హైదరాబాద్ రోడ్డుపై ఓఎంఆర్ (OMR) జవాబు పత్రాలు కనిపించిన వ్యవహారం తీవ్ర కలకలం రేపిన నేపథ్యంలో తెలంగాణ పబ్లిక్ సర్వీస్ కమిషన్ (TGPSC) స్పందించింది. ఈ ఘటనపై స్పష్టతనిస్తూ అధికారిక వివరణ విడుదల చేసింది. బాధ్యులైన ఇద్దరు సెక్షన్ ఆఫీసర్లను తక్షణమే సస్పెన్షన్ చేయడంతో పాటు ఓఎంఆర్ షీట్ల తరలింపులో నిర్లక్ష్యం వహించిన కాంట్రాక్టర్ వర్క్ ఆర్డర్ను రద్దు చేసి, అతనిపై ఎఫ్ఐఆర్ (FIR) నమోదు చేసినట్లు కమిషన్ వెల్లడించింది.
2018 నాటి పాత ఓఎంఆర్ షీట్లే
రోడ్డుపై ప్రత్యక్షమైన ఓఎంఆర్ షీట్లు 2018లో నిర్వహించిన హాస్టల్ వెల్ఫేర్ ఆఫీసర్స్ నియామక పరీక్షకు సంబంధించినవని టీజీపీఎస్సీ స్పష్టం చేసింది. ఈ పరీక్షలకు సంబంధించిన తుది ఫలితాలను ఇప్పటికే 2020లోనే విజయవంతంగా ప్రకటించామని తెలిపింది. కమిషన్ రికార్డుల నిర్వహణ నిబంధనల ప్రకారం నిర్ణీత కాలపరిమితి పూర్తయినందున, వీటిని ధ్వంసం (Shredding) చేయడానికి గుర్తించినట్లు వెల్లడించింది. అయితే ఆ రికార్డుల ధ్వంస ప్రక్రియ కోసం అధీకృత కాంట్రాక్టర్కు అప్పగించిన సమయంలో ఊహించని విధంగా కొన్ని ఓఎంఆర్ షీట్లు రోడ్డుపై పడిపోయినట్లు పేర్కొంది.
అధికారులపై వేటు, కాంట్రాక్టర్పై క్రిమినల్ కేస్
ఈ ఘటనకు దారితీసిన పరిస్థితులపై అంతర్గత విచారణ ముమ్మరంగా కొనసాగుతోందని కమిషన్ తెలిపింది. విధుల పట్ల తీవ్ర నిర్లక్ష్యం వహించిన నలుగురు అధికారులకు షోకాజ్ నోటీసులు జారీ చేయగా, తీవ్ర పరిణామాలను పరిగణనలోకి తీసుకుని ఇద్దరు సెక్షన్ ఆఫీసర్లను తక్షణమే సస్పెండ్ చేసినట్లు కమిషన్ వెల్లడించింది. మరోవైపు ఓఎంఆర్ షీట్ల సురక్షిత తరలింపు , నిర్వహణలో తీవ్ర అలసత్వం వహించిన కాంట్రాక్టర్పై కఠిన చర్యలు తీసుకున్నారు. అతనికి ఇచ్చిన వర్క్ ఆర్డర్ను వెంటనే రద్దు చేయడంతో పాటు పోలీస్ స్టేషన్లో ఎఫ్ఐఆర్ నమోదు చేయించారు.
భవిష్యత్ పరీక్షలపై ఎలాంటి ప్రభావం ఉండదు
గతంలో పూర్తయిన పరీక్షల పాత రికార్డులు మాత్రమే కావడం వల్ల ఈ ఘటనతో రాబోయే లేదా ప్రస్తుతం జరుగుతున్న ఎలాంటి భవిష్యత్ నియామక ప్రక్రియలపై ప్రభావం ఉండదని టీజీపీఎస్సీ స్పష్టం చేసింది. అభ్యర్థులు ఎలాంటి ఆందోళన చెందాల్సిన అవసరం లేదని తెలిపింది. కమిషన్ పరిధిలోని రికార్డుల నిర్వహణ, వాటిని భద్రపరచడం ప్రక్రియల్లో ఇలాంటి పొరపాట్లు పునరావృతం కాకుండా మునుపెన్నడూ లేని విధంగా అత్యంత కట్టుదిట్టమైన చర్యలు చేపడుతున్నట్లు అధికారులు వెల్లడించారు.