Indian Rupee: రూపాయికి ‘చీకటి’ రోజు.. జీవితకాల కనిష్టానికి పడిపోయిన భారత కరెన్సీ..

Indian Rupee Hits Record Low: పశ్చిమ ఆసియాలో కొనసాగుతున్న ఉద్రిక్తతలు భారత ఆర్థిక వ్యవస్థపై తీవ్ర ప్రభావాన్ని చూపుతున్నాయి. ముడిచమురు ధరలు ఆకాశాన్నంటుతుండటం, విదేశీ పెట్టుబడిదారులు తమ నిధులను వెనక్కి తీసుకోవడంతో (outflows), గురువారం భారత రూపాయి విలువ మునుపెన్నడూ లేనంతగా జీవితకాల కనిష్టానికి పడిపోయింది. అమెరికన్ డాలర్‌తో పోలిస్తే రూపాయి విలువ 0.1% తగ్గి 95.8525 వద్దకు చేరుకుంది. అంతకుముందు సెషన్‌లో నమోదైన 95.7950 కనిష్ట స్థాయి రికార్డును ఇది అధిగమించింది. ఈ ఒక్క వారంలోనే రూపాయి విలువ 1.4% మేర క్షీణించింది. మంగళవారం నుంచి గురువారం వరకు జరిగిన ప్రతి ట్రేడింగ్ సెషన్‌లోనూ రూపాయి కొత్త కనిష్టాలను నమోదు చేయడం గమనార్హం. ఇక, భారత్ తన చమురు అవసరాల కోసం దాదాపు 90 శాతం, గ్యాస్ అవసరాల కోసం 50 శాతం దిగుమతులపైనే ఆధారపడుతోంది. ఇరాన్ యుద్ధం ఇలాగే సుదీర్ఘకాలం కొనసాగితే, ఇతర వర్ధమాన దేశాల కరెన్సీల కంటే భారత రూపాయి మరింత బలహీనపడే ప్రమాదం ఉందని నిపుణులు హెచ్చరిస్తున్నారు. పెరిగిన చమురు ధరలు దేశ కరెంట్ ఖాతాపై ఒత్తిడిని పెంచుతుండటమే రూపాయి పతనానికి ప్రధాన కారణంగా మారుతోంది.