ఏఐ చాట్‌బాట్‌ల వినియోగం రోజురోజుకూ పెరుగుతోంది. ఈమెయిల్స్ రాయడం నుంచి క్లిష్టమైన అంశాలను సులభంగా అర్థం చేసుకోవడం వరకు, ప్రయాణ ప్రణాళికలు రూపొందించడం నుంచి రోజువారీ పనుల్లో సాయం పొందడం వరకు ఎన్నో అవసరాలకు వీటిని ఉపయోగిస్తున్నారు. అయితే ఏఐతో మాట్లాడేటప్పుడు మన వ్యక్తిగత సమాచారాన్ని ఎంతవరకు పంచుకుంటున్నామనే విషయాన్ని కూడా గుర్తుంచుకోవాలి. మనకు సాధారణమైన ప్రశ్నగా అనిపించినా, అందులో పాస్‌వర్డ్‌లు, ఆర్థిక లావాదేవీల వివరాలు, గుర్తింపు పత్రాల సమాచారం వంటి కీలక అంశాలు ఉండొచ్చు. ఇలాంటి వివరాలను నిర్లక్ష్యంగా పంచుకోవడం గోప్యత, డేటా భద్రతకు సంబంధించిన సమస్యలకు దారితీయవచ్చు. ‘టైమ్స్ ఆఫ్ ఇండియా’ వెల్లడించిన వివరాల ప్రకారం, ఏఐ చాట్‌బాట్‌లలో పంచుకోకుండా ఉండాల్సిన ఐదు రకాల సమాచారంపై ప్రత్యేకంగా దృష్టి పెట్టాలి.
1. పాస్‌వర్డ్‌లు, ఓటీపీలు, లాగిన్ వివరాలు
ఈమెయిల్, సోషల్ మీడియా ఖాతాలు, ఆన్‌లైన్ బ్యాంకింగ్ వంటి సేవలకు సంబంధించిన పాస్‌వర్డ్‌లను ఏఐ చాట్‌బాట్‌లలో ఎప్పుడూ నమోదు చేయకూడదు. బ్యాంకింగ్ పిన్‌లు, వన్ టైమ్ పాస్‌వర్డ్‌లు (OTPలు), ఖాతాను తిరిగి పొందేందుకు ఉపయోగించే రికవరీ కోడ్‌లను కూడా పంచుకోవద్దు. ఖాతాలోకి లాగిన్ కావడంలో సమస్య ఎదురైతే, పాస్‌వర్డ్‌ను వెల్లడించాల్సిన అవసరం లేకుండానే సమస్యను వివరించి పరిష్కార మార్గాలను అడగవచ్చు. ఖాతా భద్రతకు సంబంధించిన సందేహాలుంటే, సంబంధిత సంస్థ అధికారిక వెబ్‌సైట్ లేదా యాప్‌లో అందించే సూచనలను అనుసరించడం మంచిది.
2. బ్యాంకు ఖాతాలు, క్రెడిట్ కార్డు వివరాలు
బ్యాంకు ఖాతా నంబర్లు, డెబిట్ లేదా క్రెడిట్ కార్డుల పూర్తి నంబర్లు, కార్డు వెనుక ఉండే సీవీవీ (CVV), బ్యాంకింగ్ లాగిన్ వివరాలు వంటి సున్నితమైన ఆర్థిక సమాచారాన్ని చాట్‌బాట్‌లతో పంచుకోవద్దు. ఏదైనా లావాదేవీని అర్థం చేసుకోవాలన్నా, నెలవారీ ఖర్చులను లెక్కించాలన్నా వ్యక్తిగత వివరాలను వెల్లడించాల్సిన అవసరం లేదు. ఉదాహరణకు, ఖాతా నంబర్ లేదా కార్డు వివరాలను ఇవ్వకుండా లావాదేవీ మొత్తాలు, ఖర్చుల వర్గాలు మాత్రమే పేర్కొని బడ్జెట్ రూపొందించుకోవచ్చు. అవసరమైన సమాచారాన్ని మాత్రమే పంచుకోవడం, వ్యక్తిగత ఆర్థిక వివరాలను సాధ్యమైనంతవరకు తొలగించడం సురక్షితమైన పద్ధతి.
3. ఆధార్, పాస్‌పోర్టు వంటి గుర్తింపు పత్రాలు
ఆధార్ కార్డు, పాస్‌పోర్టు, డ్రైవింగ్ లైసెన్స్ వంటి గుర్తింపు పత్రాల్లో పేరు, చిరునామా, ఫొటో, గుర్తింపు నంబర్ తదితర వ్యక్తిగత వివరాలు ఉంటాయి. వీటిని అవసరం లేకుండా ఏఐ చాట్‌బాట్‌లలో అప్‌లోడ్ చేయడం మంచిది కాదు. ఏదైనా పత్రంలోని సమాచారాన్ని అర్థం చేసుకోవడానికి లేదా దాన్ని సంక్షిప్తంగా వివరించుకోవడానికి ఏఐ సాయం కావాలంటే, ముందుగా అవసరం లేని గుర్తింపు వివరాలను తొలగించడం లేదా కప్పివేయడం మంచిది. ముఖ్యంగా పూర్తి గుర్తింపు నంబర్లు, చిరునామాలు, పత్రాల కాపీలను అనవసరంగా పంచుకోవద్దు. పత్రాన్ని అప్‌లోడ్ చేయాల్సిన అవసరం ఉందా? అందులోని కొంత సమాచారాన్ని మాత్రమే ఇచ్చి పని పూర్తి చేయవచ్చా? అనే విషయాలను ముందుగా పరిశీలించాలి.
