Honour Killing: గోల్కొండలో ఘోరం.. యూట్యూబర్‌ను వెంటాడి చంపిన వైనం..!

Honour Killing: హైదరాబాద్‌లోని గోల్కొండ పోలీస్ స్టేషన్ పరిధిలో ఘోరమైన పరువు హత్య ఉదంతం వెలుగుచూసింది. కేవలం ప్రేమ వివాహం చేసుకున్నాడనే కక్షతో ఒక యువ యూట్యూబర్‌ను నడిరోడ్డుపై దారుణంగా కొట్టి చంపిన ఘటన స్థానికంగా తీవ్ర కలకలం రేపింది. పోలీసులు తెలిపిన వివరాల ప్రకారం.. మసూద్ అనే యూట్యూబర్ గత 2025లో రుక్షార్ బేగం అనే యువతిని ప్రేమించి పెళ్లి చేసుకున్నాడు. అయితే, వీరి ప్రేమ వివాహాన్ని యువతి కుటుంబ సభ్యులు మొదటి నుంచీ తీవ్రంగా వ్యతిరేకిస్తూ మసూద్‌పై పగ పెంచుకున్నారు. ఈ క్రమంలోనే నాలుగు రోజుల క్రితం ప్రియురాలి కుటుంబ సభ్యులు పథకం ప్రకారం మసూద్ ఇంటికి వచ్చి కర్రలు, ఇనుప రాడ్లు, , కత్తులతో ఒక్కసారిగా దాడికి తెగబడ్డారు. నడిరోడ్డుపైనే ఆయనను తీవ్రంగా గాయపరిచి రక్తం మడుగులో ముంచి కిరాతకంగా హతమార్చారు.

ఈ ఘోర హత్యోదంతంపై కేసు నమోదు చేసుకున్న గోల్కొండ పోలీసులు దర్యాప్తును వేగవంతం చేశారు. ఘటనా స్థలంలో లభించిన ఆధారాలు, కుటుంబ సభ్యుల ఫిర్యాదు మేరకు నిందితుల కోసం గాలింపు చర్యలు చేపట్టి, యూట్యూబర్ మసూద్ హత్యకు కారణమైన నలుగురు ప్రధాన నిందితులను పోలీసులు ఎట్టకేలకు అరెస్ట్ చేశారు. నిందితులపై హత్య కేసు నమోదు చేసి రిమాండ్‌కు తరలించినట్లు గోల్కొండ పోలీసులు వెల్లడించారు. ప్రేమించి పెళ్లి చేసుకున్నందుకే ఒక యువకుడి ప్రాణాలు తీయడంపై మృతుడి కుటుంబంలో తీవ్ర విషాదం నిండగా, స్థానిక ప్రజలు ఈ అమానుష చర్యపై తీవ్ర ఆగ్రహం వ్యక్తం చేస్తున్నారు.