నగరంలోని కొత్తపేట పరిధిలో తీవ్ర విషాదం చోటుచేసుకుంది. క్షణికావేశంలో చెలరేగిన కుటుంబ కలహాలు నిండు ప్రాణాన్ని బలిగొన్నాయి. భార్యాభర్తల మధ్య జరిగిన తీవ్ర వాగ్వాదం చివరకు భర్త హత్యకు దారితీసిన ఘటన చైతన్యపురి పోలీస్ స్టేషన్ పరిధిలో కలకలం సృష్టించింది.
వాగ్వాదం.. విచక్షణ కోల్పోయి దాడి
పోలీసులు, స్థానికులు తెలిపిన వివరాల ప్రకారం.. కొత్తపేటకు చెందిన ప్రభాకర్, ఆయన భార్య మధ్య శనివారం తీవ్రస్థాయిలో ఘర్షణ చోటుచేసుకుంది. మాటామాటా పెరగడంతో విచక్షణ కోల్పోయిన భార్య, ఇంట్లోని పదునైన కత్తితో ప్రభాకర్‌పై తీవ్రంగా దాడి చేసింది. తీవ్ర రక్తస్రావంతో అతను అక్కడికక్కడే కుప్పకూలాడు.
ఆసుపత్రికి చేరేలోపే మృతి
రక్తపు మడుగులో ఉన్న ప్రభాకర్‌ను కుటుంబ సభ్యులు, స్థానికులు వెంటనే సమీపంలోని కొత్తపేట ఓమ్ని (Omni) ఆసుపత్రికి తరలించారు. అయితే, అప్పటికే అతను మృతి చెందినట్లు పరీక్షించిన వైద్యులు ధ్రువీకరించారు.
రంగంలోకి దిగిన పోలీసులు.. భార్య అరెస్ట్
సమాచారం అందుకున్న చైతన్యపురి పోలీసులు వెంటనే సంఘటనా స్థలానికి చేరుకుని వివరాలు సేకరించారు. మృతదేహాన్ని పోస్ట్‌మార్టం నిమిత్తం ఉస్మానియా ప్రభుత్వ ఆసుపత్రికి తరలించారు. దాడికి పాల్పడిన నిందితురాలైన భార్యను పోలీసులు అదుపులోకి తీసుకున్నారు. వారి మధ్య గొడవకు గల అసలు కారణాలు, ఇతర కుటుంబ వివాదాలపై కేసు నమోదు చేసి దర్యాప్తు కొనసాగిస్తున్నారు.