MG Motors: MG నుంచి కొత్త ADAPT టెక్నాలజీ.. EVలు, హైబ్రిడ్ కార్ల తయారీలో సంచలనం..

MG Motors: MG మోటార్స్ ఇండియా కార్ల నిర్మాణంలో సంచలనానికి తెర తీసింది. తన కొత్త ప్లాట్‌ఫామ్ అయిన ‘అడ్వాన్స్‌డ్ డ్రైవ్ ఆర్కిటెక్చర్ ప్లాట్‌ఫామ్ టెక్నాలజీ’ (ADAPT)ను తొలిసారిగా వెల్లడించింది. ఈ NEV (న్యూ ఎనర్జీ వెహికల్) ఆర్కిటెక్చర్ ద్వారా రాబోయే తన ప్లగ్-ఇన్ హైబ్రిడ్ (PHEV), స్ట్రాంగ్ హైబ్రిడ్, రేంజ్-ఎక్స్‌టెండర్ హైబ్రిడ్, EV మోడళ్లకు నిర్మించనుంది. న్యూ ఏజ్ కార్లను ఎంజీ తీసుకురాబోతోంది. అయితే, పెట్రోల్-డీజిల్‌పై పూర్తిగా ఆధారపడే ICE (ఇంటర్నల్ కంబషన్ ఇంజిన్) మోడళ్లకు ఈ ప్లాట్ ఫామ్ అందుబాటులో ఉండవని తెలుస్తోంది.

43% థర్మల్ ఎఫిషియెన్సీతో కొత్త హైబ్రిడ్ ఇంజిన్

ADAPT ఆధారిత హైబ్రిడ్ ఆఫర్‌లలో కొత్త నాచురల్లీ ఆస్పిరేటెడ్ పెట్రోల్ ఇంజన్ ఉంటుంది. ఇది తక్కువ ఇంధన వినియోగం,  43 శాతం వరకు థర్మల్ సామర్థ్యాన్ని కలిగి ఉంటుంది. సాధారణంగా పెట్రోల్ ఇంజన్లు 20-35 శాతం పరిధిలో థర్మల్ సామర్థ్యాన్ని అందిస్తాయని పరిగణనలోకి తీసుకుంటే, ఇది చాలా ఆకట్టుకునే విషయం. ఈ హైబ్రిడ్-కేంద్రీకృత ఇంజన్ యొక్క డిస్ప్లేస్‌మెంట్, సిలిండర్ల సంఖ్య, పవర్ అవుట్‌పుట్ వంటి వివరాలను MG వెల్లడించలేదు, కానీ ఈ ఇంజన్‌ను DHT (డెడికేటెడ్ హైబ్రిడ్ ట్రాన్స్‌మిషన్)తో జత చేస్తారని క్లారిటీ ఇచ్చింది.

ఎలక్ట్రోమాగ్నెటిక్ ఈ-క్లచ్‌ DHT

కొత్త DHTలో ఎలక్ట్రోమాగ్నెటిక్ ఈ-క్లచ్‌ను ఉపయోగించారు. ఇది సంప్రదాయ హైబ్రిడ్ సిస్టమ్‌లతో పోలిస్తే నాలుగు రెట్లు వేగంగా స్పందిస్తుందని MG తెలిపింది.సాధారణ e-CVT వ్యవస్థలకు భిన్నంగా ఇందులో మెకానికల్ గేర్లు కూడా ఉండటంతో మెరుగైన టార్క్ డెలివరీ, సహజమైన డ్రైవింగ్ అనుభూతి లభిస్తుందని కంపెనీ చెబుతోంది.

10-ఇన్-1 డ్రైవ్ యూనిట్

ఇందులో పర్మనెంట్ మాగ్నెట్ సింక్రోనస్ మోటార్, 2-స్టేజ్ రిడక్షన్ గేర్‌బాక్స్‌ను ఏకీకృతం చేసే 10-ఇన్-1 డ్రైవ్ యూనిట్ కూడా ఉంది. ఇది ఇంజిన్, ఎలక్ట్రిక్ మోటార్ యొక్క అవుట్‌పుట్‌లను నిర్వహించి, వాటిని చక్రాలకు అందిస్తుంది. ఇంటెలిజెండ్ ఎనర్జీ మేనేజ్మెంట్ సిస్టమ్ డ్రైవింగ్ పరిస్థితులను బట్టి 4 మోడ్‌లలో పనిచేస్తుంది. ఇవి ప్యూర్ ఎలక్ట్రిక్ డ్రైవ్, సిరీస్ హైబ్రీడ్ డ్రైవ్, పారలల్ హైబ్రీడ్ డ్రైవ్, ఇంజన్ డైరెక్ట్ డ్రైవ్.

ఒకే ప్లాట్‌ఫామ్ 4 రకాల కార్‌లు:

ఈ ఫ్లాట్‌ఫామ్ ద్వారా ఎంజీ నాలుగు రకాల వాహనాలను నిర్మించబోతోంది. పూర్తి ఎలక్ట్రిక్ మోడల్, ఎలక్ట్రిక్ మోటార్+ఇంజన్ కలిగిన హైబ్రిడ్ మోడల్, ఫ్లగ్ ఇన్ హైబ్రిడ్ మోడల్, రేంజ్ ఎక్స్‌టెండర్ హైబ్రిడ్ మోడళ్లను తీసుకురాబోతోంది. ఒకే ఫ్లాట్‌ఫామ్‌పై నాలుగు రకాల కార్లను నిర్మిస్తూ, మిగతా ఆటోమేకర్లకు సవాల్ విసురుతోంది.

* వివరంగా చెప్పాలంటే పూర్తి ఎలక్ట్రిక్ మోడల్ కారులో ఎలక్ట్రిక్ మోటార్, బ్యాటరీ ప్యాక్ ఉంటుంది.

*ఇక స్ట్రాంగ్ హైబ్రీడ్ మోడల్‌లో ఇంజన్, మోటార్, బ్యాటరీ ప్యాక్ ఉంటాయి. అయితే, పరిస్థితుల్ని బట్టి ఇంజన్, మోటార్‌లకు కార్ స్విచ్ అవుతుంటుంది. బ్యాటరీని ప్రత్యేకంగా ఛార్జ్ చేయాల్సిన అవసరం లేదు.

*ఇక ఫ్లగ్ ఇన్ హైబ్రిడ్ మోడల్ కారులో ఇంజన్, మోటార్, బ్యాటరీ ఉంటుంది. ఇందులో బ్యాటరీని సపరేట్‌గా ఛార్జింగ్ చేయాల్సి ఉంటుంది.

*రేంజ్ ఎక్స్‌టెండర్ హైబ్రిడ్ మోడల్‌లో ఇంజన్, మోటార్, బ్యాటరీ ఉంటాయి. అయితే, ఇందులో ఇంజన్ నేరుగా కారును నడిపించదు. బ్యాటరీ పర్సంటేజ్ తక్కువ అయిన సందర్భంలో ఒక జనరేటర్‌గా పనిచేస్తూ బ్యాటరీని ఛార్జ్ చేస్తుంది.