4. కార్యాలయ రహస్యాలు, కంపెనీ పత్రాలు
ఆఫీసు పనుల కోసం ఏఐ చాట్‌బాట్‌లను ఉపయోగించేవారు సంస్థకు సంబంధించిన సమాచార విషయంలో మరింత అప్రమత్తంగా ఉండాలి. కంపెనీల అంతర్గత నివేదికలు, ఇంకా ప్రచురించని కథనాలు, క్లయింట్ల వివరాలు, వ్యాపార ప్రణాళికలు, రహస్య ఈమెయిల్స్‌ను అనుమతి లేకుండా చాట్‌బాట్‌లలో నమోదు చేయకూడదు. ఇలాంటి సమాచారం సంస్థ గోప్యతకు సంబంధించినది కావచ్చు. దాన్ని అనుమతి లేని సాధనాల్లో పంచుకోవడం వల్ల డేటా భద్రతకు సంబంధించిన ప్రమాదాలు ఎదురయ్యే అవకాశం ఉంది. అందువల్ల కార్యాలయ పనుల కోసం సంస్థ అనుమతించిన ఏఐ సాధనాలనే ఉపయోగించాలి. సాధ్యమైనప్పుడు అసలు పేర్లు, క్లయింట్ల వివరాలు, ఇతర రహస్య అంశాల స్థానంలో కల్పిత పేర్లు లేదా సాధారణ ఉదాహరణలను ఉపయోగించవచ్చు.
5. ఇతరుల వ్యక్తిగత సమాచారం
మన వ్యక్తిగత వివరాల విషయంలోనే కాదు, ఇతరుల గోప్యత విషయంలోనూ బాధ్యతగా వ్యవహరించాలి. స్నేహితుల వ్యక్తిగత సమస్యలు, సహోద్యోగుల జీతాల వివరాలు, కుటుంబ సభ్యుల వైద్య రికార్డులు, ఫోన్ నంబర్లు, చిరునామాలను వారి అనుమతి లేకుండా ఏఐ చాట్‌బాట్‌లలో పంచుకోవద్దు. ఒక వ్యక్తికి సంబంధించిన సమస్యపై సలహా కావాలంటే, వారి పేర్లు, గుర్తింపు వివరాలను తొలగించి సాధారణంగా పరిస్థితిని వివరించవచ్చు. ఉదాహరణకు, ఎవరి వ్యక్తిగత వివరాలనూ వెల్లడించకుండా సంబంధాల సమస్య గురించి లేదా కార్యాలయంలో ఎదురయ్యే ఇబ్బందుల గురించి సలహా అడగవచ్చు. ఇలా చేయడం వల్ల అవసరమైన సమాచారం పొందుతూనే ఇతరుల గోప్యతను కూడా గౌరవించినట్లవుతుంది.
ఏఐని ఉపయోగించేటప్పుడు ఈ జాగ్రత్తలు అవసరం
ఏఐ చాట్‌బాట్‌లు అనేక పనులను సులభతరం చేస్తున్నప్పటికీ, వాటితో పంచుకునే సమాచారం విషయంలో అప్రమత్తత అవసరం. పాస్‌వర్డ్‌లు, ఓటీపీలు, బ్యాంకింగ్ వివరాలు, గుర్తింపు పత్రాలు, కార్యాలయ రహస్యాలు, ఇతరుల వ్యక్తిగత సమాచారాన్ని అనవసరంగా నమోదు చేయకూడదు. అలాగే ఏఐ సేవల గోప్యతా విధానాలు, డేటా నిల్వకు సంబంధించిన నిబంధనలను తెలుసుకోవడం మంచిది. అందుబాటులో ఉన్న డేటా నియంత్రణలు, చాట్ హిస్టరీ సెట్టింగులను పరిశీలించాలి. ఏఐకి ఎంత సమాచారం ఇవ్వాలి అనే విషయంలో ఒక సులభమైన నియమాన్ని పాటించాలి.. సమస్యను పరిష్కరించడానికి అవసరమైన వివరాలనే పంచుకోవాలి, వ్యక్తిగతంగా గుర్తించగల సమాచారాన్ని వీలైనంతవరకు తొలగించాలి. ఈ చిన్న జాగ్రత్తలు పాటిస్తే ఏఐ సేవలను మరింత బాధ్యతాయుతంగా, సురక్షితంగా ఉపయోగించుకోవచ్చు.