Explainer: భారీ షాక్.. అక్టోబర్ 1 నుంచి పెరగనున్న ధరలు!

పండుగల సీజన్ మొదలవ్వకముందే షాపింగ్ చేయాలనుకుంటున్న వారికి షాక్ ఇచ్చే వార్త ఇది. అక్టోబర్ 1 నుంచి ఏసీలు, టీవీలు, వాషింగ్ మెషీన్లు, రిఫ్రిజిరేటర్లు లాంటి ముఖ్యమైన పరికరాల ధరలు పెరిగే అవకాశం ఉంది. తయారీ సంస్థలు కొన్ని ఉత్పత్తులపై దాదాపు 5 నుంచి 8 శాతం వరకు ధరలు పెంచేందుకు సిద్ధమవుతున్నాయి. మరికొన్ని ఉత్పత్తుల ధరలు 3 నుంచి 4 శాతం వరకు పెరగొచ్చని పరిశ్రమ వర్గాలు చెబుతున్నాయి.

వాస్తవానికి పండుగల సమయంలో టీవీలు, ఏసీలు, ఫ్రిజ్‌లు, వాషింగ్ మెషీన్లు లాంటి వస్తువులకు డిమాండ్ భారీగా ఉంటుంది. దసరా, దీపావళి లాంటి పండుగలను దృష్టిలో పెట్టుకుని చాలా మంది ఈ సమయంలోనే కొత్త ఎలక్ట్రానిక్ వస్తువులు కొనుగోలు చేస్తుంటారు.

అయితే ఈసారి ఆ కొనుగోళ్లకు అదనపు ఖర్చు అయ్యే పరిస్థితి కనిపిస్తోంది. తయారీ సంస్థలపై ఉత్పత్తి ఖర్చులు, రవాణా ఖర్చులు పెరగడంతో ఆ భారాన్ని కొంతవరకు వినియోగదారులపైకి మళ్లించాల్సి రావచ్చట. ముఖ్యంగా ఏసీల ధరలు 5 నుంచి 8 శాతం వరకు పెరగవచ్చని తెలుస్తోంది. కొన్ని కంపెనీలు వాషింగ్ మెషీన్లు, రిఫ్రిజిరేటర్లు, ఎల్‌ఈడీ టీవీల ధరలను కూడా 3 నుంచి 4 శాతం వరకు పెంచుతున్నాయి. ఇప్పటికే కొన్ని సంస్థలు వివిధ ఉత్పత్తులపై 4 నుంచి 10 శాతం వరకు ధరల పెంపును ప్రకటించినట్లు సమాచారం. బ్లూ స్టార్, గోద్రెజ్ అప్లయెన్సెస్, హైయర్, డైకిన్, సూపర్ ప్లాస్ట్రానిక్స్ లాంటి సంస్థలు ధరల పెంపుపై నిర్ణయాలు తీసుకున్నాయి.

అయితే పానాసోనిక్ మాత్రం పరిస్థితిని ఇంకా పరిశీలిస్తున్నట్లు తెలిపింది. ఈ ధరల పెంపునకు ప్రధాన కారణాల్లో ముడి సరుకుల ధరలు పెరగడం ఒకటి. ఏసీలు, ఫ్రిజ్‌లు లాంటి ఉత్పత్తుల తయారీలో ఉపయోగించే రాగి, స్టీల్, ప్లాస్టిక్ లాంటి వస్తువుల ధరలు పెరిగాయి.

దీనికి తోడు రవాణా, సరుకు రవాణా ఖర్చులు కూడా పెరిగాయి. డాలర్‌తో రూపాయి మారకం విలువలో మార్పులు కూడా దిగుమతులు, ఉత్పత్తి వ్యయాలపై ప్రభావం చూపుతున్నాయి. పశ్చిమాసియాలో కొనసాగుతున్న సంక్షోభం కారణంగా సరఫరా వ్యవస్థలపై ఒత్తిడి పెరగడం కూడా ఖర్చులను ప్రభావితం చేస్తున్నట్లు పరిశ్రమ వర్గాలు చెబుతున్నాయి. డైకిన్ ఇప్పటికే సెప్టెంబర్ 16 నుంచి కొన్ని ఉత్పత్తుల ధరలను 8 నుంచి 10 శాతం వరకు పెంచినట్లు చెప్పింది.

బ్లూ స్టార్ కూడా ఏసీలు, డీప్ ఫ్రీజర్ల ధరలు ఇప్పటికే 5 నుంచి 8 శాతం వరకు పెరిగాయని తెలిపింది. మరోవైపు ధరలు పెంచితే అమ్మకాలు కొంత తగ్గే అవకాశం ఉన్నప్పటికీ పెరుగుతున్న ఉత్పత్తి ఖర్చుల కారణంగా ధరలను పెంచడం తప్ప మరో మార్గం లేదని హైయర్ ఇండియా అంటోంది.

అయితే వినియోగదారులకు పూర్తిగా ఈ పెంపు వెంటనే కనిపించకపోవచ్చని పరిశ్రమ వర్గాలు చెబుతున్నాయి. ఎందుకంటే ఆగస్టు, సెప్టెంబర్ నెలల్లో డీలర్లు, పంపిణీదారులు పాత ధరలకే కొంత స్టాక్‌ను ముందుగానే కొనుగోలు చేసి పెట్టుకున్నారు. అందువల్ల ఆ పాత స్టాక్ అందుబాటులో ఉన్నంత వరకు కొన్ని చోట్ల పాత ధరలకు లేదా తగ్గింపులతో వస్తువులు లభించే అవకాశం ఉంటుంది. కానీ కొత్త ధరలతో స్టాక్ మార్కెట్‌లోకి వచ్చిన తర్వాత పరిస్థితి మారొచ్చు. ఇక పండుగ సీజన్‌లో కొనుగోళ్లపై ఈ ధరల పెంపు ఎంత ప్రభావం చూపుతుందనేది ఆసక్తికరంగా మారింది. ధరలు పెరగడంతో కొందరు కొనుగోళ్లను వాయిదా వేసుకునే అవకాశం ఉండగా, మరికొందరు ధరలు ఇంకా పెరిగేలోపు కొనుగోలు చేయాలని భావించవచ్చు.

మొత్తంగా చూస్తే అక్టోబర్ 1 నుంచి పరికరాల మార్కెట్‌లో ధరల మార్పులు కనిపించే అవకాశం ఉంది. కాబట్టి పండుగల సందర్భంగా ఏసీ, టీవీ లేదా ఇతర పెద్ద అప్లయెన్స్ కొనాలని ప్లాన్ చేస్తున్నవారు ప్రస్తుతం ఉన్న ధరలు, పండుగ ఆఫర్లు, డీలర్ డిస్కౌంట్లను ఒకసారి పోల్చి చూసుకోవడం ఉపయోగకరంగా ఉంటుంది.