Maxwell Engineering Solutions IPO Listing: మ్యాక్స్‌వెల్ ఇంజినీరింగ్ సొల్యూషన్స్ లిమిటెడ్ ఐపీఓ ఇన్వెస్టర్లకు అదిరిపోయే లాభాలను అందించింది. స్టాక్ మార్కెట్లో ఈ కంపెనీ షేర్లు ఇష్యూ ధరతో పోలిస్తే ఏకంగా 90% ప్రీమియంతో రూ.300.20 వద్ద లిస్ట్ అయ్యాయి. ఐపీఓలో ఒక్కో షేరు ధరను రూ.158గా నిర్ణయించారు. లిస్టింగ్ తర్వాత కూడా షేర్లలో కొనుగోళ్ల జోరు కొనసాగింది.
ఈ ఐపీఓలో ఒక్కో లాట్‌కు 800 షేర్లను కేటాయించారు. కనీసం రెండు లాట్లకు దరఖాస్తు చేయాల్సి రావడంతో రిటైల్ ఇన్వెస్టర్లు కనీసం రూ.2,52,800 పెట్టుబడి పెట్టాల్సి వచ్చింది. రెండు లాట్లు అంటే 1,600 షేర్లు అలాట్ అయిన వారికి లిస్టింగ్ సమయంలో పెట్టుబడి విలువ రూ.4,80,320కు చేరింది. అంటే ఒక్కో షేరుపై రూ.142.20 లాభం చొప్పున మొత్తం రూ.2,27,520 లాభం వచ్చింది. ఇది ఇష్యూ ధరతో పోల్చిన లిస్టింగ్ విలువ ఆధారంగా లెక్కించిన లాభం.
మార్కెట్లో లిస్ట్ అయిన తర్వాత కూడా మ్యాక్స్‌వెల్ ఇంజినీరింగ్ సొల్యూషన్స్ షేర్లలో ర్యాలీ కొనసాగింది. ప్రారంభ ట్రేడింగ్‌లోనే 4 శాతానికి పైగా పెరిగి ఇంట్రాడే గరిష్ఠంగా రూ.314.80 స్థాయిని తాకాయి. దీంతో ఐపీఓలో షేర్లు పొందిన ఇన్వెస్టర్లలో ఉత్సాహం నెలకొంది. ఈ కంపెనీ ఐపీఓ పరిమాణం రూ.57.64 కోట్లు. పూర్తిగా ఫ్రెష్ షేర్ల జారీ ద్వారా ఈ నిధులను సమీకరించింది. మొత్తం 36.48 లక్షల కొత్త షేర్లను విడుదల చేసింది. ప్రస్తుత వాటాదారులు తమ వద్ద ఉన్న ఒక్క షేరును కూడా విక్రయించలేదు.
అక్టోబర్ 30 నుంచి నవంబర్ 3 వరకు మూడు రోజుల పాటు అందుబాటులో ఉన్న ఈ ఐపీఓకు ఇన్వెస్టర్ల నుంచి భారీ స్పందన లభించింది. మొత్తంగా 536.80 రెట్లు సబ్‌స్క్రిప్షన్ నమోదైంది. అలాగే అక్టోబర్ 29న యాంకర్ ఇన్వెస్టర్ల కోసం ఐపీఓ అందుబాటులో ఉండగా, వారి నుంచి కంపెనీ రూ.16.18 కోట్లు సమీకరించింది. ఐపీఓ ద్వారా సమీకరించిన మొత్తాన్ని కంపెనీ పలు అవసరాలకు వినియోగించనుంది. కొత్త యంత్రాలు, ల్యాబ్ పరికరాలు, ఇతర సామగ్రి కొనుగోలుకు రూ.18 కోట్లు ఖర్చు చేయనుంది. కొత్త కార్యాలయ భవనం, తయారీ కేంద్రం నిర్మాణానికి రూ.6.50 కోట్లు కేటాయించింది. ఇప్పటికే ఉన్న రుణాలను పూర్తిగా లేదా పాక్షికంగా చెల్లించేందుకు రూ.4.30 కోట్లు, వర్కింగ్ క్యాపిటల్ అవసరాలకు రూ.14 కోట్లు వినియోగించనుంది. సాధారణ కార్పొరేట్ అవసరాల కోసం రూ.7.06 కోట్లు కేటాయించగా, ఐపీఓ నిర్వహణ ఖర్చులైన రూ.7.78 కోట్లను కూడా ఈ నిధుల నుంచే సర్దుబాటు చేయనుంది.
గమనిక: ఐపీఓలో లిస్టింగ్ లాభాలు భవిష్యత్తులోనూ కొనసాగుతాయని హామీ లేదు. పెట్టుబడి పెట్టే ముందు కంపెనీ ఆర్థిక పరిస్థితి, వ్యాపార వివరాలను పరిశీలించి, అవసరమైతే ఆర్థిక సలహాదారుని సంప్రదించాలి.