దసరా పండుగను పురస్కరించుకుని విద్యుత్ వాహన తయారీ సంస్థ ఓలా ఎలక్ట్రిక్ ప్రత్యేక సేల్‌ను ప్రకటించింది. రూ. 49,999కి ఎస్ 1 స్కూటర్, రూ. 40,000 వరకు విలువైన పండుగ ఆఫర్‌లను వెల్లడించింది. ఇందులో హైపర్‌చార్జింగ్ క్రెడిట్‌లు, MoveOS+ అప్గ్రేడ్, యాక్సెసరీస్ & కేర్+పై ప్రత్యేకమైన డీల్‌లు, ఇర్రెసిస్టిబుల్ అద్భుతమైన ఆఫర్లు ఉన్నాయి. బిగ్గెస్ట్‌ ఓలా సీజన్‌ సేల్‌ను గురువారం (అక్టోబర్‌ 3) నుంచి మొదలు పెట్టింది.
ఇందులో భాగంగా ఎస్1 ఎక్స్ స్కూటర్‌ను రూ.49,999కే అందిస్తామని కంపెనీ ప్రకటించింది. అయితే లిమిటెడ్‌ యూనిట్లకు మాత్రమేనని తెలిపింది. అలాగే హైపర్‌ ఛార్జింగ్‌ క్రెడిట్స్‌, మూవ్‌ఓస్+ అప్గ్రేడ్, యాక్సెసరీస్‌పై డీల్స్‌ వంటి రూ.40వేల విలువైన ప్రయోజనాలను అందిస్తోంది. పండుగ సందర్భంగా కస్టమర్ల కోసం ఈ ఆఫర్‌ తీసుకురావడం సంతోషంగా ఉందని ఓలా ఎలక్ట్రిక్ సీఈఓ, ఎండీ భవీశ్‌ అగర్వాల్‌ తెలిపారు. ఇప్పటి వరకు తాము ప్రకటించిన ఆఫర్లలో ఇదే అత్యుత్తమమైనదని తెలిపారు.
ఓలా ఆఫర్లు ఇవే..
ఓలా ఎస్1 ఎక్స్ 2 కిలో వాట్‌ అవర్‌ బ్యాటరీ సామర్థ్యం కలిగిన స్కూటర్‌ను రూ.49,999కే అందించనున్నారు.
రూ.7వేల విలువైన 8 ఏళ్లు/80 వేల కిలోమీటర్ల బ్యాటరీ వారెంటీ ఉచితం
ఎస్1 ఎక్స్ 2kWh బ్యాటరీపై రూ.25వేల ఫ్లాట్‌ డిస్కౌంట్‌, ఎస్ 1 పోర్ట్‌ఫోలియోపై రూ.15వేల వరకు క్యాష్‌ డిస్కౌంట్‌ అందిస్తామని కంపెనీ తెలిపింది.
క్రెడిట్‌ కార్డు ఈఎంఐలపై రూ.5వేల వరకు తగ్గింపు
రూ.6 వేల విలువైన మూవ్‌ ఓఎస్‌+ అప్గ్రేడ్, రూ.7 వేలు విలవైన హైపర్‌ ఛార్జింగ్‌ క్రెడిట్స్‌ ఫ్రీగా అందిస్తారు.