Ask YouTube: యూట్యూబ్ తన యూజర్ల కోసం సెర్చ్ అనుభవాన్ని సరికొత్తగా మార్చేందుకు రెడీ అవుతుంది. AI సాయంతో పనిచేసే ‘ఆస్క్ యూట్యూబ్’ (Ask YouTube) అనే సరికొత్త ఫీచర్ను తీసుకురాబోతోంది. ఈ ఫీచర్ అందుబాటులోకి వస్తే యూట్యూబ్ కేవలం వీడియోల ప్లాట్ఫామ్గానే కాకుండా, మన సందేహాలను తీర్చే ఒక వ్యక్తిగత ఏఐ అసిస్టెంట్గా మారనుంది. సాధారణంగా మనం యూట్యూబ్ సెర్చ్బార్లో ఏదైనా విషయం గురించి టైప్ చేస్తే.. దానికి సంబంధించిన వీడియోల లిస్ట్ వస్తుంది. కానీ ఇకపై ఆ పరిస్థితి మారబోతోంది. గూగుల్ తన జెమిని ఏఐ తరహాలోనే యూట్యూబ్లో కూడా నేరుగా ప్రశ్నలు అడిగే సదుపాయాన్ని కల్పిస్తోంది.
ఏమిటీ ‘ఆస్క్ యూట్యూబ్’..
సెర్చ్బార్లో మనం ఏదైనా టైప్ చేసినప్పుడు కొత్తగా ‘ఆస్క్ యూట్యూబ్’ అనే ఆప్షన్ కనిపిస్తుంది. దానిపై ట్యాప్ చేయగానే ఒక ఫుల్ పేజీ టెక్స్ట్ బాక్స్ ఓపెన్ అవుతుంది. అక్కడ మీరు మీకు కావలసిన ప్రశ్నలను అడగవచ్చు. ఈ ఫీచర్ ఎలా పని చేస్తుందంటే.. మీరు అడిగిన ప్రశ్నకు సంబంధించి కేవలం వీడియోలను మాత్రమే కాకుండా, ఏఐ రూపొందించిన టెక్స్ట్ సమాచారాన్ని కూడా అందిస్తుంది. లాంగ్ వీడియోలు, షార్ట్స్ రూపంలో అత్యుత్తమ సమాచారాన్ని ఇది వెతికి పెడుతుంది. ఉదాహరణకు మీరు ఎక్కడికైనా లాంగ్ ట్రిప్ ప్లాన్ చేస్తున్నప్పుడు కాఫీ షాపుల గురించి అడిగితే.. కేవలం వాటి వీడియోలే కాకుండా, మార్గమధ్యంలో మీరు చూడాల్సిన ఇతర ప్రదేశాల గురించి కూడా ఈ ఏఐ చాట్బాట్ సలహాలు ఇస్తుంది.
ప్రస్తుతం ఎవరికి అందుబాటులో ఉందంటే..
ప్రస్తుతానికి ఈ ఫీచర్ను ప్రయోగాత్మకంగా అమెరికాలో 18 ఏళ్లు పైబడిన కొంతమంది యూట్యూబ్ ప్రీమియం సబ్స్క్రైబర్లకు మాత్రమే అందుబాటులోకి తెచ్చారు. దీనికి సంబంధించిన పనితీరును వివరిస్తూ యూట్యూబ్ ఒక వీడియోను కూడా తన బ్లాగ్లో షేర్ చేసింది. త్వరలోనే ఈ ఫీచర్ ప్రపంచవ్యాప్తంగా ఉన్న యూజర్లందరికీ అందుబాటులోకి వచ్చే అవకాశం ఉంది. ఈ ఫీచర్ గనుక పూర్తిస్థాయిలో అందుబాటులోకి వస్తే.. గూగుల్ సెర్చ్ తరహాలోనే యూట్యూబ్ కూడా ఒక పవర్ఫుల్ ఇన్ఫర్మేషన్ హబ్గా మారుతుందని టెక్ నిపుణులు భావిస్తున్నారు.