Bank Holidays & Strike 2026: సెప్టెంబర్ 26 నుంచి వరుసగా బ్యాంకులకు సెలవులు.. 28 నుంచి 3 రోజుల సమ్మె

Bank Strike September 2026: బ్యాంకు ఖాతాదారులకు ముఖ్యమైన వార్త. సెప్టెంబర్ చివరి వారంలో వరుస సెలవులు, బ్యాంకు ఉద్యోగుల సమ్మె కారణంగా కొన్ని రోజుల పాటు బ్యాంకు బ్రాంచ్‌లలో సేవలకు అంతరాయం ఏర్పడే అవకాశం ఉంది. యునైటెడ్ ఫోరం ఆఫ్ బ్యాంక్ యూనియన్స్ (UFBU) సెప్టెంబర్ 28, 29, 30 తేదీల్లో మూడు రోజుల దేశవ్యాప్త సమ్మెకు పిలుపునిచ్చింది. అయితే సమ్మె జరిగితేనే బ్రాంచ్ సేవలపై ప్రభావం ఉంటుందని బ్యాంకులు తమ ప్రకటనల్లో పేర్కొన్నాయి. SBIతో పాటు ఇతర బ్యాంకులు కూడా కస్టమర్లకు ముందుగానే అవసరమైన లావాదేవీలు పూర్తి చేసుకోవాలని సూచించాయి.

సెప్టెంబర్ 26, 27న సాధారణ సెలవులు

సెప్టెంబర్ 26, 2026 శనివారం నాలుగో శనివారం కావడంతో బ్యాంకులకు సాధారణ సెలవు ఉంటుంది. సెప్టెంబర్ 27 ఆదివారం కావడంతో దేశవ్యాప్తంగా బ్యాంకు బ్రాంచ్‌లు మూసి ఉంటాయి. దీని తర్వాత సెప్టెంబర్ 28, 29, 30 తేదీల్లో UFBU మూడు రోజుల సమ్మెకు పిలుపునిచ్చింది. ఈ సమ్మె అమల్లోకి వస్తే సెప్టెంబర్ 26 నుంచి 30 వరకు వరుసగా ఐదు రోజుల పాటు బ్రాంచ్ కార్యకలాపాలకు అంతరాయం కలగవచ్చు.

28 నుంచి 30 వరకు మూడు రోజుల బ్యాంక్ సమ్మె

UFBU ప్రకటించిన షెడ్యూల్ ప్రకారం సెప్టెంబర్ 28, 29, 30 తేదీల్లో దేశవ్యాప్త సమ్మె జరగనుంది. ఐదు రోజుల బ్యాంకింగ్ వర్కింగ్ వీక్ అమలు, పెర్ఫార్మెన్స్ లింక్డ్ ఇన్సెంటివ్ (PLI) పథకం తదితర అంశాలపై యూనియన్లు తమ డిమాండ్లను ముందుకు తెచ్చాయి. సమ్మె జరిగే రోజుల్లో బ్యాంకు బ్రాంచ్‌లు, కార్యాలయాల పనితీరుపై ప్రభావం పడే అవకాశం ఉందని పలు బ్యాంకులు స్టాక్ ఎక్స్ఛేంజ్‌లకు ఇచ్చిన సమాచారంలో పేర్కొన్నాయి.

SBI కస్టమర్లకు సూచనలు

సెప్టెంబర్ చివర్లో బ్యాంకింగ్ సేవలకు అంతరాయం ఏర్పడే అవకాశం ఉన్న నేపథ్యంలో స్టేట్ బ్యాంక్ ఆఫ్ ఇండియా (SBI) కూడా కస్టమర్లను ముందుగానే అవసరమైన బ్యాంకింగ్ పనులు పూర్తి చేసుకోవాలని సూచించింది. అత్యవసర నగదు అవసరాల కోసం ATMలు, డిజిటల్ బ్యాంకింగ్ సేవలను ఉపయోగించుకోవాలని బ్యాంకులు సూచిస్తున్నాయి.

కస్టమర్లు ఈ సేవలను ఉపయోగించుకోవచ్చు:

ATM/ADWM ద్వారా నగదు ఉపసంహరణ
ఇంటర్నెట్ బ్యాంకింగ్
YONO
మొబైల్ బ్యాంకింగ్
UPI
ఇతర డిజిటల్ బ్యాంకింగ్ ఛానళ్లు

అయితే నగదు ఉపసంహరణ, డిజిటల్ లావాదేవీలు అందుబాటులో ఉన్నప్పటికీ, బ్రాంచ్‌లో చేయాల్సిన పనులు సమ్మె సమయంలో ఆలస్యం కావచ్చు.

అక్టోబర్ 1 నుంచి బ్యాంకులు తిరిగి పనిచేసే అవకాశం

సెప్టెంబర్ 28-30 సమ్మె తర్వాత అక్టోబర్ 1, గురువారం బ్యాంకింగ్ కార్యకలాపాలు సాధారణంగా ప్రారంభం కావాల్సి ఉంది. అనంతరం అక్టోబర్ 2న గాంధీ జయంతి సందర్భంగా బ్యాంకులకు దేశవ్యాప్తంగా సెలవు ఉంటుంది. అక్టోబర్ 3 శనివారం బ్యాంకులు తెరిచి ఉండవచ్చు, అయితే రాష్ట్రం/బ్యాంకు హాలిడే క్యాలెండర్‌ను బట్టి మార్పులు ఉండొచ్చు. అక్టోబర్ 4 ఆదివారం కావడంతో బ్యాంకులకు సాధారణ వారాంతపు సెలవు ఉంటుంది.

ఖాతాదారులు ఏం చేయాలి?

బ్యాంకులో వ్యక్తిగతంగా వెళ్లి చేయాల్సిన ముఖ్యమైన పనులు ఉంటే సెప్టెంబర్ 25లోపే పూర్తి చేసుకోవడం సౌకర్యంగా ఉంటుంది. ముఖ్యంగా నగదు డిపాజిట్/ఉపసంహరణ, చెక్, డాక్యుమెంట్ సమర్పణ వంటి బ్రాంచ్ ఆధారిత పనులను ముందుగానే ప్లాన్ చేసుకోవడం మంచిది.

pic.twitter.com/yMOc9xUBV3

— State Bank of India (@TheOfficialSBI) September 19, 2026