MLC Anantha Babu: జైలు నుంచి అనంతబాబు విడుదల వాయిదా.. కారణం ఇదే..!

మాజీ డ్రైవర్ హత్య కేసులో నిందితడిగా ఉన్న ఆంధ్రప్రదేశ్‌ ఎమ్మెల్సీ అనంతబాబుకు సుప్రీంకోర్టు బెయిల్ మంజూరు చేసిన విషయం విదితమే.. డీఫాల్ట్ బెయిల్ కోసం సుప్రీంకోర్టును ఆశ్రయించారు అనంతబాబు. గతంలో విచారణకువచ్చిన సమయంలో ప్రతి వాదులకు నోటీసులు జారీ చేశారు. నిన్న జరిగిన విచారణలో బెయిల్ మంజూరు చేస్తూ నిర్ణయం తీసుకుంది అత్యున్నత న్యాయస్థానం.. అయితే, బెయిల్ షరతులపై కింది కోర్టు నిర్ణయం తీసుకోవాలని సుప్రీంకోర్టు స్పష్టం చేసింది.. అనంతబాబు బెయిల్ పిటిషన్‌ను రాజమండ్రిలోని ఎస్సీ ఎస్టీ కోర్టు, ఏపీ హైకోర్ట్ కొట్టి వేసిన విషయం విదితమే కాగా.. ఆ తర్వాత బెయిల్ కోసం సుప్రీంకోర్టును ఆశ్రయించి బెయిల్‌ పొందారు అనంతబాబు.. అయితే, రాజమండ్రి సెంట్రల్ జైలు నుంచి ఇవాళ అనంతబాబు విడుదల వాయిదా పడింది.. బెయిల్ నిబంధనలు జారీ చేయాల్సిన రాజమండ్రి ఎస్సీ-ఎస్టీ కోర్టు న్యాయమూర్తి ప్రస్తుతం సెలవులో ఉన్నారు.. అయితే, కోర్టు విధించే షరతులు ఆధారంగా బుధవారం రోజు ఎమ్మెల్సీ అనంతబాబు రాజమండ్రి సెంట్రల్ జైలు నుంచి విడుదలయ్యే అవకాశం కనిపిస్తోంది.. మొత్తంగా నిన్న సుప్రీంకోర్టులో అనంతబాబుకు మధ్యంతర బెయిల్ మంజూరు చేసినా.. ఇవాళ కోర్టు నుంచి విడుదల అయ్యేందుకు మరోరోజు సమయం పట్టేలా కనిపిస్తోంది.

Read Also: Witness movie review: విట్ నెస్ రివ్యూ

కాగా, ఎమ్మెల్సీ అనంతబాబు తన డ్రైవ‌ర్‌ సుబ్రహ్మణ్యంను హత్య చేసి, ఆ త‌ర్వాత మృత‌దేహాన్ని బాధితుడి ఇంటికి తీసుకెళ్లి వదిలేసిన ఘటన కలకలం రేపింది.. మే 19వ తేదీన మాజీ డ్రైవర్ సుబ్రహ్మణ్యంను ఇంటి నుంచి తీసుకెళ్లిన అనంతబాబు.. రోజు ప్రమాదంలో చనిపోయాడంటూ అదే రోజు మృతదేహాన్ని తీసుకొచ్చి.. మృతుడి ఇంటి దగ్గరే వదిలేశాడు.. అయితే, సుబ్రహ్మణ్యం బంధువులు అక్కడే అనంతబాబును అడ్డుకునే ప్రయత్నం చేయగా.. అందర్నీ బెదిరించి ఆయన అక్కడ్నుంచి వెళ్లిపోయారు. ఈ ఘటన కలకలం రేపడంతో పోలీసులు కేసులు నమోదు చేసి దర్యాప్తు చేపట్టారు.. ఆ తర్వాత ఎమ్మెల్సీ అనంతబాబను అరెస్ట్ చేశారు. తాను ఒక్కడినే సుబ్రహ్మణ్యాన్ని హత్య చేశానని అంగీకరించినట్లుగా పోలీసులు ప్రకటించారు. ఇక, అప్పటి నుంచి ఆయన బెయిల్‌ కోసం ప్రయత్నాలు సాగిస్తూనే ఉండగా.. ఇప్పుడు సుప్రీంకోర్టులో బెయిల్‌ లభించింది. ఎమ్మేల్సీ అనంతబాబు కారు డ్రైవర్ సుబ్రహ్మణ్యం హత్య కేసులో ఈ ఏడాది మే 23వ తేదీ అరెస్టు అయ్యారు. అప్పటి నుండి ఇప్పటి వరకు 210 రోజులుగా రాజమండ్రి సెంట్రల్ జైలులో రిమాండ్ లో ఉన్నారు.