విశ్వక్ ఓవర్ యాక్షన్ తగ్గించు!?
‘పాగల్’… హీరో విశ్వక్ సేన్ చేసిన సినిమాలు వేళ్ళమీద లెక్కబెట్టవచ్చు. వాటిలో హిట్స్ అంటే ఒక్క ‘హిట్’ మాత్రమే. అదీ ఓ మాదిరి హిట్. అంతకు ముందు చేసిన వాటిలో ‘ఫలక్ నుమా దాస్’ సో..సో. అయితే ఇతగాడి మాటలు మాత్రం కోటలు దాటుతున్నాయి. ఇటీవల అతను పాల్గొన్న వేడుకల్లో స్పీచెస్ వింటే అది ఇట్టే అర్థం అవుతుంది. అప్పుడే తానో సూపర్ స్టార్ అయినట్లు ఫీలవుతుంటాడు. విజయ్ దేవరకొండ స్థాయిలో ఇమేజ్ వచ్చినట్లు బిల్డప్ ఇస్తుంటాడు. డైలాగులన్నీ అతిగానే ఉంటుంటాయి. కొంచెం జూనియర్ పోలికలతో ఉండటంతో తారక్ ఫ్యాన్స్ లైక్ చేస్తుంటారు. తాజాగా అతను నటించిన సినిమా ‘పాగల్’ విడుదలకు ముందు ఓ సవాల్ విసిరాడు విశ్వక్. ‘పాగల్’ హిట్ అవకపోతే పేరు మార్చుకుంటాననేశాడు. లాక్ డౌన్ తో మూత పడిన థియేటర్లు అన్నీ ‘పాగల్’తో మళ్ళీ తెరుచు కుంటాయని, అలా జరగకపోతే తన పేరు మార్చుకుంటానన్నదే దాని సారాంశం.
‘పాగల్’ మూవీ శనివారం రిలీజ్ అయింది. హీరోగా నటించిన విశ్వక్ చెప్పినట్లుగా హిట్ టాక్ ఎక్కడా లేదు. పైగా థియేటర్ కి వచ్చి సినిమా చూసిన సగటు ప్రేక్షకులు పెదవి విరుస్తున్నారు. దీంతో విశ్వక్ ఆడియో, ప్రీ రిలీజ్ వేడుకల్లో మాట్లాడిన మాటలను అందరూ గుర్తు చేసుకుంటున్నారు. సినిమా ఫస్ట్ షో పూర్తి కాగానే ప్రచారం ఆపేయవచ్చు అని ఇతగాడి స్నేహితులు చెప్పారట. అది కాన్ఫిడెన్స్ అనాలో ఓవర్ కాన్ఫిడెన్స్ అనాలో అర్థం కావటం లేదు. మన స్టార్ హీరోలు కూడా ఇలా మాట్లాడటానికి ధైర్యం చేయరేమో. ‘కష్టపడి పని చేశాం. పాజిటీవ్ రిజల్ట్ వస్తుందని భావిస్తున్నాం’ అనే అంటారు. విశ్వక్ అందుకు పూర్తిగా విరుద్ధం. నిజానికి ఎదిగే కొద్ది ఒదిగి ఉండాలని పెద్దలు చెబుతుంటారు. మరి విశ్వక్ సేన్ కి ఆ మాటలు రుచించడం లేదేమో. మనం చేసిన పని మనకు బాగా నచ్చి ఉండవచ్చు. అయితే దానిని వ్యక్తం చేసే తీరు అందరికీ నచ్చేలా ఉండాలి. పెద్ద వయసేమీ కాదు కాబట్టి మున్ముందు అనుభవంతో నేర్చుకుంటాడేమో! అప్పటికీ కొంత మంది స్టేజ్ మీదే విశ్వక్ కి దూకుడు ఎక్కువ అంటూ ఇన్ డైరెక్ట్ గా తగ్గించుకోమని చెబుతుంటారు. ఉడుకు రక్తం కాబట్టి తొందరగా ఎక్కకపోవచ్చు. ఎన్టీఆర్ అంత కంటే చిన్నవయసులోనే స్టార్ డమ్ అందుకున్నాడు. అయినా పబ్లిక్ లో ఎప్పుడూ ఎక్కడా పొరపాటున కూడా మాట జారలేదు. తన పోలికలతో ఉంటాడు కాబట్టి కనీసం ఎన్టీఆర్ ను చూసి అయినా నేర్చుకుని… ఇకపై ఆచితూచి మాట్లాడతాడేమో! లెట్స్ వెయిట్ అండ్ సీ….