టెంకాయలు కొట్టి… హారతులిచ్చి… మందుబాబుల సంబరాలు

ఏపీలో మందుబాబుల సంబరాలు అంబరాన్నంటుతున్నాయి. జగన్ ప్రభుత్వం శనివారం శుభవార్త చెప్పింది. ఆదివారం నుంచే కొత్త ధరలు అందుబాటులోకి వచ్చాయి. దీంతో మందుబాబుల ఆనందానికి అవధులు లేకుండా పోయాయి. మద్యం పన్ను రేట్లలో మార్పులు చేయడంతో ధరలు తగ్గనున్నాయి. వ్యాట్, అదనపు ఎక్సైజ్‌ డ్యూటీ ప్రత్యేక మార్జిన్‌లో హేతుబద్ధతను తీసుకొచ్చింది. ఈ మేరకు రెవెన్యూ శాఖ ప్రత్యేక ప్రధాన కార్యదర్శి రజత్‌ భార్గవ శనివారం ఉత్తర్వులు జారీ చేసిన సంగతి తెలిసిందే. వ్యాట్, అదనపు ఎక్సైజ్‌ డ్యూటీ తగ్గడంతో రాష్ట్రంలో మద్యం ధరలు భారీగా తగ్గినట్టు తెలుస్తోంది.

ప్రకాశం జిల్లా సింగరాయకొండలో మద్యం షాపుల ముందు క్యూలు కనిపిస్తున్నాయి. ప్రభుత్వం మద్యం ధరలు తగ్గించటంతో ఆనందంలో మందు బాబులు చిందులేశారు. మద్యం షాపులకు వచ్చి.. హారతులు ఇచ్చి.. కొబ్బరికాయలు కొట్టి పాటలు పాడుతూ ప్రత్యేక పూజలు చేశారు మందు బాబులు. రాష్ట్ర ప్రభుత్వం మధ్యం ధరలు తగ్గించటమే తమ ఆనందానికి కారణమంటున్నారు. మందు రేట్లు తగ్గిన సందర్భంలో సంబరాలు హాట్ టాపిక్ అవుతున్నాయి. హారతి కర్పూరం వెలిగించి దిష్టి తీసి మరీ మందుబాబులు ఆనందం వ్యక్తం చేయడంతో మందు షాపులు కళకళలాడుతున్నాయి.