Hong Kong Coffin Homes: ప్రపంచంలోనే అత్యంత ఖరీదైన నగరాల్లో ఒకటైన హాంకాంగ్ లో విలాసవంతమైన భవనాలు, కోట్ల రూపాయల ఆస్తులతో ప్రసిద్ధి చెందింది. కానీ ఈ మెరుపుల వెనుక దాగి ఉన్న వాస్తవం మాత్రం చాలా దారుణమైంది. వేలాది మంది అక్కడ కేవలం 16 చదరపు అడుగుల చిన్న బాక్స్లాంటి గదుల్లో జీవనం కొనసాగిస్తున్నారు. వీటినే “కాఫిన్ హోమ్స్” (Coffin Homes) అని పిలుస్తుంటారు.
Read Also: Pixel 10a India Launch: భారత్లో గూగుల్ ‘పిక్సెల్ 10ఏ’ విడుదల.. 5100mAh బ్యాటరీ, 48MP కెమెరా!
అత్యంత ఖరీదైన గృహ మార్కెట్..
గత 14 ఏళ్లుగా హాంకాంగ్ ప్రపంచంలోనే అత్యంత ఖరీదైన గృహ మార్కెట్గా కొనసాగుతోంది. ఒకవైపు ఆకాశాన్ని తాకే గాజు టవర్లు, లగ్జరీ అపార్ట్మెంట్లు కనిపిస్తుంటే, మరోవైపు పేదలు, వృద్ధులు, తక్కువ ఆదాయ వర్గాల వారు తీవ్ర ఇబ్బందుల్లో జీవిస్తున్నారు. నగర సంపదలో అధిక భాగం కొద్దిమంది ధనవంతుల చేతుల్లోనే కేంద్రీకృతమై ఉండిపోయింది.
నడిచేందుకు నో ఛాన్స్..
కాఫిన్ హోమ్స్ పరిమాణం సుమారు 16 చదరపు అడుగులు మాత్రమే.. అంటే 4 అడుగులు × 4 అడుగుల స్థలం.. అందులో ఒక చిన్న మంచం పెట్టిన తర్వాత ఇంకేమీ స్థలం ఉండదు.. నిలబడి ఉండటానికి కూడా అవకాశం ఉండదు. చేతులు చాచాలని చూసిన గోడలు తగులుతాయి. ఒక 800 చదరపు అడుగుల ఫ్లాట్ను 20 నుంచి 30 చిన్న గదులుగా విభజించి అద్దెకు ఇస్తున్నారు. ఆ ఒక్క గదిలోనే పడుకోవడం, తినడం, ఫోన్ ఉపయోగించుకోవడం, కొన్ని సందర్భాల్లో వంట చేసుకోవాల్సిన పరిస్థితి కూడా ఉంటుంది.
Read Also: What’s Today: ఈ రోజు ఏమున్నాయంటే..?
16 స్క్వేర్ ఫీట్ గదుల్లో 2.2 లక్షలు..
అంచనా ప్రకారం సుమారు 2 లక్షల నుంచి 2.2 లక్షల మంది వరకు ఇలాంటి 16 స్క్వేర్ ఫీట్ గదుల్లో జీవిస్తున్నట్లు తెలుస్తుంది. ప్రభుత్వ గృహాల కోసం వేచి ఉండే సమయం సగటున ఐదేళ్లు లేదా అంతకంటే ఎక్కువగా ఉంటుంది. అందుకే చాలా మంది ఈ కఠిన పరిస్థితుల్లోనే ఉండాల్సిన పరిస్థితి నెలకొంది. ఈ 16 చదరపు అడుగుల గదికే నెలకు 230 నుంచి 450 అమెరికన్ డాలర్లు (సుమారు రూ.20,000 నుంచి రూ.45,000 వరకు) అద్దె చెల్లించాల్సి వస్తోందని అక్కడి ప్రజలు వాపోతున్నారు.
టాయిలెట్స్ పక్కనే వంట:
వేసవిలో ఉష్ణోగ్రతలు 40 డిగ్రీల సెల్సియస్ దాటుతున్నాయి. ఇలాంటి చిన్న గదుల్లో గాలి సరిగ్గా రాకపోవడంతో ఉక్కపోత ఎక్కువగా ఉంటుంది. బెడ్ బగ్స్, చీమలు, కాక్రోచులు వంటి పురుగుల సమస్య కూడా హాంకాంగ్ లో అధికంగా ఉంటుంది. కొన్ని గదుల్లో ప్రత్యేక వంటగది అంటూ ఏమీ ఉండదు. టాయిలెట్ పక్కనే కూరగాయలు కడిగి వంట చేసుకోవాల్సిన పరిస్థితి ఉంటుంది. ఇది ఆరోగ్యపరంగా ప్రమాదకరమైనా, ఆర్థిక పరిస్థితులను దృష్టిలో పెట్టుకుని బయట తినడం చాలా మందికి సాధ్యం కాదు.
75 మంది వద్దే 10 శాతం సంపద..
హాంకాంగ్లో కేవలం 75 మంది వ్యక్తులు నగర సంపదలో సుమారు 10 శాతం నియంత్రిస్తున్నారని తెలుస్తుంది. సాధారణ ప్రాంతాల్లో కూడా అపార్ట్మెంట్ల ధరలు మిలియన్ డాలర్లకు పైగా ఉంటాయి. ఒక సాధారణ ఒక బెడ్రూమ్ ఫ్లాట్ అద్దెనే నెలకు 4,000 డాలర్ల వరకు ఉంటుంది. దీంతో ఒకవైపు మెరుస్తున్న స్కైలైన్స్.. మరోవైపు 16 చదరపు అడుగుల బాక్స్ల్లో బతుకుతున్న ప్రజల జీవితాలు.. అభివృద్ధి, సంపద ఉన్నప్పటికీ, అసమానతల్లో ఎంత వ్యత్యాసం ఉందో హాంకాంగ్ నగరాన్ని చూస్తే తెలుస్తుంది.