TGPSC : నిరుద్యోగులకు గుడ్‌న్యూస్‌.. 3 నోటిఫికేషన్ లు విడుదల చేసిన TGPSC

TGPSC : తెలంగాణలో ప్రభుత్వ ఉద్యోగాల కోసం ఎదురుచూస్తున్న నిరుద్యోగులకు తెలంగాణ పబ్లిక్ సర్వీస్ కమిషన్ (TGPSC) తీపి కబురు అందించింది. రాష్ట్రంలోని వివిధ శాఖల్లో ఖాళీగా ఉన్న మొత్తం 290 అసిస్టెంట్ ఎగ్జిక్యూటివ్ ఇంజనీర్ (AEE), అసిస్టెంట్ ఎన్విరాన్‌మెంటల్ ఇంజనీర్ పోస్టుల భర్తీ కోసం ఏకంగా మూడు వేర్వేరు నోటిఫికేషన్లను కమిషన్ విడుదల చేసింది.

విడుదలైన ఈ నోటిఫికేషన్ల ద్వారా భర్తీ చేయనున్న పోస్టులలో రోడ్లు & భవనాల (R&B) శాఖలోనే అత్యధిక ఖాళీలు ఉన్నాయి. ఈ శాఖలో 222 అసిస్టెంట్ ఎగ్జిక్యూటివ్ ఇంజనీర్స్ (సివిల్) పోస్టులను మొదటి నోటిఫికేషన్ ద్వారా, అలాగే 49 అసిస్టెంట్ ఎగ్జిక్యూటివ్ ఇంజనీర్స్ (ఎలక్ట్రికల్) పోస్టులను రెండో నోటిఫికేషన్ ద్వారా భర్తీ చేయనున్నారు. వీటితో పాటు తెలంగాణ కాలుష్య నియంత్రణ మండలి (PCB) లో ఉన్న 19 అసిస్టెంట్ ఎన్విరాన్‌మెంటల్ ఇంజనీర్ పోస్టుల భర్తీ కోసం మూడో నోటిఫికేషన్ ను విడుదల చేశారు. ఈ ఉద్యోగాలకు దరఖాస్తు చేసుకునే అభ్యర్థుల వయస్సు ఈ ఏడాది జులై 1నాటికి కనీసం 18 సంవత్సరాల నుండి గరిష్టంగా 44 సంవత్సరాల మధ్య ఉండాలి. ప్రభుత్వ నిబంధనల ప్రకారం అర్హులైన రిజర్వేషన్ వర్గాల అభ్యర్థులకు గరిష్ట వయోపరిమితిలో చట్టబద్ధమైన సడలింపులు వర్తిస్తాయి.

అభ్యర్థుల సౌకర్యార్థం వేర్వేరు పోస్టులకు ఆన్‌లైన్ దరఖాస్తుల ప్రక్రియను వేర్వేరు తేదీల్లో ప్రారంభించనున్నారు. R&B శాఖలోని సివిల్ పోస్టులకు జూన్ 06 నుండి ఆన్‌లైన్ దరఖాస్తులు ప్రారంభమై, జూలై 13 వరకు గడువు ఉంటుంది. అలాగే ఎలక్ట్రికల్ పోస్టులకు జూన్ 08 నుండి దరఖాస్తుల స్వీకరణ మొదలై, జూలై 15తో ముగుస్తుంది. ఇక కాలుష్య నియంత్రణ మండలిలోని అసిస్టెంట్ ఎన్విరాన్‌మెంటల్ ఇంజనీర్ పోస్టులకు జూన్ 10నుండి ఆన్‌లైన్ లింక్ అందుబాటులోకి రానుంది, దీనికి జూలై 17వరకు దరఖాస్తు చేసుకోవడానికి అవకాశం కల్పించారు. అర్హత , ఆసక్తి కలిగిన అభ్యర్థులు నిర్దేశిత గడువులోగా TGPSC అధికారిక వెబ్‌సైట్ ద్వారా ఆన్‌లైన్ విధానంలో మాత్రమే దరఖాస్తు చేసుకోవాల్సి ఉంటుంది. ఈ ఉద్యోగాలకు కావలసిన పూర్తి స్థాయి విద్యార్హతలు, సిలబస్, పరీక్షా విధానం, ఇతర సమగ్ర సమాచారం కోసం అభ్యర్థులు కమిషన్ వెబ్‌సైట్‌లో అందుబాటులో ఉంచిన డిటైల్డ్ నోటిఫికేషన్లను పరిశీలించాల్సిందిగా అధికారులు తెలిపారు.