Sugar Price Hike: కొండెక్కుతున్న చక్కెర ధరలు.. కేంద్ర ప్రభుత్వం సంచలన నిర్ణయం..

Sugar Price Hike: దేశంలో చక్కెర అక్రమ నిల్వలు (జమాఖోరీ), బ్లాక్ మార్కెటింగ్‌కు అడ్డుకట్ట వేసేందుకు కేంద్ర ప్రభుత్వ వాణిజ్య, పరిశ్రమల మంత్రిత్వ శాఖ రంగంలోకి దిగింది. దిగుమతి చేసుకున్న ముడి చక్కెరను నిల్వ ఉంచకుండా, వెంటనే మార్కెట్‌లోకి అందుబాటులోకి తెచ్చి వినియోగదారులకు ఉపశమనం కలిగించే లక్ష్యంతో సుగర్ దిగుమతి నిబంధనలలో మార్పులు చేస్తూ నోటిఫికేషన్ విడుదల చేసింది. ఈ క్రమంలో అక్టోబర్ 31 నాటికి 10 లక్షల టన్నుల చక్కెర దిగుమతికి ప్రభుత్వం అనుమతి ఇవ్వడమే కాకుండా, కూల్ డ్రింక్స్, ఐస్‌క్రీమ్ తయారీదారులు, హోల్‌సేల్ వ్యాపారులపై నిల్వల పరిమితి (స్టాక్ లిమిట్) విధిస్తూ కఠిన చర్యలు చేపట్టింది. చక్కెర నిల్వల నల్లబజారును అరికట్టాలని పలు రాష్ట్రాలు కేంద్రానికి విజ్ఞప్తి చేయడంతో ఈ కీలక నిర్ణయం తీసుకున్నారు.

గడిచిన నెల రోజుల్లోనే చక్కెర ధరలు ఆందోళనకర రీతిలో ఆకాశాన్ని అంటాయి. సోమవారం నాటికి దేశవ్యాప్తంగా చక్కెర సగటు రిటైల్ ధర కిలోకు రూ. 63.05కు చేరింది. నెల రోజుల క్రితం ఉన్న రూ. 48.73తో పోలిస్తే ఇది ఏకంగా 29 శాతం పెరుగుదల కావడం గమనార్హం. కొన్ని ప్రాంతాల్లో గరిష్ట రిటైల్ ధర కిలోకు ఏకంగా రూ. 75 దాటింది. కేవలం 7 నుంచి 10 రోజుల వ్యవధిలోనే మిల్లుల వద్ద చక్కెర ధర కిలోకు రూ. 47-48 నుంచి రూ. 62కు పెరిగిపోవడం షాకింగ్ విషయమని ఆహార కార్యదర్శి సంజీవ్ చోప్రా పేర్కొన్నారు. అయితే దేశంలో చక్కెర కొరత ఏమీ లేదని, ప్రస్తుతం ఉన్న స్టాక్ సరిపోతుందని ఇండియన్ షుగర్ మ్యానుఫ్యాక్చరర్స్ అసోసియేషన్ (ISMA) ఛైర్మన్ నీరజ్ శిర్‌గాంవకర్ స్పష్టం చేశారు. మరి ధరలు ఇంతలా పెరగడానికి ప్రధాన కారణం ప్రతికూల వాతావరణం వల్ల చెరకు దిగుబడి తగ్గడం, మహారాష్ట్రలో క్రషింగ్ రేటు పెరగడం, ఉత్తరప్రదేశ్‌లో రకాల సమస్యలు రావడం. దీనికి తోడు పండుగల సీజన్ కావడంతో డిమాండ్ ఒక్కసారిగా పెరిగింది. మరోవైపు బ్రెజిల్ నుంచి సరఫరా తగ్గడం, పెద్ద వ్యాపారులు చక్కెరను పెద్ద మొత్తంలో కొనుగోలు చేసి కృత్రిమ కొరతను సృష్టించడం, స్పెక్యులేషన్ (సట్టేబాజీ) వంటివి కూడా ధరల మంటకు కారణమయ్యాయి. హోల్‌సేల్ కొనుగోలుదారులు సరుకును దాచిపెట్టడంతో మార్కెట్‌లో కొరత ఏర్పడి ధరలు ఆకాశాన్ని తాకాయి. కేంద్రం తీసుకున్న ఈ తాజా నిబంధనల వల్ల చక్కెర ధరలు త్వరలోనే అదుపులోకి వస్తాయని భావిస్తున్నారు.