చెట్లు మనకు ప్రాణవాయువుని అందిస్తాయి, మండుటెండ నుంచి కాపాడుకోవడానికి నీడనిస్తాయి, చల్లటి గాలిని ఇస్తాయి, వర్షాల్నీ కురిపిస్తాయి.. ఇవన్నీ అందరికీ తెలిసిందే! కానీ, ఓ చెట్టు నుంచి వర్షపు జల్లులు కురుస్తున్నాయంటే నమ్ముతారా? మీరు నమ్మినా, నమ్మకపోయినా.. ఇది మాత్రం నిజం. కర్ణాటక కొడగు సమీపంలోని హెరవనాడు గ్రామంలో ఓ చెట్టు నుంచి నిరంతరాయంగా వర్షపు జల్లులు కురుస్తున్నాయి. చెట్టు కొమ్మల నుంచి 10 చదరపు అడుగుల విస్తీర్ణంలో నీరు పడుతోంది. కొన్ని వారాలు నుంచి ఆ చెట్టు నుంచి ఇలా వర్షపు జల్లులు కురుస్తున్నాయి. ఎండలు మండిపోతున్నా సరే, ఆ చెట్టు నుంచి వర్షపు జల్లులు కురవడం మాత్రం ఆగడం లేదు.
ఈ చెట్టు శివుడికి ఇష్టమైన బిల్వ పత్ర వృక్షమని అక్కడి స్థానికులు చెప్తున్నారు. చెట్టుకు 500 మీటర్ల దూరంలోని దేవరకాడులో భద్రకాళిదేవి కొలువై ఉంది. ఆ అమ్మవారి మహిమ వల్లే.. ఇలా జరుగుతుందని గ్రామస్థులు నమ్ముతున్నారు. ఆలయ పూజారిని ఈ చెట్టు గురించి అడగ్గా.. అది బిల్వ పత్ర వృక్షాన్ని పోలి ఉందని, అక్కడ శివలింగం లేదా జలపాతం ఉండే అవకాశం ఉందని అభిప్రాయపడ్డారు. మరోవైపు కొన్ని రకాలైన చెట్లకు ఇలాంటి లక్షణాలు ఉంటాయని అటవీశాఖ అధికారులు పేర్కొంటున్నారు. ఈ చెట్టు నుంచి పడే నీటిని పరీక్షించేందుకు ప్రయోగశాలకు పంపారు. త్వరలోనే ఈ చెట్టుని విపత్తు నిర్వహణ అథారిటీ, పర్యావరణ అధికారులు సందర్శించనున్నారు.
