RTC Conductor Jobs: ఆర్టీసీ కండక్టర్, డ్రైవర్ పోస్టులకు దరఖాస్తుల ఆహ్వానం..

తెలంగాణ రాష్ట్ర రోడ్డు రవాణా సంస్థ (TGS RTC) ఉద్యోగులు చేపట్టిన సమ్మె నేపథ్యంలో.. సామాన్య ప్రయాణికులకు రవాణా పరంగా ఎలాంటి ఇబ్బందులు కలగకుండా ఉండేందుకు ఆర్టీసీ యాజమాన్యం ప్రత్యామ్నాయ ఏర్పాట్లు చేస్తోంది. ఇందులో భాగంగా మెదక్ , నర్సాపూర్ డిపోల పరిధిలో తాత్కాలిక డ్రైవర్లు, కండక్టర్లను నియమించుకోవాలని నిర్ణయించినట్లు మెదక్ డిపో మేనేజర్ సురేఖ ఒక ప్రకటనలో తెలిపారు.

మెదక్ డిపోలో డ్రైవర్ల నియామకం..
మెదక్ డిపో పరిధిలో బస్సులను నడపడానికి అర్హులైన డ్రైవర్ల నుంచి దరఖాస్తులు కోరుతున్నారు. ఈ పోస్టులకు దరఖాస్తు చేసుకునే అభ్యర్థులు ఈ అర్హతలను కలిగి ఉండాలి. అభ్యర్థులు కనీసం 18 నెలల కాలపరిమితి కలిగిన హెవీ మోటార్ వెహికల్ (HMV) లైసెన్స్ కలిగి ఉండాలి. భారీ వాహనాలను నడపడంలో తగిన అనుభవం తప్పనిసరి. ఆసక్తి గల అభ్యర్థులు తమ ఒరిజినల్ లైసెన్స్ , ఇతర ధృవీకరణ పత్రాలతో ఉదయం 5 గంటలకే మెదక్ డిపో కార్యాలయంలో హాజరుకావాలని మేనేజర్ సూచించారు.

నర్సాపూర్ డిపోలో కండక్టర్ల నియామకం..
డ్రైవర్లతో పాటు నర్సాపూర్ డిపోలో తాత్కాలిక కండక్టర్ల నియామకానికి కూడా చర్యలు చేపట్టారు. ప్రయాణికుల నుంచి టికెట్ వసూళ్లు, బస్సు నిర్వహణలో ఇబ్బందులు లేకుండా ఉండేందుకు విద్యార్హత కలిగిన యువతను తాత్కాలిక ప్రాతిపదికన తీసుకోవాలని అధికారులు నిర్ణయించారు. ఆసక్తి గల వారు వెంటనే నర్సాపూర్ డిపో అధికారులను సంప్రదించి దరఖాస్తు చేసుకోవచ్చు.

ప్రయాణికుల సౌకర్యార్థం చర్యలు..
సమ్మె కారణంగా గ్రామీణ , పట్టణ ప్రాంతాల ప్రజలు రవాణా ఇబ్బందులు ఎదుర్కోకూడదనే ఉద్దేశంతో ఈ తాత్కాలిక నియామకాలు చేపడుతున్నట్లు అధికారులు స్పష్టం చేశారు. పోలీస్ శాఖ సమన్వయంతో బస్సులకు రక్షణ కల్పిస్తూ, వీలైనన్ని ఎక్కువ సర్వీసులను నడిపేందుకు ప్రణాళికలు సిద్ధం చేశారు. నిబంధనల ప్రకారం అర్హత ఉన్న వారు ఈ అవకాశాన్ని ఉపయోగించుకోవాలని ఆర్టీసీ అధికారులు కోరుతున్నారు.