపర్టీని ట్రంప్ కొనుగోలు చేశారు. దీనిని తరుచుగా ‘‘వింటర్ వైట్‌హౌజ్’’ అని పిలుస్తారు. ఇది రాజకీయ సమావేశాలకు, నిధుల సేకరణ, దౌత్య అతిథులకు వేదికగా నిలుస్తోంది. అధ్యక్షుడు ట్రంప్ విడిది ఇల్లుగా పనిచేస్తోంది.