విశాఖ నడిబొడ్డులో అర్ధరాత్రి ఓ కారు బీభత్సం సృష్టించింది. అర్ధరాత్రి మద్యం మత్తులో డ్రైవింగ్ చేసిన ఓ మహిళ డాక్టర్ వీఐపీ రోడ్డులో వీరంగం సృష్టించింది.. ఒక్కసారిగా ఆ ప్రాంతమంతా ఉలిక్కి పడింది.. ఇన్నోవా కారును డ్రైవ్ చేసిన డాక్టరమ్మా అతి వేగంతో ఇతర వాహనాలను ఢీకొట్టింది. ఈ ఘటనలో 8 వాహనాలు ధ్వంసం అయ్యాయి. ప్రమాదం జరిగిన వెంటనే ఆమెతోపాటు కారులో ప్రయాణిస్తున్న వారు అక్కడి నుంచి పరారయ్యారు. ఈ ఘటనపై త్రీ టౌన్ పోలీసులు సమాచారం అందడంతో అక్కడికి చేసుకొని కేసు నమోదు చేసుకుని దర్యాప్తు చేపట్టారు.
విశాఖలోని వీఐపీ రోడ్డులో సోమా రెస్టో బార్ అండ్ రెస్టారెంట్ లో మహిళతో పాటు కొంతమంది యువకులు ఫుల్ గా మద్యం సేవించారు. అక్కడి పార్కింగ్ స్థలం నుంచి వీఐసీ రోడ్డులోని సిరిపురం వెళ్లే మార్గంలో కారులో వేగంగా దూసుకొచ్చారు. ఈ క్రమంలో కారు అదుపు తప్పి ఫుట్ పాత్ పైకి దూసుకెళ్లింది. దీంతో పార్కింగ్ స్థలంలో నిలిపి ఉంచిన ఎనిమిది వాహనాలను కారు ఢీకొట్టడంతో ఆ వాహనాలు ధ్వంసం అయ్యాయి. అయితే పార్కింగ్ స్థలంలో ఎవరూ లేకపోవడంతో పెద్ద ప్రమాదం తప్పింది.. ఎటువంటి ప్రాణహాని జరగలేదు..
ప్రమాదం జరిగిన ప్రాంతం అంతా ఎప్పుడు జనాలతో రద్దిగా ఉంటుంది.. కానీ ప్రమాదం సమయంలో జనం లేకపోవడంతో ఏం జరగలేదు.. అయితే ఒక్కసారిగా కారు ఢీకొట్టడంతో భారీ శబ్ధం వచ్చింది. ఏం జరిగిందో తెలుసుకునేందుకు ఒక్కసారిగా ప్రజలు గుమిగూడడంతో కారులో ఉన్న వారంతా భయంతో అక్కడి నుంచి పరుగులు తీశారు. వెంటనే అక్కడికి వేరే కారు రావడంతో అందులో వారంతా పరారయ్యారు. అయితే కారు ఎవరు డ్రైవ్ చేశారు? ఆ సమయంలో కారులో ఎంత మంది ఉన్నారు? వారు ఎక్కడి నుంచి వచ్చారు? కారులో ఉన్న వారు ఎవరు? అన్న కోణంలో పోలీసులు విచారిస్తున్నారు. అక్కడ ఉన్న సీసీ కెమెరా పుటేజీతోపాటు రెస్టో బార్ కు సంబంధించిన పుటేజీని కూడా పరిశీలిస్తున్నారు.. ప్రస్తుతం మహిళా డాక్టర్ ను పోలీసులు అదుపులోకి విచారిస్తున్నారు.. ఈ ఘటన పై మరింత సమాచారం తెలియాల్సి ఉంది..
