Emergency Fund: కష్టకాలంలో కాపాడేది ఎమర్జెన్సీ ఫండ్.. ఎంత పొదుపు అవసరం? ప్రతి కుటుంబం తెలుసుకోవాల్సిన విషయాలు

జీవితం సంతోషంగా సాగిపోతున్నంత కాలం ఏ బెరుకు ఉండదు. కానీ ఒక్కసారి జీవితంలో ఒడిదుడుకులు మొదలయ్యాయా? ఊపిరి ఆగినట్టే అనిపిస్తోంది. కష్టాలు ఎలాంటి ముందస్తు హెచ్చరిక లేకుండానే జీవితంలోకి వచ్చేస్తాయి. అనారోగ్యం, అకస్మాత్తుగా ఉద్యోగం కోల్పోవడం, కుటుంబంలో అత్యవసర పరిస్థితులు లేదా ఊహించని పెద్ద ఖర్చులు… ఇవన్నీ ఏ కుటుంబం ఆర్థిక ప్రణాళికనైనా క్షణాల్లో తారుమారు చేస్తాయి. ఇలాంటి క్లిష్ట పరిస్థితుల్లో మనకు అండగా నిలిచే పొదుపునే ‘అత్యవసర నిధి’ (Emergency Fund) అంటారు. ప్రస్తుతం దేశంలో వ్యక్తిగత రుణాలు పెరుగుతుండటం, కుటుంబాల ఆర్థిక బాధ్యతలు అధికమవుతున్న నేపథ్యంలో ప్రతి ఒక్కరూ అత్యవసర నిధిని ఏర్పాటు చేసుకోవడం ఎంతో అవసరం. ఇది సంక్షోభ సమయంలో అధిక వడ్డీకి అప్పులు చేయాల్సిన అవసరాన్ని తగ్గించడమే కాకుండా, ఆర్థిక భద్రతను కూడా కల్పిస్తుంది.

అత్యవసర నిధి ఎంత ఉండాలి?

అత్యవసర నిధికి ఒకే విధమైన సూత్రం అందరికీ వర్తించదు. మీ ఉద్యోగ స్థిరత్వం, కుటుంబ బాధ్యతలు, ఆదాయ వనరులు వంటి అంశాలను పరిగణనలోకి తీసుకుని ఈ నిధి పరిమాణాన్ని నిర్ణయించుకోవాలి.

1. స్థిరమైన ఉద్యోగం ఉన్న అవివాహితులు

మీకు స్థిరమైన ఉద్యోగం ఉండి, మీపై ఆధారపడే కుటుంబ సభ్యులు ఎవరూ లేకపోతే, కనీసం మూడు నెలల ఖర్చులకు సరిపడా అత్యవసర నిధి సిద్ధంగా ఉంచుకోవడం మంచిది.

2. వివాహితులు, కుటుంబ బాధ్యతలు ఉన్నవారు

మీరు వివాహితులై, కుటుంబ సభ్యుల బాధ్యతలు నిర్వహిస్తున్నట్లయితే, ఆరు నుంచి తొమ్మిది నెలల ఖర్చులకు సరిపడా నిధి అందుబాటులో ఉంచుకోవాలి. ఇది ఉద్యోగ మార్పులు లేదా అనుకోని పరిస్థితుల్లో కుటుంబానికి ఆర్థిక భరోసా కల్పిస్తుంది.

3. పిల్లలు, రుణాలు లేదా అనిశ్చిత ఆదాయం ఉన్నవారు

మీకు పిల్లలు, గృహ రుణం వంటి ఆర్థిక బాధ్యతలు ఉన్నా లేదా మీ ఆదాయం స్థిరంగా లేకపోయినా, కనీసం 12 నెలల ఖర్చులకు సరిపడా అత్యవసర నిధిని సిద్ధం చేసుకోవడం ఉత్తమం.

అత్యవసర నిధిని ఎక్కడ ఉంచాలి?

అత్యవసర నిధి ప్రధాన ఉద్దేశ్యం అధిక లాభాలు సంపాదించడం కాదు. అవసరమైన సమయంలో ఎలాంటి ఇబ్బంది లేకుండా వెంటనే డబ్బు అందుబాటులో ఉండటమే దీని ముఖ్య లక్ష్యం. అందువల్ల ఈ డబ్బును సురక్షితంగా, సులభంగా ఉపసంహరించుకునే అవకాశమున్న చోట పెట్టాలి. నిపుణుల సూచనల ప్రకారం, మొత్తం నిధిని ఒకే చోట ఉంచకుండా ఈ మూడు ఎంపికల్లో విభజించడం మంచిది.

పొదుపు ఖాతా (Savings Account)

మీ మొత్తం అత్యవసర నిధిలో ఒకటి నుంచి రెండు నెలల ఖర్చులకు సరిపడా మొత్తాన్ని సాధారణ పొదుపు ఖాతాలో ఉంచండి. అవసరమైనప్పుడు ATM, UPI లేదా నెట్ బ్యాంకింగ్ ద్వారా 24 గంటలూ ఈ డబ్బును వినియోగించుకోవచ్చు.

స్వీప్-ఇన్ ఫిక్స్‌డ్ డిపాజిట్లు (Sweep-in FDs)

ఇవి అత్యవసర నిధికి మంచి ఎంపికగా పరిగణిస్తారు. సాధారణ పొదుపు ఖాతా కంటే ఎక్కువ వడ్డీ లభిస్తుంది. అదే సమయంలో అవసరమైనప్పుడు డబ్బు ఆటోమేటిక్‌గా పొదుపు ఖాతాకు బదిలీ అవుతుంది. దీంతో లిక్విడిటీతో పాటు మెరుగైన రాబడిని కూడా పొందవచ్చు.

లిక్విడ్ మ్యూచువల్ ఫండ్లు (Liquid Mutual Funds)

మీ అత్యవసర నిధిలో మిగిలిన భాగాన్ని లిక్విడ్ మ్యూచువల్ ఫండ్లలో పెట్టుబడి పెట్టవచ్చు. వీటిలో రిస్క్ తక్కువగా ఉంటుంది. అవసరమైతే సాధారణంగా ఒకటి నుంచి రెండు పనిదినాల్లో డబ్బు మీ ఖాతాలోకి జమ అవుతుంది.

అత్యవసర పరిస్థితులు ఎప్పుడు వస్తాయో ఎవరూ ఊహించలేరు. కానీ వాటిని ఎదుర్కొనే ఆర్థిక సన్నద్ధత మాత్రం మన చేతుల్లోనే ఉంటుంది. మీ ఆదాయం, బాధ్యతలు, జీవనశైలికి అనుగుణంగా అత్యవసర నిధిని ఏర్పాటుచేసుకోవడం ద్వారా భవిష్యత్తులో ఎదురయ్యే ఆర్థిక ఒత్తిడిని తగ్గించుకోవచ్చు. చిన్న మొత్తాలతో ప్రారంభించినా, క్రమంగా ఈ నిధిని పెంచుకుంటూ వెళ్లడం ద్వారా మీ కుటుంబానికి బలమైన ఆర్థిక భద్రతను అందించవచ్చు.