AP Cabinet Meeting: నేడు ఏపీ కేబినెట్‌ అత్యవసర భేటీ.. స్థానిక ఎన్నికలపై ఫోకస్‌, బీసీ రిజర్వేషన్లపై కీలక నిర్ణయం..

AP Cabinet Meeting: ఆంధ్రప్రదేశ్‌ కేబినెట్ ఇవాళ అత్యవసరంగా సమావేశం కానుంది.. ఉదయం 11 గంటలకు ఏపీ సచివాలయంలో ముఖ్యమంత్రి నారా చంద్రబాబు నాయుడు అధ్యక్షతన ఈ సమావేశం నిర్వహించనున్నారు. రాష్ట్రంలో స్థానిక సంస్థల ఎన్నికలు, బీసీ రిజర్వేషన్ల అంశాలపై కేబినెట్‌లో కీలకంగా చర్చించే అవకాశం ఉంది. సుప్రీంకోర్టు నిర్ణయం నేపథ్యంలో బీసీ రిజర్వేషన్ల ఖరారు, తదుపరి కార్యాచరణపై ప్రభుత్వం తుది నిర్ణయం తీసుకునే అవకాశముందని తెలుస్తోంది.

బీసీలకు సంబంధించిన డెడికేటెడ్ కమిషన్ నివేదికపైనా కేబినెట్‌లో చర్చించే అవకాశం ఉంది. గతంలో బీసీలకు 34 శాతం రిజర్వేషన్లు కల్పిస్తూ ప్రభుత్వం జారీ చేసిన జీవోలపై కూడా సమావేశంలో సమాలోచనలు జరగనున్నట్లు సమాచారం. న్యాయపరమైన పరిణామాల నేపథ్యంలో ఈ జీవోలను రద్దు చేసే అంశాన్ని ప్రభుత్వం పరిశీలించే అవకాశం ఉంది. మరోవైపు, స్థానిక సంస్థల ఎన్నికల ప్రక్రియను ముందుకు తీసుకెళ్లేందుకు అనుసరించాల్సిన మార్గాలపై కేబినెట్ కసరత్తు చేయనుంది. బీసీ రిజర్వేషన్లను ఎలా ఖరారు చేయాలి? సుప్రీంకోర్టు నిర్ణయానికి అనుగుణంగా ప్రభుత్వం ఎలాంటి చర్యలు తీసుకోవాలి? ఎన్నికల నిర్వహణకు సంబంధించి తదుపరి కార్యాచరణ ఎలా ఉండాలి? అనే అంశాలపై మంత్రివర్గంలో చర్చ జరిగే అవకాశం ఉంది. ఈ సమావేశంలో తీసుకునే నిర్ణయాలు రాష్ట్రంలో స్థానిక సంస్థల ఎన్నికలు, బీసీ రిజర్వేషన్ల భవిష్యత్తుపై కీలక ప్రభావం చూపే అవకాశం ఉంది.